Read Samo, Southern Piɛ1 5 Bible Online

Piɛ1 5 - Samo, Southern bible

Piɛ1 5

¹Min mɛnɛn bɛ́ ka bii, ǹ nə́ Lawa a sɔmɔ lɛ a minin nyɛɛnaandɛnan lɛa, man kɔn ka bɛn nɛ sisia. Ma dɔ dinmaa lɛ n nyɛɛnaandɛnaa lɛa. *Krita fuun mɛnɛn yɛ, ma bɛn yɛ ma yii ni, ma nə ǹ siére lɛa. Krita lɛ bɛ́ re die ǹ mɛn pinaa, ma á re maa wɔ gii yii a gugurubaa kɛ nɛ. Ma á màn mɛn nyankoe bɛa nyɛɛnaandɛnan lɛn lon, bɛ n ka kɛ nɛ:

² Lawa ka bɔ á ka koa a zaman mɛn nyɛɛn ke, ka ga bɛa zaman lɛ walan, ka tɔɔn-lɛduə̃li bɛ́ giɛ a tɔɔn walan lɔn. Ka ga zaman lɛ walan ka foo kɔɔ̃n nɛ, a kɔnpɛ Lawa dùũ ni, a baran n baa ka n pɛ mà pàã sii-n wa. Ka baran zɛnaa ga màn li ǹ dí dɔ lɛa wa, ka toa a goã din-kɔ ǹ dí lɛa.

³Lawa min mɛnɛn kɔ ka la mà ka ǹ nyɛɛnaan bɔ, ka baran pàã nyaa bɛn man wa, sɛnɛ, ka n baa tɔ wɔ ǹ gɔn sonbore nyaa ǹ minin lɛa zaman lɛ nyɛɛnɛ.

⁴Bɛ̀ Ga Zaman Walan Wole gole lɛ din daa ǹ mɛn pinaa, á re gɔ̀lɔ̀baa ǹ kii bafolo koe ka la, kii bafolo mɛn a siĩnbaa bɛ́ a nyɛɛ duduu wa.

⁵ A din yɔrɔ lɛ la, nɛnyaanan lɛn, ka min golen bɔlɔ si. Ka dinin tumaa, kaa tá kun gɔ́ɔ̃ nɛ, didie din boɛɛn kɔ ǹ sii zɛnaa, a giala, Lawa a boo n pii: «Lawa nə n piɛ̃ ka din gole-kɔlen ne, sɛnɛ, a n bǐɛ̃ zɛnɛɛ din boɛɛn-kɔlen manɛ.»

⁶ Bɛ lɛ taman yii, ka ka dinin boɛɛn kɔ Lawa pàãdɛnaa lɛ giulun, màn mɛn bɛ́ toɛ, a ka saa lon a kɔnpɛ a biikoo ne.

⁷Ka kaa gɔ́ɔ̃-bii ǹ siin dinin tumaa doa Lawa ganaa, a giala, a din nə giɛ ka walan.

⁸Ka n yii dɔraa, ka ka dinin kũ. Kaa zɔ́ɔ *Sɛtaan lɛ n kɔɔ̃nɛɛ, ka yàra wɔɔsaa-wɔle bɛ́ lɔn. A n giɛ, a bɛ́ re doe min mɛn-a a kũ.

⁹Ka goã golee Lawa li gɔ́ɔ̃ nɛ, ka n gòãn doa ka yɔ bɔ a ganaa, a giala, ka á doɛ̃ mà ka dɔɔ̃nɔn mɛnɛn bɛ́ giã-n kanaa paǹ tumaa ganaa, mà ǹ dɔn man bɛa fuun lɛn yii.

¹⁰Sɛnɛ, ka bɛ́ fuu yii biikoo boɛɛn kɛ gɔ́ɔ̃-n ke, bɛ kio, bǐɛ̃ tumaa zɛnaali Lawa mɛn bɛ́ á ka bíi, mà ka kaa wɔ gii yɛ a din a gugurubaa nyabaã wole kɛ nɛ, kaa kaa-kun Krita-n lɛ barka nɛ, bɛa Lawa lɛ dinmaa n die ka gòãn doɛ doo, a ka foo taã, a pàã kɔ ka la, a ka kaa gòãn koa ǹ bǎã sonbore ne.

¹¹Mìinaabaa na a din wɔ lɛa yǎa duduu. A n miɛ̃!

¹² Boo nɛ paa ke má n die diɛ ka la, Silaasi na á n dɔ ma lɛ, á ǹ kiɛ̃, Silaasi mɛn bɛ́, man kuĩ ma dɔɔ̃n Lawa-nyankɔle bɔlɔgoondɛnaa lɛa. Man sɛ́wɔ kɛ diɛ ma á ka foo taɛ̃. Man maa siérebaa ǹ boo kɛ pii ka nɛ, máa Lawa a bǐɛ̃baa kɛ n sonbore lɛa, máa ka goã bɛ lɛ gɔ́ɔ̃ nɛ.

¹³ Lawa a sɔmɔ minin mɛnɛn bɛ́ *Baabilonii kiwi, Lawa nə́ ǹ bɔ ka a bɛ́ á ka dɔn bɔ lɔn, bɛn tá fòo diɛ ka nɛ. Maa nɛgiĩ Marki dɔ á fòo diɛ ka nɛ.

¹⁴Ka fòo da kɔn nɛ ka kɔn-narɛ ǹ fòo sonbore ne. Ka mɛnɛn tumaa bɛ́ kaa-n kun ka Krita nɛ, Lawa a là nyantoro die a goã ka tumaa li.