Read Samo, Southern Tes2 1 Bible Online

Tes2 1 - Samo, Southern bible

Tes2 1

¹ Masɛ Pooli ni, Silaasi ni, ka Timote ne, wɔ n sɛ́wɔ kɛ diɛ Tesaloniki a Lawa a sɔmɔ minin la, kasɛn mɛnɛn bɛ́ wɔ Di Lawa laanka Dɛnaa Yezu *Krita wɔn lɛa.

²Lawa die a bǐɛ̃ zɛnaa ka nɛ, a là nyantoro kɔ ka la.

³Dɔɔ̃nɔn lɛn, wɔ doamaa-n wɔ barka da Lawa nɛ biikoo tumaa li kaa lɛa. A n siĩn miɛ̃, a giala, màn tá miɛ kaa golee Lawa li li parsiini, kɔn-narɛɛ mɛn dɔ bɛ́ ka lon kɔn wɔ paǹ li, bɛ dɔ á gole koe ka tumaa gɔ́ɔ̃ nɛ.

⁴Bɛ lɛ na á toa, wɔ dɔn tá wɔ dinin laakalɛɛ kaa lɛa Lawa a sɔmɔ minin yɔrɔ-a, a giala, ká sii si ka ganaa ká goleemali wɔ, fuu laanka nɔmaa tumaa gɔ́ɔ̃ nɛ.

⁵Kaa sii simaa lɛ n nyɛɛ, mà Lawa a kiri á pepere. Ka á boe la ka waa la ka bɛ-n kəni, mà ka á re we *Lawa a kiibaa kɛ nɛ, ka bɛ́ nɔmaa lɛ we ǹ mɛn lɛ a lɛa.

⁶A giala, min mɛnɛn nə goã fuu nyɛɛ ka nɛ, Lawa á re fuu nyɛɛ ǹ dɔn man miɛ̃. Bɛ lɛ n pepere Lawa yɔrɔ-a.

⁷Sɛnɛ, kasɛn mɛnɛn bɛ́ nɔmaa we sisia, á re susui koe ka la, kun ka wɔsɛn nɛ. Bɛ á re n zɛnɛɛ Dɛnaa Yezu a daa pinaa. Á re n din nyɛɛ kun ka a dia dí-a wole pàãdɛnan kɛn nɛ.

⁸A n die die tɛ buə̃ bii, min mɛnɛn bɛ́ ǹ nə́ n piã ka Lawa doɛ̃ nɛ, ǹ nə́ n piã ka wɔa Dɛnaa Yezu a Boo Tii Kɔɔ̃n kɛ dɔ nɛ, a dɔlɔ bɔ bɛn ganaa.

⁹ Dɔlɔ mɛn bɛ́ re n diɛ ǹ mìi ni, bɔ̀n gole á re ǹ yii, ǹ wɔlɔ á re lui Dɛnaa ganaa, ka a pàã sonbore kɛ nɛ.

¹⁰Min mɛnɛn bɛ́ a wɔn lɛa ǹ nə́ golee-n li, bɛn tá re a guguru koe, ǹ nə n kaãbaa a ganaa a daa pinaa. Ka dɔn tá re goɛ̃ kun ka bɛa dɛnan kɛn lɛn nɛ, a giala, wɔ siére mɛn pɛ ka nɛ, ká golee li.

¹¹Bɛ lɛ na á toa, wɔ á Lawa nyankoe kaa lɛa baraabaraa, màn mɛn bɛ́ toɛ, wɔa Lawa lɛ mɛn dia ka la, a ka yɛ ǹ dɛnan lɛa. Ka bɛ́ li mà ka sii sonbore mɛn tumaa zɛnaa, wɔ na a nyankoe wáa a din na a zɛnaa ǹ pàã kɔ ka la, a toa kaa goleemali na a nya ǹ dí nya ka a din pàã nɛ.

¹²Bɛ lɛ n die toɛ wɔa Dɛnaa Yezu tɔ bɔ kaa zɛnaa ǹ sii gɔ́ɔ̃ nɛ, ka dɔn tɔ bɔ a dɔ wɔ gɔ́ɔ̃ nɛ, wɔa Lawa laanka wɔa Dɛnaa Yezu Krita á bǐɛ̃baa kɛ barka nɛ.