Read Samo, Southern SYB 15 Bible Online

SYB 15 - Samo, Southern bible

SYB 15

¹Biikoo kɔn a kiɛ̃ kio, *belee kurii waáraa[9], Sansɔn woo n yii kɔ a lɔ lɛ ganaa ka bòe banɛɛ goon ne, á pɛ: «Man giɛ li, ma wɔ maa lɔ lɛ li a waa ǹ kion.» Sɛnɛ, a lɔ lɛ a díi lɛ kɔ mà a wɔ wa.

²Á pɛ Sansɔn nɛ: «Man má taasɛ, máa a tìĩ na á bɔ n nyin ni. Bɛ lɛ nɛ, má kɔ n kɔn-wɔ lɛ a siére la. Sɛnɛ, ǹ diɛ̃ nɛlɔ kɛa soɛ nɛ wa? Bɛ saa kɛ lɛ sɛ bǎã-n kəni.»

³Sansɔn tɔ́n pɛ: «Filisiti minin kɛn giɔ̀mɔ ba ma-a doo wa. Man die sii baraa zɛnɛɛ ǹ nɛ.»

⁴Sansɔn woo, á toloka biɛ sɔɔ kũ, á ǹ muin yii kɔn papaa, á buu yii ǹ biin ni.

⁵Bɛ kio, á tɛ da buun lɛn ganaa, á n gɔn bɔ tolokan lɛn ganaa, á ǹ kaa Filisiti minin belee wurun ni. Belee mɛn bɛ́ ǹ nə́ kuru ǹ nə́ kaa tán, ǹ mɛn bɛ́ a gòãn la, *rezɛ̃ dan laanka *olivie dan nɛ, á tɛ da bɛn tumaa ganaa.

⁶Filisiti minin nə́ nɔ̀n da, mà die na á kɛ zɛnaa? Ǹ nə́ pɛ ǹ nɛ mà Sansɔn nɛ, Timnaan giĩ kɛ daãgiĩ ke. A giala, a na á Sansɔn a lɔ lɛ si la, á kɔ tɔntɔraa kɔsɔ la, ǹ mɛn bɛ́ á ná a kɔn-wɔ a siére baa. Filisiti minin lɛn nə́ woo, ǹ nə́ tɛ da bɛa lɔ lɛ ganaa, kun ka a díi ni.

⁷Sansɔn tɔ́n pɛ ǹ nɛ: «Ka bɛ́ ka zɛnaa kɛnɛn, yǎa masɛ na a gɛ̀ dòo boe ka ganaa, ma tɔn nə n susui.»

⁸Á ǹ dɛ lenlen, á bɔ̀n gole da ǹ ganaa. Bɛ kio, á woo giã Etamu kiwi a kele yala kɛ nɛ.

⁹Filisiti minin nə́ woo golee Zudaa gána nɛ bɔrɔ, ǹ nə́ n gɔn lɛ bɔ, ǹ nə́ woo Leyii kiwi gialaa.

¹⁰Zudaa minin nə́ nɔ̀n da ǹ la kɛnɛn: «Wàa na á baa, ka daa wɔsɛn gialaa?» Filisiti minin nə́ ǹ lɛ si: «Wɔ n wɔ́ daa Sansɔn kũ wɔ yii, màn mɛn bɛ́ toɛ, a sii mɛn zɛnaa wɔsɛn manɛ, wɔ bɛ miã zɛnaa a dɔ nɛ.»

¹¹Zudaa minin lɛn giĩ duu sɔɔ woo Etamu a kele yala lɛ lɛ-a, ǹ nə́ pɛ Sansɔn nɛ: «N ba doɛ̃ mà Filisiti minin lɛn man wɔ mìi la wa? Wàa mɛn sii n ka kɛ nɛ, ń zɛnaa wɔsɛn manɛ?» Sansɔn tɔ́n pɛ ǹ nɛ: «Ǹ sii mɛn zɛnaa ma nɛ, ma dɔ má bɛ lɛ miã zɛnaa ǹ dɔn manɛ.»

¹²Ǹ nə́ pɛ Sansɔn nɛ: «Wɔ n wɔ́ daa n kũ wɔ nə́ n yii, wɔ n die n koe Filisiti minin lɛn la.» Sansɔn tɔ́n pɛ ǹ nɛ: «Ka n liɛ, mà ka dininmaan ba re ma dii wa.»

¹³Ǹ nə́ pɛ Sansɔn nɛ: «Haayii dɛ! Wɔsɛn man giɛ li wɔ n yii kooro, wɔ n kɔ Filisiti minin lɛn la, wɔ bie giɛ li wɔ n dɛ wa.» Ǹ nə́ yii ka biɛ dii màn paa nɛ, ǹ nə́ bɔ kele yala lɛ nɛ, ǹ nə́ soo ne.

¹⁴A bɛ́ á dɔ Leyii kiwi, Filisiti minin lɛn nə́ daa n da lɛ ka lɛ-dɛ nɛ. Sɛnɛ, Dɛnaa Lawa Yiri wɔ Sansɔn nɛ. Bɛ lɛ nɛ, ǹ na a gɔnɔn yii ka biɛn mɛnɛn nɛ, bɛn nə́ n bɔyaa ǹ nə́ n baa ka baasan biɛ mɛn bɛ́ tɛ kũ. A biɛn lɛn nə́ kaa, ǹ nə́ n bɔ a gɔnɔn ganaa.

¹⁵Dundun mɛn bɛ́, a dɛ ná a tɔn belebɔ wa, Sansɔn bɛ pàãgɔn we yɛ tán. Á n gɔn dia á saa, á giĩ duu goon (1 000) dɛ nɛ.

¹⁶Sansɔn tɔ́n pɛ: Má ǹ dɛ má ǹ kaa kɔn la ka dundun pàãgɔn we ne, má giĩ duu goon dɛ ka dundun pàãgɔn we ne.

¹⁷A bɛ́ á boo da á nya, á dundun pàãgɔn we lɛ zũ sɔsɔɔ. Bɛ lɛ nɛ, ǹ nə́ bɛa bǎã lɛ bíi mà "Ramati-Leyii"[10].

¹⁸Mu boro bɛ́ á goã a ganaa á la yii ni, á Dɛnaa Lawa bíi wɔ bɛ̀ á n pii: «N din ni n dɔ n dí-nyali lɛ, ń gɔ̀lɔ̀baa gole kɛ kɔ wɔsɛn la. Kanna, n nə n die toɛ mu boro ma dɛ, soroman kɛn gɔn dɔ ma ganaa?»

¹⁹Gɛ̀fu mɛn lɛ á ke Leyii, Lawa tɔ́n bɛ lɛ yu kɔn, mu soo a nɛ. Sansɔn mi a yii dɔraa, a gù wusoo á kaa. Bɛ lɛ nɛ, ǹ nə́ bɛa bǎã lɛ bíi mà "Ɛn-Akooree"[11]. A tá Leyii, haalɛ tɔn pelo.

²⁰Sansɔn Izirayeli minin lɛn sii yɔrɔ bɔ Filisiti minin wasa lɛ nɛ, lɛ̀ fuə gɔ́ɔ̃ nɛ.