Read Samo, Southern Tes2 2 Bible Online

Tes2 2 - Samo, Southern bible

Tes2 2

¹ Dɔɔ̃nɔn lɛn, wɔa Dɛnaa Yezu *Krita a daa boo laanka wɔa lɛsɔkɔn a li wɔ paǹ li, wɔ ǹ ka nyankoe,

²wáa ka baran saa lɛlɛ ka n dinin yiri lɔlɔkɔn fufuu, ká nyɛ́ɛ baa ka Dɛnaa a daa pinaa na á dɔ wa. Min tá boe la a pɛ ka nɛ, ka a n Lawa a boo gii diɛ, min dɔ á diɛ ka nɛ, ka a n Lawa a boo laakalɛɛ, hinlaa ǹ da sɛ́wɔ kɔ ka la mà wɔsɛn man wɔ́ dia.

³Ka nyan toa min kɔ́n ka yiri sã ka yɔrɔ kɔ́n nɛ wa. A giala, bɛ laan bɛ̀ a n zɛnaa, yǎa piã ka golee Lawa li-n nə we bɔrɔ, Lawa a Zɔ́ɔ babaraa kɛ dɔ nə n din nyɛɛ, asɛ mɛn doamaa bɛ́ nɛ a bɔ̀n baa.

⁴ Minbuiinin bɛ́ màn mɛn tumaa guguru koe, a n die n gòãn doɛ kɔn ka bɛ din tumaa nɛ, a zia da ǹ ganaa, yǎa a dinmaa die giɛ̃ tán Lawa a Kion, a pii mà asɛ n Lawa lɛa.

⁵Ka yiri ba a nɛ, mà má bɛ pɛ ka nɛ bɛ̀ ma bɛ́ tɔn ka li wa?

⁶Sɛnɛ, màn mɛn bɛ́ bɛa siin lɛn kurii zɛnaa ganaa kanna, ka dinin tá bɛ doɛ̃. A n miɛ̃, yǎa Lawa a Zɔ́ɔ baraa lɛ a biikoo die a tɔ nə n din nyɛɛ.

⁷A tá a piã ǹ dí lɛ gialaa nyɛɛ ka durii-n gɔrɔ. Sɛnɛ, màn mɛn lɛ bɛ́ kurii, yǎa bɛ nə n boe bii-a, siin lɛn nə tɔn nə n zɛnɛɛ.

⁸ Bɛa biikoo li, Lawa a Zɔ́ɔ lɛ á die n din nyɛɛ, sɛnɛ, bɛ̀ Dɛnaa Yezu soo lɔn gɔrɔ, a n die a din lɛ dii a yɔyɔrɛ ka a lɛ gɔ́ɔ̃ ǹ piɛ̃ nɛ, a toa a papaã duduu ka a din a gugurubaa kɛ a daa nɛ.

⁹ Lawa a Zɔ́ɔ lɛ n die die ka *Sɛtaan pàã nɛ, á re kaãbaa ǹ sii kaka tɔrɔ tumaa zɛnɛɛ a minin yiri sã nɛ.

¹⁰Min mɛnɛn bɛ́ re bɔ̀n biɛ, á re baraabaa zɛnɛɛ a yɔrɔ din tumaa li, a bɛn yiri sã nɛ. Maǹ die bɔ̀n biɛ, a giala, sonbore mɛn bɛ́ ǹ kirisibiɛ, ǹ lɛ kɔ bɛ lɛ ganaa lɛlɛ ǹ nə́ narɛ wa.

¹¹Bɛ lɛ na á toa, Lawa á yiri sã ǹ pàã diɛ ǹ la, màn mɛn bɛ́ toɛ, ǹ soɛ si sonbore lɛa.

¹²Bɛ lɛ n die toɛ, min mɛn tumaa bɛ́ a golee sonbore li wa, baraabaa kɔɔ̃n kɔ ǹ ganaa, dɔlɔ nə n bɔ bɛn ganaa.

¹³Dɔɔ̃nɔn lɛn, Dɛnaa bɛ́ á kasɛn mɛnɛn narɛ, wɔsɛn kɛn doamaa nɛ, wɔ barka da Lawa-n biikoo tumaa li kaa lɛa. Lawa na á ka bɔ bibinaanɛ, á n die ka kirisibiɛ. A n die ka kirisibiɛ, a giala, ká a wɔn baa ka a Yiri barka nɛ, ká golee Lawa a sonbore dɔ li.

¹⁴A na á ka bíi bɛ lɛ a lɛa, ka wɔa Boo Tii Kɔɔ̃n pɛ ka nɛ kɛ barka nɛ, mà ka kaa wɔ gii yɛ wɔa Dɛnaa Yezu Krita a gugurubaa kɛ nɛ.

¹⁵A bɛ́ miɛ̃, dɔɔ̃nɔn lɛn, ka n doa, wɔ doroon mɛnɛn kɔ ka la ka wɔ lɛ nɛ, hinlaa wɔ ǹ mɛnɛn kiɛ̃ sɛ́wɔ nɛ wɔ́ ǹ dia ka la, ka n yiri koa bɛ nɛ parsiini.

¹⁶Wɔ Di Lawa wɔ narɛ, á bǐɛ̃ kɔ wɔ ganaa á foo-doa kaka kɔ wɔ la, ka bɛ nɛ, á wɔ foo taã biɛ̃ ǹ taman yii.

¹⁷A din laanka wɔa Dɛnaa Yezu Krita die ǹ foo tãbaa kɔ ka la, ǹ pàã dɔ kɔ ka la ka sii sonbore zɛnaa, ka boo sonbore da biikoo tumaa li.