Read Samo, Southern Piɛ1 2 Bible Online

Piɛ1 2 - Samo, Southern bible

Piɛ1 2

¹Haya, ka baraabaa tɔrɔ tumaa kaa, ka soɛ tɔrɔ tumaa nɛ, ká bɔlɔ paa pɛ tɔrɔ tumaa nɛ. Ka foo wuu pɛ kaa, ká kɔn tɔ ziziɛ̃ nɛ.

²Ka n baa ka nɛnyaan tiɛɛ̃nɛn bɛ́ lɔn, ǹ bɛ́ giɛ nyɔ li lɔn, ka dɔn nə ga Lawa a boo sonbore kɛ li miɛ̃, màn mɛn bɛ́ toɛ, ka gole kɔ bɛa boo lɛ barka nɛ, ka wo dɔ kirisibaa ganaa.

³ A giala, Lawa a boo kiɛ̃ kɛ n pii: «Ká yɛ mà Dɛnaa lɛ á siĩn sonbore.»

⁴Ka n mɔrɔ Dɛnaa lɛ ganaa. A din lɛ n kɔlɔ yiikoonaa lɛ lɛa, minin nə́ n piã nɛ, sɛnɛ, a din lɛ-n Lawa bɔ, á n soɛ kɔlɔ tumaa nɛ a yɔrɔ-a.

⁵Bɛ̀ ka á n mɔrɛ bɛa kɔlɔ kɛ ganaa, ka dɔn man die goɛ̃ ka kɔlɔ yiikoonaan bɛ́ lɔn. Ǹ bɛ́ kɔlɔn kiɛ kɔn mìi-n lɔn a kion baa, ka dɔn man die goɛ̃ kun miɛ̃, Yiri Fu ka baa Lawa a kion lɛa. Ka á re goɛ̃ Lawa a wúlu-bɔlen zaman lɛa, kɔɔ̃n Lawa ganaa.

⁶ A giala, Lawa a boo n pii: «Bɛ lɛ nɛ man kion gòã daa ǹ kɔlɔ diɛ tán *Siɔn. Kɔlɔ barkadɛnaa nɛ, doa-n tán kaka. Min woo min nə́ n foo doa a ganaa, bɛa dɛnaa a re bìn diɛ wa.»

⁷ Haya kəni, kasɛn golee Lawa li wolen lɛn, kɔlɔ kɛ lɛ a barka n kasɛn wɔ lɛa. Sɛnɛ, golee Lawa li baãnaan kɛn, bɛn wɔ á ke: «Kion-dɔlen nə n piã ka kɔlɔ mɛn nɛ, bɛ lɛ na á kɛ gùrù dɔ ǹ kɔlɔ baa.

⁸ Ka bɛ dɔ-n doo, gòã na ma ganaa ǹ kɔlɔ nɛ, minin daa ǹ gɛ̀fu ni.» Golee Lawa li baãnaan lɛn manə n gòã niɛ a ganaa, a giala, ǹ nə́ n piã, ǹ ba golee Lawa a boo li wa. Lawa na á bɛ lɛ yɔrɔ bɔ ǹ lɛa lɛlɛndun.

⁹ Sɛnɛ, kasɛn man Lawa a tɔrɔ boe lɛa, tɔrɔ mɛn bɛ́ Kii Lawa a wúlu-bɔlen lɛa. Kasɛn man tɔrɔ lɛa, Lawa koa a gɔrɔn a din wɔ lɛa, tɔrɔ mɛn a minin bɛ́ Lawa wɔn lɛa. A na á ka bíi á ka bɔ wɔlɔ tì li, á daa ka nɛ a din a wɔlɔ fúlu sonbore kɛ li, mà ka a din a sii sonboren kɛn laakalaa.

¹⁰ Ka goã Lawa a tɔrɔ minin lɛa lɛlɛ wa, sɛnɛ kanna, ka na a tɔrɔ minin lɛa; kasɛn mɛnɛn bɛ́, Lawa makara bɔ ka ganaa lɛlɛ wa, sɛnɛ kanna, á makara bɔ ka ganaa.

¹¹Ma dɔɔ̃n narɛɛ wolen lɛn, kasɛn mɛnɛn bɛ́ gùlin laanka tiin lɛa kanaa kɛ nɛ, man ka nyankoe, ka ka dinin kũ dùũ sii babaraan kɛn ganaa, dùũ siin mɛnɛn bɛ́ zia biɛ biikoo tumaa li telenboen ganaa.

¹²Ka toa kaa tɔ wɔ ǹ gɔn siĩn kɔ Lawa-nyankɔle baãnaan bii, màn mɛn bɛ́ toɛ, tà maǹ ka tɔ ziziɛ̃, mà ka n baraa-zɛnaalin lɛa ka sii mɛn nɛ, kaa nya ǹ dí sonboren kɛn doɛ̃ nə n baa pàã lɛa ǹ ganaa, ǹ boo la ǹ Lawa guguru kɔ a din nyaa ǹ nɛ pinaa.

¹³Ka minbuiinin pàã tumaa bɔlɔ si Dɛnaa lɛ a lɛa. Ka kii gole kɛ bɔlɔ si, asɛ lɛ n pàã lɛ a mìi gole lɛa.

¹⁴Ka bɛ dɔ kio wɔ a kiin kɛn bɔlɔ si, maǹ kii gole lɛ a dia dí-a wolen lɛa, ǹ nə́ dɔlɔ boe sii babaraa-zɛnaalin ganaa, ǹ nə́ sii bǐɛ̃-zɛnaalin para pii.

¹⁵A giala, a n Lawa dùũ lɛa, ka bǐɛ̃ zɛnaa, ka baãnaanan sii doɛ̃baã kɛ kii yiɛ nɛ.

¹⁶Ka ǹ ka dinin gɔn wìi a lɛa, sɛnɛ, ka baran taasɛ mà ka bɛ́ ka dinin gɔn wìi a lɛa ke, mà ka á boe la ka sii baraa zɛnaa, bɛ̀ a ná a ba n doɛ̃ wa. Ka tɔ wɔ ka n pɛ mà ka ǹ Lawa a bɛ̀rɛn lɛa.

¹⁷Ka min din tumaa guguru kɔ, ka ka dɔɔ̃n Lawa-nyankɔlen narɛ, ka nyɛ́ɛ baa Lawa nɛ, ka kii gole kɛ guguru kɔ.

¹⁸Bɛ̀rɛn lɛn, ka kaa dɛnaagiĩn bɔlɔ si ka nyɛ́ɛbaa ma yii-n gole ne. Ka baran a sonboren laanka a basiɛ̃ wolen dininsɔɔ̃nɔn bɔlɔ si wa, ka a kakaarɛn dɔn bɔlɔ si.

¹⁹Sonbore, bɛ̀ n tá fuun yii, a da yaa n sii zɛnaa, á n bɛa fuun kɛn lɛn da ma mìi-n boe wa, bɛ̀ n dɔ̃ mà Lawa dùũ ni, n si n ganaa, bɛ n bǐɛ̃ lɛa.

²⁰Sonbore, bɛ̀ min sii la, a ná a fuu yii, ta á bɛa fuu lɛ si a ganaa, là goon ba a-n wa. Sɛnɛ, bǐɛ̃ zɛnaa kio, bɛ̀ n tá fuu yii, n nə́ sii n ganaa, bɛ lɛ n bǐɛ̃ lɛa Lawa yii li.

²¹Lawa na á ka bíi bɛ lɛ a lɛa, a giala, *Krita lɛ dɔ na á fuu yɛ kaa lɛa, á bɛ nyaa ka nɛ sii zɛnaa ǹ gɔn lɛa, màn mɛn bɛ́ toɛ, ka kɔ a gòɛ̃ lɛ.

²² Asɛ sii baraa zɛnaa wa, boo kɔkɔrɔ kɔ́n bɔ a lɛ-n wa.

²³ Maǹ nə́ goã sɔ kiɛ la, a ba a dòo koe wa. A bɛ́ fuu yii ke, a boo baraa da min-a wa, sɛnɛ, a na á goã a din a sii toɛ Lawa kiri pepere wɔle kɛ gɔn.

²⁴ Krita na á n din kɔ, á wɔa sii baraan gũ gɔn ganaa, màn mɛn bɛ́ toɛ, wɔsɛn mɛnɛn dɔn bɛ́ ka geren bɛ́ lɔn kanna, sii baraan wɔ a paǹ li, wɔ boo la wɔ peperebaa ǹ dí nya. Asɛ a màbɔmaa busulɛn man nə́ wɔsɛn wɔn nya.

²⁵A giala, ka n ká goã papaã-n lɛlɛ ka sèren bɛ́ lɔn, sɛnɛ kanna, kaa Gamawalan wole lɛ laanka ka Lɛduə̃li lɛ ka yɔrɔ bɔyaa, a daa ka-n a din li.