Read Samo, Southern SYB 10 Bible Online

SYB 10 - Samo, Southern bible

SYB 10

¹Abimelɛki a gɛ̀ kio, Tolaa mɛn bɛ́ Puwa a nɛgiĩ lɛa, bɛ́ yoo á Izirayeli minin lɛn si ǹ zɔ́ɔn la. Dodoo a nɔ̀ɔn nə ka Tolaa nɛ, Isakaara tɔrɔ nɛ. A na á goã giã-n Samiiri kiwi, Efrayimu gána a kele yii bǎã kɛ nɛ.

²Á Izirayeli minin lɛn sii yɔrɔ bɔ lɛ̀ fuəwensɔɔ gɔ́ɔ̃ nɛ. Bɛ kio, á gã, ǹ ná a gere bĩ Samiiri kiwi.

³Tolaa kio na á n baa Galaati tɔrɔ Zayiiri lɛa. Bɛ na á Izirayeli minin lɛn sii yɔrɔ bɔ lɛ̀ fuəwenpaa gɔ́ɔ̃ nɛ.

⁴Nɛgiĩ pɔsɔɔ na á goã a lon, ǹ nə́ goã bɛ̀ ǹ dii dundun pɔsɔɔ la. Kiwi dadara pɔsɔɔ dɔ na á goã ǹ lon. Haalɛ tɔn pelo, maǹ tɔn bɛa bǎãn lɛn bíi mà "Zayiiri a kiwin", Galaati gána nɛ.

⁵Zayiiri dɔ́ gã, ǹ na a gere bĩ Kamɔn kiwi.

⁶Sii mɛn bɛ́ baraa Dɛnaa Lawa yii li, Izirayeli minin lɛn nə́ wusoo, ǹ ná a giala kɔ, ǹ nə́ bɛ zɛnaa. Ǹ nə́ dí nya dìn manɛ: Bɛn man ka *Baali laanka *Asitartee ne. Ǹ nə́ tɔrɔ kɔsɔn lawan guguru kɔ: Aramu minin wɔn manɛ, Sidɔn minin wɔn nɛ, Moabu tɔrɔn wɔn nɛ, Amɔn tɔrɔn wɔn nɛ ka Filisiti minin wɔn nɛ.

⁷Ǹ nə́ Dɛnaa Lawa din toa walan, ǹ dí nya nɛ doo wa. Bɛ lɛ nɛ, Dɛnaa Lawa foo yoo Izirayeli minin lɛn li, á tɔ́n nə ǹ wɔ Filisiti minin laanka Amɔn tɔrɔn lɛn gɔn.

⁸Bɛa lɛ̀ kɛ lɛ-a, bɛn nə́ bɔ Izirayeli minin lɛn yii ni, ǹ nə́ fuu nyaa ǹ nɛ. Izirayeli minin mɛnɛn tumaa goã Zurdɛ̃ tà kio, Amɔɔrɔ tɔrɔn gána kɛ nɛ Galaati, ǹ nə́ bɔ bɛn dɔn yii ni, lɛ̀ fulukiwisi gɔ́ɔ̃ nɛ.

⁹Amɔn tɔrɔn dɔn nə́ Zurdɛ̃ tà kuru, ǹ nə́ woo zia baa Zudaa laanka Bɛnzamɛn tɔrɔn ganaa, ka Efrayimu tɔrɔn nɛ. Á nɔmaa gole baa Izirayeli minin lɛn ganaa.

¹⁰Bɛ lɛ nɛ, ǹ nə́ n lɛ dɛ Dɛnaa Lawa ganaa, bɛ̀ ǹ tá pii: «Wɔsɛn man wɔ sii baraa zɛnaa n din ni, a giala, wɔ Lawa toa walan, wɔ́ dí nya Baalin manɛ.»

¹¹Dɛnaa Lawa tɔ́n pɛ Izirayeli minin lɛn manɛ: «Ezipti minin ni, Amɔɔrɔ laanka Amɔn tɔrɔn nɛ, Filisiti laanka

¹²Sidɔn minin ni, Amalɛki tɔrɔn laanka Mawɔ̃ minin ni, bɛn bɛ́ ǹ nə́ goã boe ka yii ni, ka bɛ́ ka n lɛ dɛ ma ganaa, ma ka si bɛn la wa?

¹³Sɛnɛ, ka bɛ́ ka masɛ toa walan, ka dí nya lawa kɔsɔn manɛ, bɛ lɛ na á toa, ma a re wusii ma ka kirisibaa doo wa.

¹⁴Ka lawan mɛnɛn bɔ ke lɛn, ka woo ka n lɛ dɛ bɛn lɛn ganaa. Bɛn lɛn doamaa nɛ, ǹ ka waa, ǹ ka bɔ kaa nɔmaa lɛ gɔ́ɔ̃ nɛ.»

¹⁵Izirayeli minin lɛn nə́ pɛ Dɛnaa Lawa nɛ: «Wɔsɛn nə́ sii babaraa zɛnaa. Sii mɛn tumaa bɛ́ kɔɔ̃nɛ n ganaa, bɛ zɛnaa wɔsɛn manɛ. Sɛnɛ, sabara baa, n wɔsɛn bɔ kɛ-n pelo.»

¹⁶Tɔrɔ kɔsɔn lawan kɛn, ǹ nə́ bɛn goa ǹ nə́ ǹ bɔ ǹ dinin li, ǹ nə́ dí nya Dɛnaa Lawa nɛ. Izirayeli minin nə goã nɔmaa mɛn we, Dɛnaa Lawa boo la á bɛ si a ganaa doo á belebɔ-n wa.

¹⁷Amɔn tɔrɔn nə́ n lɛ sɔkɔn, ǹ nə́ woo n doa Galaati gána nɛ. Izirayeli minin sɛn nə́ n lɛ sɔkɔn, ǹ nə́ woo n doa Mispaa kiwi.

¹⁸Galaati gána a minin laanka a nyɛɛnaandɛnan nə́ pɛ kɔn nɛ: «Die n die woe Amɔn tɔrɔn lɛn gialaa, a zia lɛ giala kɔ? Bɛ̀ min mɛn bɛ zɛnaa, bɛa dɛnaa á re Galaati gána minin lɛn tumaa a nyɛɛnaandɛnaa biɛ.»