Read Samo, Southern SYB 17 Bible Online

SYB 17 - Samo, Southern bible

SYB 17

¹Giĩ goon na á goã Efrayimu a kele yii bǎã kɛ nɛ, a tɔ n Mikayewuu.

²Ǹ kɔn pinaa, á pɛ ǹ dan nɛ: «N wɔrɔ duu goon ka paabiɛ (1 100) mɛn goã á papaã, ń dì bii li ma din yii-n ke lɛn, bɛa wɔrɔ kɛ lɛ, a tá ma gɔn. Masɛ din ni má saa.» Ǹ dan tɔ́n pɛ nɛ: «Maa nɛgiĩ ganaa, Lawa die a barka da n ganaa!»

³Miika wɔrɔ duu goon ka paabiɛ lɛ saa, á kɔ ǹ dan la. Ǹ dan tɔ́n pɛ nɛ: «Bɛa wɔrɔ kɛ lɛ din, man má kɔ Dɛnaa Lawa la, maa nɛgiĩ lɛ a lɛa. Máa á re màn nyín zɛnɛɛ nɛ, a fɔlɔ yo a kaa la, a baa dì lɛa. Bɛ lɛ n ke, ma á koe la kanna.»

⁴Á wusoo á wɔrɔ lɛ kɔ ǹ dan la. Ǹ dan bɛa wɔrɔ lɛ si, á wɔrɔ biɛpaa bɔ a nɛ, á kɔ fɔlɔ-yole la. Bɛ́ màn nyín zɛnaa nɛ, á fɔlɔ yo á kaa la, ǹ nə́ koa Miika a kion dì lɛa.

⁵Bɛ́ daa yaa, bɛa giĩ kɛ lɛ ǹ nə́ bíi Miikaa dɔn, bɛ̀ dì guguru kɔ ǹ kion tá a lon. Á kion lɛduə̃ ǹ dì zɛnaa, á dì lɛ a dí nya ǹ mɔnaa zɛnaa, a ná a din a nɛgiĩ goon bɔ á koa dì lɛ a wúlu-bɔle lɛa.

⁶ Bɛa waáraa kɛ lɛ nɛ, kii goã Izirayeli minin lɛn mìi la wa, didie na á goã a din foo sii zɛnɛɛ.

⁷A biikoo li, bɛ̀ tɔntɔraa goon tá giã-n Bɛtlehɛmu, Zudaa gána nɛ. A n Levii tɔrɔ lɛa.

⁸A na á soo Bɛtlehɛmu, á woo ga giã ǹ bǎã li, a n tii biɛ a nɛ. A bɛ́ zii la woe, á dɔ Miikaa a piɛ, Efrayimu kele yii bǎãn kɛn nɛ.

⁹Miikaa nɔ̀n da la mà a n boe maa? Giĩ lɛ ná a lɛ si: «Levii tɔrɔ n ka masɛ nɛ, man boe Bɛtlehɛmu kiwi Zudaa gána nɛ. Man zii tɔ we giɛ giã ǹ bǎã li, tii biɛ a nɛ.»

¹⁰Miikaa tɔ́n pɛ nɛ: «Giã masɛ a kion, n baa masɛ a díi lɛa, n maa sumu a wúlu bɔ. Ma á re wɔrɔ fù koe n la lɛ̀ woo lɛ̀. N laadoo bɛ́ wɔ ǹ mɔnaa laanka màn-bii mɛn dɔ ganaa, ma á re bɛ dɔ koe n la.» Levii tɔrɔ lɛ golee.

¹¹Á lɛ kɔ á giã Miikaa a piɛ, bɛ́ kũ ka a din a nɛgiĩ goon bɛ́ lɔn.

¹²Miikaa Levii tɔrɔ lɛ koa a wúlu-bɔle lɛa. Tɔntɔraa lɛ giã Miikaa a kion.

¹³Miikaa tɔ́n pɛ: «Kanna kəni, ma á doɛ̃ máa Dɛnaa Lawa á re sii bǐɛ̃ zɛnɛɛ masɛ nɛ, a giala, Levii tɔrɔ kɛ na á maa wúlu-bɔle baa.»