Read Samo, Southern SYB 11 Bible Online

SYB 11 - Samo, Southern bible

SYB 11

¹Bɛ á zɛnɛɛ, bɛ̀ giĩ goon tá Galaati gána nɛ, zia-baali zanbia lɛa, a tɔ n Zɛftee. A na á goã lɔ kɔrɔ kɔn a nɛgiĩ lɛa, a díi tɔ n Galaati.

²Galaati a lɔ mɛn bɛ́ a gòã li, bɛ dɔ́ nɛgiĩn yɛ nɛ. Bɛa lɔ lɛ a nɛnyaanan bɛ́ ǹ nə́ dadara kɔ, ǹ nə́ Zɛftee loo ka kɛa bɔlɔ kɛ nɛ: «Wɔsɛn di kion kíɛ̃ ke, n wɔ gii ba bɛ-n wa. A giala, n nə ǹ lɔ kɔsɔ a nɛ lɛa.»

³Zɛftee nɔmaa á baa si, á n wɔlɔ lui ǹ dɔɔ̃nɔn lɛn ganaa, á woo giã Tɔbu gána nɛ. Min kooron kɔnɔn nə́ woo kaa kun ka Zɛftee ne. Bɛ̀ á soe woe bǎã nɛ, bɛn lɛn man nə́ goã soe kun ni.

⁴Bɛa sii lɛ a kiɛ̃ kio, a belebɔ wa, Amɔn tɔrɔn nə́ zia yoo Izirayeli minin ganaa.

⁵Amɔn tɔrɔn lɛn bɛ́ zia biɛ Izirayeli minin lɛn ganaa, Galaati gána a min golen nə́ woo Zɛftee kio Tɔbu gána nɛ.

⁶Ǹ nə́ pɛ nɛ mà a da giã ǹsɛn zia-baalin lɛn mìi la, ǹ tɔn boo la ǹ zia baa Amɔn tɔrɔn lɛn ganaa.

⁷Zɛftee tɔ́n pɛ Galaati a min golen lɛn manɛ: «Ka dinin bie ka masɛ baa zɔ́ɔ, ka ma loo ká ma bɔ ma di kion wa ya? Ka bɛ́ nɔmaa nɛ sisia, wàa na á baa ka tá die ma li?»

⁸Galaati a min golen nə́ pɛ Zɛftee ne: «Bɛ̀ ń yaa wɔsɛn nə́ daa n li kanna, wɔ n giɛ li n da kun ka wɔ nɛ, n zia baa Amɔn tɔrɔn kɛn ganaa, n wɔsɛn mìilandɛnaa baa, n Galaati minin lɛn tumaa dɔ wɔ baa.»

⁹Zɛftee pɛ Galaati a min golen lɛn manɛ: «Bɛ̀ ka woo ka masɛ nɛ, mà masɛ zia baa Amɔn tɔrɔn kɛn-a, bɛ̀ Dɛnaa Lawa nə́ ǹ wɔ masɛ gɔn, masɛ din nə die ka mìilandɛnaa biɛ.»

¹⁰Galaati a min golen lɛn nə́ pɛ Zɛftee ne: «Bɛ̀ wɔ zɛnaa ka n bɛ́ ke ń pɛ lɔn wa, Dɛnaa Lawa n siére lɛa wɔ bii.»

¹¹Zɛftee woo kun ka Galaati a min golen lɛn nɛ. Zaman lɛ koa ǹ mìi la ǹ goledɛnaa lɛa, zia-baalin dɔn mìilandɛnaa lɛa. Zɛftee wusoo á timəə bɛa boon lɛn tumaa la Dɛnaa Lawa yɔrɔ-a Mispaa kiwi.

¹²Bɛ kio, Zɛftee minin dia Amɔn tɔrɔn lɛn kii li, mà ǹ pɛ nɛ: — Wàa mɛn sii n wɔsɛn bii, ń nə́ yui die masɛ gialaa, n nə́ die zia biɛ maa gána ganaa?

¹³Amɔn tɔrɔn kii lɛ pɛ Zɛftee a dia dí-a wolen lɛn manɛ: — A giala, Izirayeli minin lɛn bɛ́ boe Ezipti die, maǹ nə́ maa gána si ma la, a saa Arnɔn tà ganaa, yǎa Yabɔki kiwi, a wo yǎa Zurdɛ̃ tà lɛ-a. Kanna kəni, wusoo n kɔ ma la ka là nyantoro ne.

¹⁴Zɛftee wusoo á minin dia Amɔn tɔrɔn kii lɛ la,

¹⁵mà ǹ pɛ nɛ: «Izirayeli minin lɛn bie ǹ nə́ Moabu gána si wa, ǹ bie ǹ nə́ Amɔn tɔrɔn dɔn gána si wa.

¹⁶Sonbore, Izirayeli minin lɛn bɛ́ ǹ nə́ soo Ezipti gána nɛ, maǹ nə́ don bii wɔsɔ, yǎa Sawɛɛ tà lɛ-a, ǹ nə́ daa Kadɛsi kiwi.

¹⁷ Ǹ nə́ n toa walan, ǹ nə́ minin dia Edɔmu minin kii la, ǹ nə́ pɛ nɛ mà a bǐɛ̃ kɔ, a toa ǹsɛn nə da bɔ a gána nɛ ǹ kiɛ̃. Sɛnɛ, Edɔmun kii nə n too kɔ ǹ lon wa. Ǹ nə́ minin dia Moabun kii dɔ la ka a din boo goon lɛ nɛ. Sɛnɛ, bɛ dɔ lɛ kɔ wa. Izirayeli minin nə́ nɔmaa ǹ nə́ goã Kadɛsi.

¹⁸ Bɛ kio, ǹ nə́ wusoo ǹ nə́ tɔ wɔ don gɔ́ɔ̃ nɛ, ǹ nə́ Edɔmu laanka Moabu gána lɛ bɔ ǹ nə́ da, ǹ nə́ bɔ Moabu gána a lɛ̀giala gɔn la. Ǹ nə́ golee Arnɔn tà kio bɔrɔ, ǹ wɔ Moabu gána-n wa. A giala, Arnɔn lɛ din nə Moabu gèlè lɛa.

¹⁹ Izirayeli minin lɛn nə́ n toa walan, ǹ nə́ minin dia Amɔɔrɔ tɔrɔn kii Sihɔn kɛ la giã-n Ɛsibɔn kiwi. Izirayeli minin lɛn nə́ pɛ nɛ mà a bǐɛ̃ kɔ a toa ǹsɛn nə bɔ a gána nɛ, ǹ wo yǎa ǹ woo ǹ bǎã nɛ.

²⁰Sɛnɛ, Sihɔn waa Izirayeli minin lɛn la wa, á n piã, mà ǹ baran asɛ a gána bii wɔsɔ ǹ kiɛ̃ wa. Á ná a minin tumaa sɔkɔn, ǹ nə́ woo n doa Zaasaa kiwi, ǹ nə́ zia baa Izirayeli minin lɛn ganaa.

²¹Dɛnaa Lawa lɛ, Izirayeli minin Lawa lɛa, á Sihɔn laanka a zaman tumaa wɔ Izirayeli minin lɛn gɔn, ǹ nə́ ǹ dɛ. Amɔɔrɔ tɔrɔn mɛnɛn nə goã giã-n gána lɛ nɛ, Izirayeli minin nə́ ǹ bǎãn tumaa si ǹ la, ǹ nə́ baa ǹ wɔ lɛa.

²²Ǹ nə́ Amɔɔrɔ minin bǎã lɛ tumaa si, ǹ nə́ baa ǹ wɔ lɛa: A saa Arnɔn tà lɛ-a ganaa, yǎa Yabɔki tà lɛ-a, a saa lɛ̀giala don kɛ ganaa, yǎa Zurdɛ̃ tà lɛ-a.

²³Dɛnaa Lawa lɛ, Izirayeli minin Lawa lɛa, bɛ bɛ́ á Amɔɔrɔ minin gána lɛ si á kɔ wɔsɛn la, n dɔ Sihɔn nə giɛ li kanna kəni n si wɔsɛn la?

²⁴N lawa Kemɔɔsi kɛ bɛ́ á màn mɛn kɔ n la, bɛ ba n gɔn wa? Dɛnaa Lawa mɛn bɛ́ wɔsɛn Lawa lɛa, bɛ̀ bɛ́ màn mɛn tumaa kɔ wɔsɛn la, bɛa goɛ̃ wɔsɛn gɔn wa?

²⁵ A bɛ́ miɛ̃ dinin, nsɛ n soɛ Moabun kii Sipɔrɔ a nɛgiĩ Balaaki ni? A Izirayeli minin lɛn bobo wa, a zia dɔ baa ǹ ganaa wa.

²⁶A lɛ̀ biɛsɔɔ (300) n ke, Izirayeli minin lɛn nə́ giã-n Ɛsibɔn ka a lɛ-a ǹ kiwin ni, kɛn nə́ giã-n Aroɛɛrɛ ka a lɛ-a ǹ kiwin ni, kɛn nə́ giã-n kiwi dadaran kɛn tumaa nɛ, Arnɔn tà lɛkoro-a. Wàa na á baa, ǹ kiwin lɛn si ǹ la bɛa waáraa kɛ lɛ-n wa?

²⁷Ma á ke, ma sii baraa zɛnaa wa. N din nə sii baraa zɛnɛɛ masɛ nɛ, n nə́ zia biɛ masɛ ganaa. Dɛnaa Lawa mɛn bɛ́ kiri kuri, bɛ die a kɛ yɔrɔ bɔ Izirayeli tɔrɔn lɛn laanka Amɔn tɔrɔn kɛn bii pelo.»

²⁸Sɛnɛ, Zɛftee boon mɛnɛn dia Amɔn tɔrɔn kii lɛ la, a ǹ baa boo lɛa wa.

²⁹Dɛnaa Lawa yiri gisĩ Zɛftee la. Á bɔ Galaati gána nɛ, á woo Manaasee tɔrɔn gána nɛ. Bɛ kio, á woo bɔ Mispee kiwi, Galaati gána nɛ, á n toa walan, á woo Amɔn tɔrɔn lɛn gialaa.

³⁰Zɛftee nə́ n lɛ kɔ Dɛnaa Lawa la á pɛ: «Bɛ̀ ń Amɔn tɔrɔn kɛn wɔ ma gɔn sonbore,

³¹bɛ̀ masɛ nə n bɔyaa ka là nyantoro ne Amɔn tɔrɔn kɛn li má daa, màn bibinaa mɛn bɛ́ re soe maa kion, a da n da masɛ lɛ, bɛ á re Dɛnaa Lawa wɔ biɛ. Ma á re bɛ koe la a wɔ lɛa duduu.

³²Zɛftee kiɛ̃ á wɔ Amɔn tɔrɔn lɛn gána nɛ, á zia baa ǹ ganaa. Dɛnaa Lawa nə́ ǹ wɔ a gɔn.»

³³Á ǹ dɛ taãn-taãnɛ, á saa Aroɛɛrɛ kiwi ganaa, á woo yǎa Miniti kiwi li, á saa walan dɔ ganaa, yǎa Abeli-Karamimu: Kiwi dadara fuə. Á basaã gole baa. A kũ bɛ lɛ ganaa lɔn, Amɔn tɔrɔn lɛn wɔ na á goã Izirayeli minin wɔ gɔ́ɔ̃ nɛ.

³⁴Zɛftee bɛ́ boe Mispaa die piɛ, bɛ̀ a nɛlɔ á ke á soo a n maà dii, bɛ̀ biɛ, die n diɛ lɛ. A din lɛ dɔ na a nɛ lɛa, goon toto. Bɛ̀ á n bɔ bɛ lɛ nɛ, a ba a lon nɛgiĩ lɛa wa, a ba a lon nɛlɔ lɛa wa.

³⁵ Zɛftee bɛ́ á yɛ lɔn gɔrɔ, foo ziziɛ̃ gɔn, á ná a mɔnaa kũ á toɛ̃ á pɛ: «E, maa nɛlɔ, ma n die masɛ diɛ foo ziziɛ̃ li. Masɛ a koe bɔmaa wolen lɛn goon nə ka n din ni. Ma lɛ na á má da sii ni Dɛnaa Lawa yɔrɔ-a, ma a boe la ma wusoo ka ma kio-n doɛ̃ wa.»

³⁶A nɛlɔ lɛ tɔ́n pɛ nɛ: Maa díi, n lɛ na á n din da sii mɛn nɛ Dɛnaa Lawa yɔrɔ-a, boo mɛn soo n lɛ-n, a zɛnaa masɛ nɛ a kɔnpɛ ka bɛ nɛ. A giala, Dɛnaa Lawa nə́ n dɔ n lɛ, n nə́ n gɛ̀ dòo bɔ n zɔ́ɔ Amɔn tɔrɔn lɛn ganaa.

³⁷Bɛ kio, á pɛ ǹ di lɛ nɛ: — Kɛ dinsɔɔ̃ a lɛ kɔ masɛ la: «Bǐɛ̃ kɔ n toa ma wo n bibiə̃ tentenen la kun ka ma miãlɛn nɛ, mui paa gɔ́ɔ̃ nɛ, ma maa gã giɔmɔsɔ̃ lɛa kɛa wuu pɛ.»

³⁸Zɛftee tɔ́n pɛ nɛ: «Woo.» Á dia á woo mui paa lɛ zɛnaa. Á woo kun ka ǹ miãlɛn nɛ, á ná a gã giɔmɔsɔ̃ lɛa lɛ a wuu pɛ tentenen la.

³⁹Mui paa lɛ lɛ bɛ́ á pã, á n bɔyaa á daa a díi li. A díi lɛ-kɔ mɛn wɔ, á kũ á bɛ lɛ pã nɛ. Bɛ á zɛnɛɛ, bɛ̀ a tɔn giĩ dɔ̃ wa. Bɛ lɛ na á nɔmaa á landa baa Izirayeli gána nɛ.

⁴⁰Lɛ̀ woo lɛ̀, Izirayeli nɛlɔn man woe Galaatin giĩ Zɛftee a nɛlɔ a sii lɛ a landa zɛnɛɛ, lɛawaa sii lɛ̀ goon gɔ́ɔ̃ nɛ.