Read Samo, Southern Piɛ1 3 Bible Online

Piɛ1 3 - Samo, Southern bible

Piɛ1 3

¹ Kasɛn dɔn lɔn lɛn, ka dɔn nə ka zuũn bɔlɔ si a din yɔrɔ kɛ lɛ la, màn mɛn bɛ́ toɛ, ta ǹ tɛnɛn manə n piɛ̃, mà ǹ ba golee Lawa a boo li wa, ǹ lɔn tɔ wɔ ǹ gɔn dinsɔɔ̃ nə ǹ kũ, bɛ̀ boo diɛ ná a ba a-n dinin wa.

²A giala, ǹ tá re kaa tɔ wɔ ǹ gɔn sonbore kɛ yii, ka ǹ dininmaan lɛn dɔn guguru kɔ ǹ gɔn kɛ nɛ.

³ Ka baran ga gɔ̀nɔn ganaa wɔ a siĩnbaa kɛ li wa: bɛ mɛn bɛ́ ka mìi-tiɛ̃ kakan nɛ, ka sana laanka mɔnaa dadaran wɔ nɛ.

⁴Sɛnɛ, kaa siĩnbaa lɛ goã foo wɔ kɛ lɛa, bɛa siĩnbaa kɛ lɛ a kiɛ̃ wa, a n boe foo-basiɛ̃ laanka ga là nyantoro li ǹ taasiɛ nɛ, bɛ lɛ n soɛ màn tumaa nɛ Lawa yɔrɔ-a.

⁵Lɛlɛ-lɛlɛ a lɔ sonboren mɛnɛn bɛ́ ǹ nə́ goã n foo doɛ Lawa ganaa, bɛn man nə́ goã giɛ bɛa siĩnbaa kɛ li ka ǹ zuũn bɔlɔ si ni.

⁶ Saaraa na á goã zɛnɛɛ miɛ̃, a na á goã n zuũ Abrahamu bɔlɔ sii, a n bíi mà "Asɛ a dɛnaagiĩ". Kasɛn man bɛa Saaraa lɛ a nɛlɔn lɛa pelo, bɛ̀ ka á bǐɛ̃ zɛnɛɛ miɛ̃, ka n ka a toɛ màn kɔ́n tá nyɛ́ɛ diɛ ka ganaa wa.

⁷ Kasɛn dɔn, giĩn lɛn, a din yɔrɔ kɛ lɛ la, ka dɔn nə goã kun kaa lɔn nɛ, ka n doɛ̃ mà pàã ba ǹ lon ka kaa wɔ bɛ́ lɔn wa. Ka ǹ guguru kɔ, a giala, ǹ dɔn doamaa nɛ, ǹ Lawa a bǐɛ̃baa ǹ nyin nyabaã kɛ lɛ yɛ kun ka nɛ. Ka zɛnaa miɛ̃, màn mɛn bɛ́ toɛ, màn kɔ́n baran ka sàabaa Lawa-nyankɔ ganaa wa.

⁸Bɛ din tumaa kio, ka toa kaa taasiɛn nə goã goon, ka toa ka sii dɔ̃ kɔn la. Ka kɔn narɛ ka Lawa a minin bɛ́ zɛnɛɛ lɔn dɔɔ̃nbaa gɔ́ɔ̃ nɛ. Ka makara bɔ kɔn ganaa, ka ka dinin boɛɛn kɔ kɔn nɛ.

⁹Bɛ̀ min sii baraa zɛnaa ka nɛ ka baran a dòo saraa ka baraa-n wa. Bɛ̀ min sɔ kɔ ka ganaa, ka baran a dòo saraa ka sɔ-n wa. Sɛnɛ, Lawa na á ka bíi, mà ka Lawa bǐɛ̃ bíi ǹ li, bɛ kio kəni, a din tá re bǐɛ̃ zɛnɛɛ ka nɛ.

¹⁰ Sonbore, Lawa a boo n pii: «Bɛ̀ min mɛn tá li a tá kanaa bǐɛ̃ kɔ, a nyin sasa yɛ là nyantoro gɔ́ɔ̃ nɛ, yǎa ǹ dɛnaa nə n lɛ kuĩ boo baraa diɛ ganaa, a n nyɛnɛɛ soɛ nɛ.

¹¹A n bɔ sii baraa zɛnaa wɔlɔ li, a sii bǐɛ̃ zɛnaa. A ga là nyantoro li, a baa si a kio.

¹²A giala, Dɛnaa n giɛ sii pepere-zɛnaalin walan, a too n koo ǹ nyankɔ li, sɛnɛ, Dɛnaa nə n piɛ̃ ka baraa-zɛnaalin ni.»

¹³Die n die boe la a baraa zɛnaa ka nɛ, bɛ̀ á daa yaa ka gù n kaa-n bǐɛ̃ zɛnaa li?

¹⁴ Sɛnɛ, bɛ̀ ka á fuu yii sii pepere zɛnaa a lɛa, Lawa á re barka diɛ ka ganaa. Ka baran nyɛ́ɛ baa min kɔ́n yii-n wa, ka baran toa ka yiri dɔ nə n lɔlɔkɔn wa.

¹⁵Sɛnɛ, ka toa *Krita goã kaa Dɛnaa lɛa, ka bǎã kɔ a dinsɔɔ̃ la ka foo ne. Ka n yɔrɔ bɔ biikoo tumaa li ka koa, foo-doa mɛn bɛ́ ka lon, bɛ̀ minin tá nɔ̀n diɛ ka la bɛ wɔ gɔn la, ka toa ka a yɔrɔ sonbore nyaa ǹ nɛ.

¹⁶Sɛnɛ, ka bɛ zɛnaa ka foo-basiɛ̃ nɛ, ka min kɔsɔ guguru kɔ nɛ. Ka baran toa ka foo ka zɛ̀rɛ baa ka sii kɔ́n nɛ wa, màn mɛn bɛ́ toɛ, ta maǹ ka tɔ ziziɛ̃ ka sii kɔ́n nɛ, min mɛnɛn dinin bɛ́ boo baraa diɛ ka ganaa, kaa tɔ wɔ ǹ gɔn sonbore kɛ a lɛa kun ka Krita nɛ, sìi wusoo a bɛn kũ.

¹⁷Sɛnɛ, bɛ̀ Lawa dùũ ni ka á fuu yii, a goã bǐɛ̃ zɛnaa a lɛa, a baran goã baraa zɛnaa a lɛa wa.

¹⁸Sonbore, Krita dinmaa lɛ na á gã minbuiinin sii baraan lɛa, gunyin goon toto. Asɛ pepere lɛ gã, ka minbuiin bɛ́ lɔn, min pepere baãnaan lɛa, sɛnɛ, a yii wusoo á kaa á n bɔ geren bii ka Yiri Fu barka nɛ, màn mɛn bɛ́ toɛ, a ka nyaa Lawa nɛ.

¹⁹Yiri Fu lɛ pàã ganaa, Krita lɛ na á woo boo da telenboenən kɛn dɔn dinin ni kòso-n geren piɛ,

²⁰ minin mɛnɛn nə́ n piã lɛlɛ ka bɔlɔ-si ni, bɛ̀ Lawa bɛ́ ǹ sii sii a ganaa, Nowee a mu la ǹ goo zɛnaa biikoo lɛ li. Zaman boɛɛn dinsɔɔ̃ na á kirisibaa bɛa goo kɛ lɛ gɔ́ɔ̃ nɛ, mu gole kɛ lɛ din dɔ barka nɛ, bɛ giala mà min kiwisi dinsɔɔ̃.

²¹Bɛa sii lɛ na á goã *batɛmu kɛ a kɔnboe lɛa. Bɛa batɛmu kɛ lɛ bie gɔ̀nɔn ganaa ǹ *gɔ̀ boe min-a wa, a n din kɔ Lawa la ka foo sonbore-n sii nyɛɛ. Lawa bɛ́ á Yezu Krita yii kaa á bɔ geren bii ke, a na á barka wɔ batɛmu kɛ nɛ, á n ka kirisibiɛ nɛ kanna.

²²Yezu Krita lɛ woo lon dɔn, á giã-n Lawa gusin. Lon a dia dí-a wolen ne, ka lon màn goledɛnan laanka a pàãdɛnan tumaa na a din lɛ bɔlɔ sii.