Read Samo, Southern Zaã1 3 Bible Online

Zaã1 3 - Samo, Southern bible

Zaã1 3

¹ Díi Lawa lɛ bɛ́ wɔ narɛ á la yii-n lɔn, ka ga bɛ ganaa! Maǹ wɔ bíi Lawa a nɛnyaanan. Taãn nɛ, wɔ n Lawa a nɛnyaanan dɔn lɛa sonbore. Bɛ lɛ n ke, kanaa kɛ a wɔ doɛ̃ wa, a giala, mà a Lawa dɔ̃ wa.

²Maa giaáran lɛn, wɔ n Lawa a nɛnyaanan lɛa gɔrɔ. Wɔ bɛ́ re màn mɛn biɛ, wɔ tɔn bɛa foaãbaa yɛ bɔrɔ wa. Bɛ tun kio, wɔ á doɛ̃ wáa bɛ̀ *Krita daa biikoo mɛn li, wɔ n die kɔnboe ka a din ni, wɔ ǹ die yii, ka a bɛ́ lɔn.

³Bɛa foo-doa kɛ miã bɛ́ min mɛn nɛ Krita a lɛa, bɛ nə n din *yoreen koe, ka Krita bɛ́ yoreen lɔn.

⁴Min mɛn bɛ́ sii baraa zɛnɛɛ, a n Lawa a landa lɛ tii, a giala, sii baraa n landa lɛ tii ǹ sii lɛa.

⁵ Sɛnɛ, ka á doɛ̃, mà Krita na á daa minbuiinin sii baraan bɔ ǹ ganaa, sii baraa kɔ́n ná a ba a din li wa.

⁶Bɛa yɔrɔ kɛ la, bɛ̀ min mɛn tá kun ka Krita nɛ, bɛ n sii baraa zɛnaa toɛ walan duduu. Bɛ̀ min mɛn tá tɔn sii baraa zɛnɛɛ woe ne, bɛa dɛnaa ba yii wa, a doɛ̃ dɔn ma.

⁷Maa nɛnyaanan lɛn, ka baran toa min kɔ́n ka yiri sã wa. N mɛn bɛ́ sii pepere zɛnɛɛ, n dinmaa dɔ n pepere ka Krita bɛ́ pepere lɔn.

⁸N mɛn bɛ́ n tɔn sii baraa zɛnaa lɛ da wa, ma n *Sɛtaan wɔ lɛa. A giala, a saa giala-kɔ waáraa ganaa, Sɛtaan na á sii baraa zɛnaa. Lawa a Nɛgiĩ na á daa bɛ lɛ a lɛa, mà a Sɛtaan a nya ǹ dín ziziɛ̃.

⁹Min mɛn bɛ́ Lawa a nɛ lɛa, bɛ sii baraa zɛnaa lɛ da, a giala yiikoonaabaa ǹ pàã mɛn bɛ́ boe Lawa li, bɛ tá a nɛ. A bɛ́ n Lawa a nɛ lɛa, a boe la a sii baraa zɛnaa a wo-n ma.

¹⁰Màn mɛn bɛ́ Lawa a nɛnyaanan laanka Sɛtaan a nɛnyaanan boe kɔn lɛ panparaanɛ, bɛ á ke: Min mɛn bɛ́ a ba sii pepere zɛnɛɛ wa, a ná a ba ǹ dɔɔ̃n narɛ wa, bɛ bie Lawa a nɛ lɛa wa.

¹¹ Ka dí-pɛ mɛn boo ma, a saa giala-kɔ waáraa ganaa, bɛ n ka wɔa kɔn-narɛɛ nɛ.

¹² Kanyɛ mɛn bɛ́ á goã Sɛtaan Baraa kɛ wɔ lɛa, wɔ doamaa bie wɔ goã ka bɛ bɛ́ lɔn wa. Asɛ lɛ na á ǹ diɛ̃ dɛ á gã. A na á ǹ diɛ̃ lɛ dɛ wàa mɛn a lɛa? A giala, a din a nya ǹ dín nə́ goã babaraa, ǹ diɛ̃ lɛ wɔn nə́ pepere.

¹³Bɛ̀ ka tìĩ á boe-n kanaa kɛ a minin nyin ni, bɛ baran ka tɔwaa wa, ma dɔɔ̃nɔn lɛn.

¹⁴ Wɔ á doɛ̃, wáa wɔ́ n bɔ gɛ̀ nɛ, wɔ́ wɔ yiikoonaabaa nɛ. Wɔ ǹ bɛ doɛ̃, a giala, mà wɔ n wɔ dɔɔ̃nɔn narɛ. Min mɛn bɛ́ a min narɛ wa, bɛ n tɔn gɛ̀ gɔ́ɔ̃ nɛ.

¹⁵Bɛ̀ min mɛn dɔɔ̃n tìĩ á boe-n a nyin ni, bɛ n gɛ̀-dɛle lɛa. Ka á doɛ̃ dɔn, mà nyin nyabaã ba gɛ̀-dɛle kɔ́n lon ma.

¹⁶Kɔn-narɛɛ bɛ́ màn mɛn lɛa, wɔ ǹ doɛ̃ kɛ lɛ li: Krita na á n din nyin kɔ wɔa lɛa. Wɔ dɔn doamaa nɛ wɔ n nyin kɔ wɔ dɔɔ̃nɔn lɛa.

¹⁷Bɛ̀ min pàãma goon yii nə ǹ dɔɔ̃n ganaa laadoo-dɛnaa lɛa, a nə́ n tiɛ̃ a ganaa a din gɔ́ɔ̃ nɛ, a n siɛ lɔn a pɛ mà Lawa narɛɛ tá asɛ foo ne?

¹⁸Maa nɛnyaanan lɛn, a kɔnboe wɔa kɔn-narɛɛ lɛ goã lɛ gɔ́ɔ̃ ǹ boon dininsɔɔ̃nɔn lɛa wa, a n siĩni, a goã kɔn-narɛɛ taãn lɛa, n nyɛɛ ka sii-zɛnaan nɛ.

¹⁹Wɔ ǹ die doɛ̃ kɛ li, wáa wɔ ǹ sonbore wɔn lɛa, wɔ foo dɔ boo la a goã doa-n Lawa yɔrɔ-a.

²⁰Taãn nɛ, bɛ̀ wɔ gɔ́ɔ̃ á wɔ zɛ̀rɛ biɛ, wɔ á doɛ̃ wáa Lawa á gole á la wɔ gɔ́ɔ̃gɔ́ɔ̃ ǹ wɔ kɛ nɛ, wáa á màn tumaa dɔ doɛ̃.

²¹A n miɛ̃, maa giaáran lɛn, bɛ̀ wɔ gɔ́ɔ̃ a wɔ zɛ̀rɛ biɛ wa, wɔ ǹ doɛ̃ wáa foo-doa gole tá wɔ nɛ Lawa yɔrɔ-a.

²²Wɔ bɛ́ màn mɛn nyankoe la, wɔ n bɛ yii. A giala, mà wɔ tá a dí-pɛn lɛ sii, wɔ ná a foo kɔɔ̃n kɔ ǹ sii zɛnɛɛ.

²³ A bɛ́ màn mɛn pii wɔ-n dí lɛa, bɛ á ke: Wɔ golee a Nɛgiĩ Yezu Krita tɔ li, wɔ kɔn narɛ, ka Krita bɛ́ á pɛ wɔ-n dí lɛa lɔn.

²⁴Min mɛn bɛ́ Lawa a dí-pɛn lɛ sii, bɛa dɛnaa n goɛ̃ kun ka Lawa nɛ, Lawa n goɛ̃ kun ka a dɔ nɛ. Màn mɛn bɛ́ toɛ wɔ dɔ̃, mà Lawa tá kun wɔ nɛ, a bɛ́ á n din Yiri mɛn kɔ wɔ la, bɛ lɛ a lɛa nɛ.