Read Samo, Southern Tim2 3 Bible Online

Tim2 3 - Samo, Southern bible

Tim2 3

¹N yiri koa li n dɔ̃, mà biikoo giala-nyɔmiɛ li, lɛawaa kakan tá re yii.

²A giala, minbuiinin tá re zuũ-bɔlen biɛ, ǹ ga màn li sii á re kaka koe. Ǹ tá re n dinin laakalɛɛ, ǹ nə n dinin gole kɔ. Ǹ tá re Lawa tɔ ziziɛ̃, ǹ ba re ǹ yɛ wolen bɔlɔ miɛ wa, ǹ ba re bǐɛ̃ doɛ̃ wa. Ǹ tá re n yii we Lawa la,

³ǹ tá re kakaarɛ koe, ǹ ba re min makara doɛ̃ wa. Ǹ tá re kɔn tɔ ziziɛ̃ wolen biɛ, ǹ ba re n dinin kuĩ wa. Ǹ tá re baraa koe, sii bǐɛ̃ a die kɔɔ̃n koe ǹ ganaa wa.

⁴Ǹ tá re n boe kɔn li, ǹ foo á re goɛ̃ lon, din gole kɔ á re liɛ ǹ yii ni. Ǹ foo siin tá re kɔɔ̃n koe ǹ ganaa, ǹ la Lawa foo sii ni.

⁵Ǹ tá re n dinin biɛ Lawa a zii tɔ-wɔlen lɛa, sɛnɛ, màn mɛn bɛ́ a zii tɔ-wɔ lɛ a pàã koe ǹ la, ǹ ba re bɛ sii wa. Haya, n bɔ bɛ miã minin kɛn wɔlɔ li ka lenlen!

⁶Ǹ dinin kɛn lɛn tɛnɛn man nɛn bɛ̀ ǹ nə n dɔ lɔ yiri wɛɛnaan li kion, bɛ̀ ǹ nə ǹ bebele, ǹ nə ǹ kũ ka ǹ da ǹ boon ne. Sii baraa guĩ baa bɛa lɔn lɛn mìi ni. Maǹ bɔlɔ sɛ̀-mui sii tɔrɔ tumaa kio.

⁷Maǹ daraa gɔ́ɔ̃-n biikoo tumaa li, sɛnɛ, ǹ ba tɔn boe la ǹ tá sonbore doɛ̃ wa.

⁸ Zanɛsi laanka Zanbrɛsi Muizu liere kɔ lɔn, bɛa minin kɛn lɛn dɔn man sonbore liere koe miɛ̃. Bɛ miã minin kɛn lɛn Lawa a zii tɔ-we ziziɛ̃ á nya.

⁹Sɛnɛ, ǹ zɛnaa ǹ sii lɛ a re woe nyɛɛn wa. Sii mɛn Zanɛsi laanka Zanbrɛsi yɛ, bɛ lɛ tɔrɔ á re ǹ dɔn yii: Min tumaa á die ǹ baãnaabaa lɛ doɛ̃.

¹⁰Sɛnɛ, ma bɛ́ minin darɛɛ siin mɛnɛn ganaa, nsɛ Timote á bɛn doɛ̃. Maa tɔ wɔ ǹ gɔn nɛ, ka ma sii mɛn koa ma yɔrɔ-a, n tá bɛ dɔ doɛ̃. N maa goleemali boo ma, maa foo-kuĩ ni, ka maa kɔn-narɛɛ laanka maa sii simaa nɛ.

¹¹ Ǹ fuu mɛn nyaa ma nɛ, ma nɔmaa mɛn wɔ, n tá bɛ dɔ doɛ̃. Sii mɛn tumaa ma yɛ Antiɔsi kiwi, Ikoniɔmu ni, ka Listrə ne, n bɛn tumaa yɛ. Bɛ̀ ń pɛ mà fuu, má yɛ. Sɛnɛ, Dɛnaa ma bɔ a din tumaa gɔ́ɔ̃ nɛ.

¹²Min mɛnɛn tumaa bɛ́ li dinin, ǹ nyɛ́ɛ baa Lawa nɛ, ǹ kɔ Yezu *Krita lɛ, bɛn tumaa á re fuu yii.

¹³Min babaraan kɛn laanka minin yiri-sãlin kɛn, màn tá re miɛ bɛn baraabaa li. Ǹ tá re min kɔsɔn siɛ̃, ǹ dininmaan dɔn siɛ̃maa nɛ.

¹⁴Sɛnɛ nsɛ, n bɛ́ n nə́ n daraa màn mɛn ganaa, ń si taãn lɛa, toa n bɛ kũ doɛ̃. Min mɛnɛn nə n daraa a ganaa, n tá ǹ dɛnan doɛ̃.

¹⁵Haalɛ, n nɛnyaanbaa waáraa, n tá Lawa a sɛ́wɔ boo sonboren kɛn doɛ̃. Ǹ tá boe la ǹ yiri kɔ n la, n golee Yezu Krita li, màn mɛn bɛ́ toɛ, n kirisibaa yɛ.

¹⁶Lawa a boo-kiɛ̃ tumaa n boe Lawa din li. Bɛa boo lɛ a là n ka kɛ nɛ: a n min darɛɛ a sonbore a woo ǹ bǎã dɔ̃, a n piã ka soɛ nɛ, a n din doroo, a na a zɛnaa ǹ sii tele.

¹⁷Lawa a Boo lɛ n bɛ zɛnɛɛ, màn mɛn bɛ́ toɛ, Lawa a dí-nyali a sii lɛ pã, a boo la a dí sonbore tumaa nya.