Read Samo, Southern SYB 12 Bible Online

SYB 12 - Samo, Southern bible

SYB 12

¹Efrayimu minin nə n sɔkɔn, ǹ nə́ Zurdɛ̃ tà kuru ǹ nə́ woo Safɔn, ǹ nə́ pɛ Zɛftee ne: «Wàa na á baa, n nə́ kiɛ̃ woe zia biɛ Amɔn tɔrɔn ganaa, n nə n ba lɛ diɛ wɔsɛn la wɔ wo kunun n ni wa? N kion ke, wɔ á re tɛ diɛ bɛ ganaa, kɔnlɛ ka n din ni.»

²Zɛftee tɔ́n pɛ ǹ nɛ: «Man má goã zia gole la, kɔn ka Amɔn tɔrɔn lɛn nɛ, ma laanka maa minin ni. Ma bɛ́ má lɛ dia ka la, ka bɛ́ ka da ma si ǹ la wa.

³Ma bɛ́ má yɛ, máa ka a re die ma sii ǹ la wa, bɛ lɛ nɛ, ma gɛ̀ laanka nyuù kaa kun, má woo Amɔn tɔrɔn lɛn gialaa. Dɛnaa Lawa nə́ ǹ wɔ ma gɔn. Wàa na á baa, ka tá yui die zia biɛ masɛ ganaa pelo?»

⁴Zɛftee Galaati minin tumaa sɔkɔn, á zia baa Efrayimu minin lɛn ganaa. Galaati minin nə́ Efrayimu minin lɛn dɛ. A giala, maǹ nə́ goã ǹ nə́ pɛ: «Kasɛn Galaati minin kɛn lɛn, ka ǹ Efrayimu minin lɛa, ka baa si ka n bɔ Efrayimu tɔrɔn bii, ka woo giã Manaasee tɔrɔn bii.»

⁵Galaati minin lɛn nə́ Zurdɛ̃ tà kɛa kuru ǹ bǎã kɔn si ǹ nə́ n kɔ lɛ, dia-n woe Efrayimu din la. Bɛ̀ Efrayimu min lɛ mɛn baa si á dɔ walan á pɛ mà ǹ toa asɛ kiɛ̃, Galaati minin lɛn man nə́ goã nɔ̀n diɛ la: «Ma n Efrayimu min lɛa?» Bɛ̀ á pɛ mà haayii,

⁶maǹ nə́ goã pii ni: — Bɛ̀ á miɛ̃, a pɛ mà «Siibolɛti.» Bɛ na á goã pii mà «Siebolɛti.» A giala, a goã boe la á pii ka a bɛ́ lɔn wa. Galaati minin lɛn man nɔmiɛ̃ ǹ bɛ kũ, ǹ na a bɔlɔ kuru Zurdɛ̃ tà kɛa kuru ǹ bǎã nɛ. Efrayimu min lɛ a duu pusiwenpaa na á gã bɛa waáraa kɛ lɛ nɛ.

⁷Zɛftee na á Izirayeli minin lɛn sii yɔrɔ-bɔle baa lɛ̀ sɔrɔ gɔ́ɔ̃ nɛ. Bɛ kio, Galaatin giĩ Zɛftee gã, ǹ ná a gere bĩ Galaati gána a kiwi goon ne.

⁸Zɛftee kio, Bɛtlehɛmun giĩ Ibsan na á Izirayeli minin lɛn sii yɔrɔ bɔ.

⁹Nɛgiĩ pɔsɔɔ laanka nɛlɔ pɔsɔɔ na á goã a lon. A nɛlɔn kɛn, á bɛn kɔ Izirayeli tɔrɔ kɔsɔn la. Á Izirayeli tɔrɔ kɔsɔn nɛlɔn wɔ, á ǹ kɔ a nɛgiĩn lɛn la. Á Izirayeli minin lɛn sii yɔrɔ bɔ lɛ̀ sɔbaa gɔ́ɔ̃ nɛ.

¹⁰Bɛ kio, Ibsan gã ǹ ná a gere bĩ Bɛtlehɛmu.

¹¹Ibsan kio, Zabulɔn tɔrɔ Elɔn na á Izirayeli minin lɛn sii yɔrɔ bɔ, lɛ̀ fù gɔ́ɔ̃ nɛ.

¹²Bɛ kio, Zabulɔn tɔrɔ Elɔn gã, ǹ ná a gere bĩ Azalɔn, Zabulɔn gána nɛ.

¹³Elɔn kio, Ilɛli ke Piiratɔn kiwi, bɛa nɛgiĩ Abdɔn na á Izirayeli minin lɛn sii yɔrɔ bɔ.

¹⁴Nɛgiĩ pusi na á goã a lon. A nɔ̀ɔnɔn man nə́ goã min pɔsɔɔ, bɛn nə́ goã dii dundun pɔsɔbaa la. Á Izirayeli minin lɛn sii yɔrɔ bɔ lɛ̀ kiwisi gɔ́ɔ̃ nɛ.

¹⁵Bɛ kio, Piiratɔnɔn giĩ Ilɛli a nɛgiĩ Abdɔn gã. Ǹ ná a gere bĩ Piiratɔn kiwi, Efrayimu gána nɛ, Amalɛki tɔrɔn kele la.