Read Samo, Southern Tim2 4 Bible Online

Tim2 4 - Samo, Southern bible

Tim2 4

¹Man boo kɛ pii n ni, ma á laɛ n ganaa Lawa laanka Yezu *Krita yɔrɔ-a, Yezu mɛn bɛ́ re kiri kuri yiikoonaan laanka geren la. A din lɛ n wusii die kii lɛa.

²Bɛ lɛ taman yii, n doa n Lawa a boo lɛ laakalaa, ta biikoo sonbore ne, ta biikoo sonbore bie wa. Minin sã nyaa ǹ nɛ, n sɛ̀ pɛ ǹ ganaa, n nə ǹ foo taã, n nə ǹ daraa ka sii simaa lɛ piɛ̃ nɛ.

³A giala, biikoo kɔ́n tá re die, minin tɛnɛn ba re lɛ koe, ǹ nə n too kɔ daraa ǹ boo sonbore kɛ ganaa doo wa. Sɛnɛ, ǹ tá re n siɛ ǹ dinin foo sii baraa li, ǹ minin-daraali gigiã lɛ sɔkɔn ǹ dinin li. Boo mɛn bɛ́ kɔɔ̃nɛ ǹ dinin too ne, bɛn tá re bɛ pii ǹ ni.

⁴Ǹ tá re n too boe sonbore li, ǹ nə n too kɔ soɛ boon ganaa.

⁵Sɛnɛ, nsɛ toa n boo n din la sii tumaa gɔ́ɔ̃ nɛ, n nɔmaa si n ganaa, n Boo Tii Kɔɔ̃n kɛ pɛ, n nə n Lawa a dí nya a yɔrɔ li sɔnbɔraanɛ.

⁶Masɛ dinmaa wɔ paǹ li, maa *wúlu màn baa biikoo dɔ, maa gɛ̀ biikoo dɔ á nya.

⁷Má n doa má yɔ bɔ sɔnbɔraanɛ. Má dɔ maa baa lɛ dan ganaa. Má bɔlɔgoondɛnaa baa.

⁸Kanna kəni, gɔ̀lɔ̀baa ǹ saraa tá ma duĩ. Min mɛnɛn tɔ wɔ ǹ gɔn bɛ́ pepere, Lawa n die saraa lɛ koe bɛn la, Dɛnaa kiri pepere wɔle n die bɛa saraa lɛ koe ma la kiri-kurii pinaa. A bie re koe ma dinsɔɔ̃ la wa. Min mɛnɛn bɛ́ n yii diɛ a wusoo a daa la parsiini, a n die a din saraa goon lɛ koe bɛn dɔn la.

⁹N doa n da ma li kànaa fufuu.

¹⁰ A giala, Demaasi nə́ n saa sisia a kanaa kɛ li, á woo á ma daa. A na á woo Tesaloniki kiwi. Kresan woo Galaasi gána nɛ, Tiiti woo Dalmaasi gána nɛ.

¹¹ Luku dinsɔɔ̃ n kun ma nɛ. Bɛ̀ n tá die, n Marki kũ ka da kun. A giala, á boe la a n dɔ ma lɛ maa dí gɔ́ɔ̃ nɛ.

¹² Má Tisiki dia Efɛɛzi kiwi.

¹³ Ma bɛ́ ma dɔnkɛ gole mɛn toa Karpuusu a kion Troasi, bɛ̀ n tá die n da ka bɛ nɛ, ka sɛ́wɔn kɛn dɔn nɛ. Ma laadoo n sɛ́wɔ-muniin kɛn ganaa á la bɛn tumaa nɛ.

¹⁴ Fuũn giĩ Alɛksandrə kɛ sii baraa gigiã zɛnaa ma nɛ. Dɛnaa á re sarɛɛ, a kɔnpɛ ka a nya ǹ dín ni.

¹⁵N dɔ yiri bɔ li, a giala, á wɔa da ǹ boon liere kɔ parsiini.

¹⁶Ma bɛ́ n bɔlɔ pii kiri wɔ ǹ bǎã-n bibinaanɛ, min kɔ́n bɔ ma lɛ-a wa, ǹ tumaa ma toa. Lawa baran ǹ kũ bɛ li wa.

¹⁷Sɛnɛ, Dɛnaa din nə́ n dɔ ma lɛ. Á pàã kɔ ma la, màn mɛn bɛ́ toɛ, ma boo lɛ tumaa laakalaa, tɔrɔ kɔsɔn tumaa ma. Dɛnaa ma si gɛ̀ la!

¹⁸Dɛnaa din tá re ma sii sii baraa tumaa la, á re ma kirisibiɛ, a ma da a lon a kiibaa ǹ bǎã kɛ nɛ. Gugurubaa na a din wɔ lɛa biikoo tumaa li! A n miɛ̃.

¹⁹ Ma á fòo diɛ Prisili laanka Akilaasi ni, ka Onezifɔɔrɔ a kion minin ni.

²⁰ Erasti giã Korɛnti kiwi. Má Trofimu toa Milɛti kiwi, a giala, a goã lon wa.

²¹N doa n daa bɔ̀nɔn tɔn kɔ. Ebulusu laanka Pudansi tá fòo diɛ n nɛ, ka Linusu laanka Klodia nɛ. Dɔɔ̃nɔn gialakunun lɛn tumaa tá fòo diɛ n nɛ.

²²Lawa die a giã n li. Lawa a bǐɛ̃ die a goã kun ka tumaa nɛ.