Read Samo, Southern SYB 20 Bible Online

SYB 20 - Samo, Southern bible

SYB 20

¹Izirayeli minin lɛn tumaa soo, a saa Dan kiwi ganaa gɔsɛ a lɛ̀gɔn la, yǎa Bɛɛr-Sebaa kiwi gusin a lɛ̀gɔn la, a wo Galaati gána kɛ yaa. Zaman lɛ tumaa nə́ ǹ wɔ kaa kun, ǹ nə́ n lɛ sɔkɔn Dɛnaa Lawa yɔrɔ-a Mispaa.

²Izirayeli tɔrɔn lɛn tumaa a nyɛɛnaandɛnan laanka ǹ giĩn tumaa daa Lawa a zaman lɛ a lɛsɔkɔn bǎã nɛ. Maǹ giĩ duu biɛsii (400 000), ǹ mɛnɛn bɛ́ woe zia la ka ǹ gòã nɛ, ǹ nə́ boe zia-baa dɔ la ka gɔya sa nɛ.

³Bɛnzamɛn tɔrɔn nə́ ma, mà Izirayeli min gialakun kɛ́ woo Mispaa kiwi. Izirayeli minin lɛn nə́ pɛ mà sii baraa kɛ da lɔn, mà ǹ na a yɔrɔ pɛ ǹsɛn manɛ.

⁴Ǹ Levii tɔrɔ mɛn a lɔ dɛ, bɛ́ tɔ́n pɛ wɔ-n kɛnɛn: «Masɛ laanka maa lɔ nɛ, wɔ́ daa Gibeya kiwi, Bɛnzamɛn tɔrɔn kɛn bǎã nɛ, wáa wɔ n wɛɛ walan.

⁵Gibeya kiwi minin lɛn nə́ yoo ma gialaa. Ma goã kion mɛn nɛ, ǹ nə́ daa bɛ lɛnpɛnɛ tèlò-n, ǹ nə́ giɛ li, ǹ tá ma dii. Ǹ nə́ bɔ maa a lɔ lɛ yii ni yǎa á gã.

⁶Bɛ lɛ n ke, má maa lɔ lɛ gere saa, má kukuru kɔn, má dia Izirayeli minin lɛn bǎã tumaa nɛ. A giala, sii bɔbɔnɛɛ laanka sìi da ǹ sii n ke, ǹ nə́ zɛnaa Izirayeli gána nɛ.

⁷Á ke, Izirayeli minin lɛn, ka tumaa sɔsɔ̃ ka ga a ganaa, ka kaa taasiɛ pɛ a gɔ́ɔ̃-n kànaa.»

⁸Zaman lɛ tumaa kɔn wɔ ma, ǹ nə́ yoo ǹ nə́ pɛ: «Wɔsɛn min kɔn ba wusii a wo piɛ doo wa.

⁹Wɔ bɛ́ re sii mɛn zɛnɛɛ Gibeya minin kɛn wɔ paǹ li sisia, bɛ n ka kɛ nɛ: Wɔ n die n piɛ̃. Bɛ̀ wɔ́ sii mɛn yɛ bɛ gɔ́ɔ̃ nɛ, wɔ n die ǹ kuĩ a kɔnpɛ ka bɛ nɛ.

¹⁰Wɔ n die minin boe Izirayeli tɔrɔn lɛn tumaa bii: Giĩ paabiɛ la, min fù, duu goon la, min paabiɛ, min duu fù la, min duu goon, bɛn nə wo ga màn-bii li, ǹ da kɔ zaman lɛ la. Bɛ̀ bɛn nə́ n bɔyaa ǹ nə́ daa, Bɛnzamɛn tɔrɔn kiwi Gibeya minin kɛn nə sìi da ǹ sii mɛn tumaa zɛnaa Izirayeli gána nɛ, wɔsɛn tá re dɔlɔ boe ǹ ganaa, a kɔnpɛ ka ǹ zɛnaa ǹ sii ni.»

¹¹Izirayeli minin lɛn tumaa kɔn wɔ ma, ǹ nə́ n lɛ sɔkɔn, mà maǹ die yui kiwi lɛ gialaa.

¹²Izirayeli tɔrɔ gialakunun lɛn nə́ minin dia Bɛnzamɛn a tanlɛ minin li, mà ǹ pɛ ǹ nɛ mà wàa mɛn sii babaraa n ke á n zɛnaa ǹ bii?

¹³Min gɛsɛn mɛnɛn nə sii kɛ lɛ zɛnaa Gibeya, ka ǹ kɔ, màn mɛn bɛ́ toɛ wɔ ǹ dɛ, ń giɛ wɔsɛn tá sii baraa kɛ boe wɔ bɔ Izirayeli minin bii. Sɛnɛ, Bɛnzamɛn tɔrɔn lɛn nə lɛ kɔ ǹ nə́ n too kɔ ǹ dɔɔ̃n gialakun Izirayeli tɔrɔn lɛn boo ganaa wa.

¹⁴Bɛnzamɛn tɔrɔn lɛn nə́ soo ǹ kiwin ni, ǹ nə́ woo n lɛ sɔkɔn Gibeya, mà maǹ die woe zia biɛ Izirayeli tɔrɔ gialakunun lɛn ganaa.

¹⁵Bɛa pinaa kɛ lɛ nɛ, Bɛnzamɛn tɔrɔn mɛnɛn nə soo kiwin ni ǹ nə́ daa, ǹ nə́ ǹ nimi. Maǹ nə́ goã giĩ duu fuəwensɔrɔ (26 000), ǹ mɛnɛn bɛ́ boe zia-baa la. Min mɛnɛn bɛ́ Gibeya din ni, ǹ tɔ bɔ zia la, bɛn ba a-n wa. Bɛn dɔn man nə́ goã giĩ biɛsɔbaa.

¹⁶Bɛa zia-baali zaman lɛ tumaa bii, min biɛsɔbaa mɛn tɔ bɛ́ á bɔ zia la, bɛn man nə́ goã gɔsɛ-an lɛa. Ǹ gogoonmaa goã boe la, a baragii koa mìi ka goon ganaa, a gɔn ná a pusii wa.

¹⁷Ǹ nə́ Izirayeli tɔrɔ gialakunun kɛn dɔn nimi. Maǹ nə́ goã giĩ duu biɛsii (400 000), Bɛnzamɛn tɔrɔn kɛn gòɛ̃ ná a ba a-n wa. Ǹ tumaa na á goã zia-baali lɛa, ǹ nə́ boe zia-baa la.

¹⁸Izirayeli minin lɛn nə́ yoo, ǹ nə́ woo Betɛli, ǹ nə́ nɔ̀n da Lawa la kɛnɛn: «Wɔsɛn tɔrɔn lɛn mɛn nə die woe zia biɛ Bɛnzamɛn tɔrɔn lɛn ganaa bibinaa nɛ?» Dɛnaa Lawa nə́ ǹ lɛ si: Zudaa tɔrɔn man die woe bibinaa nɛ.

¹⁹Izirayeli minin lɛn nə́ yoo baayɛlɛ yiisoone, ǹ nə́ woo golee Gibeya lɛkoro-a.

²⁰Izirayeli tɔrɔ gialakunun lɛn nə́ n yɔrɔ bɔ ǹ nə́ soo, ǹ nə́ golee Gibeya kiwi yɔrɔ-a, mà maǹ die zia biɛ Bɛnzamɛn tɔrɔn lɛn ganaa.

²¹Bɛnzamɛn tɔrɔn lɛn nə́ soo Gibeya bɛa pinaa kɛ lɛ nɛ, ǹ nə́ Izirayeli minin lɛn giĩ duu fuəwenpaa (22 000) dɛ, ǹ nə́ ǹ kaa tán.

²²Izirayeli minin lɛn nə́ woo wuu pɛ Dɛnaa Lawa ganaa, yǎa wasa mɛ. Ǹ nə́ nɔ̀n da la, mà ǹsɛn doamaa nɛ, ǹ wusoo ǹ wo zia baa ǹ dɔɔ̃n Bɛnzamɛn tɔrɔn lɛn ganaa? Dɛnaa Lawa nə́ ǹ lɛ si: «Ka wo ǹ gialaa.» Izirayeli zaman lɛ foo taã. Ǹ nə n lɛ sɔkɔn bǎã mɛn nɛ bibinaa nɛ zia-baa lɛ taman yii, ǹ nə́ wusoo ǹ nə́ woo n lɛ sɔkɔn walan.

²³

²⁴A lɛawaa paabaa ǹ wɔ pinaa, Izirayeli minin lɛn nə́ n zɔ̃, ǹ nə́ woo Bɛnzamɛn tɔrɔn lɛn gialaa.

²⁵Bɛa lɛawaa paabaa ǹ wɔ pinaa ke, Bɛnzamɛn tɔrɔn nə́ soo Gibeya, ǹ nə́ woo n da ǹ lɛ. Ǹ nə́ wusoo ǹ nə́ giĩ duu fulukiwisi (18 000) dɛ ǹ bii ǹ nə́ ǹ kaa tán, ǹ tumaa ń boe zia-baa la.

²⁶Bɛ lɛ taman yii, Izirayeli zaman tumaa yoo ǹ nə́ woo Betɛli. Ǹ nə́ giã tán walan Dɛnaa Lawa yɔrɔ-a, ǹ nə́ wuu pɛ, ǹ nə́ n lɛ sɔɔ yǎa wasa mɛ. Ǹ nə́ *wúlu màn tiɛ̃ laanka barka da Lawa nɛ ǹ wúlu bɔ Dɛnaa Lawa yɔrɔ-a.

²⁷Bɛa biikoo li, bɛ̀ Lawa a *lɛ kɔ kɔn la ǹ goo kɛ á tɔn Betɛli. Eleyazaara a nɛgiĩ Finee mɛn bɛ́ Aarɔn a nɔ̀ɔn lɛa, bɛ̀ bɛ n Lawa a wúlu-bɔle lɛa. Izirayeli minin lɛn nə́ nɔ̀n da Dɛnaa Lawa la: «Wɔ doamaa nɛ wɔ wusoo wɔ wo zia baa wɔ dɔɔ̃n Bɛnzamɛn tɔrɔn lɛn ganaa hinlaa wɔ doamaa nɛ wɔ a lɛ da?» Dɛnaa Lawa nə́ ǹ lɛ si: «Ka woo, a giala, biɛ̃, ma á re Bɛnzamɛn tɔrɔn lɛn we ka gɔn.»

²⁸

²⁹Izirayeli minin lɛn nə́ minin koa duru ǹ bǎãn nɛ, ǹ nə́ Gibeya kiwi lɛnpɛnɛ nɛ.

³⁰A lɛawaa sɔɔbaa ǹ wɔ pinaa, Izirayeli minin lɛn nə́ woo Bɛnzamɛn tɔrɔn lɛn gialaa. Ǹ nə́ n yɔrɔ bɔ zia-baa taman yii, ǹ nə́ golee Gibeya kiwi yɔrɔ-a, ka ǹ bɛ́ goɛ̃ bɛ̀ ǹ zɛnaa lɔn lɛlɛ.

³¹Bɛnzamɛn tɔrɔn lɛn nə́ soo, ǹ nə́ woo zaman lɛ gialaa. Izirayeli tɔrɔ gialakunun lɛn nə́ ǹ bebele miɛ̃, ǹ wɔlɔ lui Gibeya kiwi ganaa. Ǹ ná a giala kɔ, ǹ nə́ minin dɛ Izirayeli minin lɛn bii, ka ǹ bɛ́ ǹ nə́ zɛnaa lɔn lɛlɛ. Min pɔsɔɔ kɛ miã nɛ, ǹ nə́ ǹ dɛ don gɔ́ɔ̃ nɛ, ziin sawaa kɔn-a ǹ bǎã kɛ nɛ, goon nə́ woe Betɛli, kɛ n woe Gibeya kiwi.

³²Bɛnzamɛn tɔrɔn lɛn man nə́ goã pii: «Á ke, wɔ́ boo ǹ la ka lɛlɛ wɔ lɛ bɛ́ lɔn.» Sɛnɛ, Izirayeli minin lɛn sɛn man nə́ goã pii ǹ dinin manɛ: «Wɔ n die baa sii, wɔ n bebele wɔ soo ziin la, ǹ wɔlɔ lui kiwi lɛ ganaa.»

³³Izirayeli a zia-baalin lɛn tumaa yoo ǹ bǎã nɛ, ǹ nə́ woo n lɛ sɔkɔn Baali-Tamaara kiwi, zia taman yii. Bɛa biikoo li, Izirayeli minin lɛn mɛnɛn nə goã durii-n Gibeya diə bǎã kɛ nɛ, bɛn nə́ soo ǹ duru ǹ bǎã nɛ.

³⁴Bɛa yɔrɔ lɛ la, giĩ duu fù, ǹ mɛnɛn tɔ bɛ́ á bɔ zia la, bɛn man nə́ n bɔ Izirayeli minin lɛn tumaa bii, ǹ nə́ woo golee Gibeya yɔrɔ-a. Zia lɛ baraa kɔ, sɛnɛ, Bɛnzamɛn tɔrɔn lɛn nə goã doɛ̃ mà bɔ̀n nə die ǹsɛn yii wa.

³⁵Dɛnaa Lawa baa da Bɛnzamɛn tɔrɔn lɛn gòã li Izirayeli tɔrɔn nyɛɛnɛ. A pinaa, Izirayeli minin lɛn man nə́ Bɛnzamɛn tɔrɔn lɛn min duu fuəwensooro ka paabiɛ (25 100) dɛ, ǹ tumaa n boe zia-baa la.

³⁶Bɛnzamɛn tɔrɔn lɛn nə́ yɛ, mà ǹ nə́ boo ǹsɛn la. Izirayeli minin lɛn dinin man nə́ bǎã da Bɛnzamɛn tɔrɔn lɛn manɛ, a giala, ǹ foo na á goã doa-n zia-baalin kɛn ganaa, ǹ nə́ ǹ duru, ǹ nə́ Gibeya lɛnpɛnɛ nɛ.

³⁷Minin lɛn nə́ soo duru ǹ bǎã nɛ, ǹ nə́ woo Gibeya gialaa ka baa nɛ, ǹ nə́ kiwi lɛ kũ, ǹ ná a minin lɛn tumaa dɛ.

³⁸Izirayeli minin gialakunun laanka durii-wɔlen lɛn man nə́ kɔn wɔ ma boo goon ganaa: Durii-wɔlen lɛn doamaa nɛ, ǹ tɛmaa gole yoo kiwi lɛ gɔ́ɔ̃ nɛ, ǹsɛn nə yɛ.

³⁹Zia lɛ gɔ́ɔ̃ nɛ, Izirayeli minin lɛn nə́ wusoo ka ǹ kio ne. Bɛnzamɛn tɔrɔn ná a giala kɔ, ǹ nə́ minin dɛ Izirayeli minin lɛn bii: min pɔsɔɔ kɛ miã. Maǹ nə́ goã pii: Sonbore mà a n pɛ, wɔ á ke wɔ́ boo ǹ la duduu, ka wɔ bɛ́ wɔ́ boo ǹ la zia bibinaa kɛ gɔ́ɔ̃-n lɔn.

⁴⁰Sɛnɛ, bɛa biikoo li, tɛmaa gole mɛn bɛ́ sii giala pii, bɛ ná a giala kɔ á yoo kiwi lɛ mìi la. Bɛnzamɛn tɔrɔn lɛn bɛ́ ǹ nə́ n yii bɔyaa mà maǹ giɛ, bɛ̀ tɛ á ke kiwi lɛ tumaa gialaa kuĩ, a tɛmaa n lon kurukuru.

⁴¹Izirayeli minin lɛn man nə́ goã ǹ nə́ wusoo ka ǹ kio ne. Bɛ lɛ na á nyɛ́ɛ da Bɛnzamɛn tɔrɔn lɛn ganaa. A giala, ǹ nə́ dɔ̃, mà bɔ̀n nə die ǹsɛn yii.

⁴²Ǹ nə́ baa si Izirayeli minin lɛn nyɛɛnɛ, ǹ nə́ woo don sa bii. Sɛnɛ, zia-baalin lɛn nə́ kɔ ǹ kio lɛ miɛ̃. Min mɛnɛn bɛ́ soe kiwi gɔ́ɔ̃ nɛ, ǹ nə́ bɛn dɛ a din bǎã nɛ.

⁴³Ǹ nə́ Bɛnzamɛn tɔrɔn lɛn lɛnpɛnɛ, ǹ nə́ ǹ loo miɛ̃, ǹ toa ǹ nə́ n susu wa. Ǹ nə́ ǹ dɛ yǎa Gebaa kiwi yɔrɔ-a, dia-n woe lɛ̀giala gɔn la.

⁴⁴Bɛa yɔrɔ lɛ la, Bɛnzamɛn tɔrɔn lɛn zia-baali duu fulukiwisi na á gã, ǹ tumaa dɔ n giĩ foo taãnaan lɛa.

⁴⁵Ǹ gialakunun kɛn nə́ n bɔyaa ǹ nə́ baa si, ǹ nə́ n yɔrɔ dia don la, ǹ nə́ woo Irimɔn kiwi a gɛ̀fu bǎã kɛ nɛ. Izirayeli minin lɛn nə́ ǹ min duu sooro dɛ zii la. Ǹ nə́ gialakunun kɛn loo miɛ̃, yǎa ǹ nə́ dɔ ǹ ganaa Gidɔn, ǹ nə́ wusoo ǹ nə́ min duu paa dɛ bɛn dɔn bii.

⁴⁶Ǹ Bɛnzamɛn tɔrɔn mɛnɛn dɛ bɛa pinaa lɛ nɛ, ǹ mɛnɛn tumaa bɛ́ boe zia-baa la ka gɔya sa nɛ, ǹ foo dɔ n tã, ǹ tumaa a kaa kun na á goã min duu fuəwensooro.

⁴⁷Min biɛsɔrɔ na á n kio kɔ, ǹ nə́ baa si ǹ nə́ woo don, Irimɔn a gɛ̀fu bǎã kɛ nɛ, ǹ nə́ giã walan yǎa mui sii.

⁴⁸Bɛnzamɛn tɔrɔn lɛn mɛnɛn nə goã, Izirayeli minin lɛn nə́ n bɔyaa ǹ nə́ daa bɛn dɔn gialaa. A saa kiwi minin ganaa a wo tɔɔn yaa, ǹ goã màn mɛn tumaa yii ǹ yɔrɔ-a, ǹ nə́ bɛn tumaa dɛ. Ka bɛ dɔ nɛ, ǹ kiwi mɛn tumaa yɛ, ǹ nə́ tɛ da bɛn ganaa.