Read Samo, Southern SYB 4 Bible Online

SYB 4 - Samo, Southern bible

SYB 4

¹Ewuudu a gɛ̀ kio, sii mɛn bɛ́ baraa Dɛnaa Lawa yii li, Izirayeli minin lɛn nə́ wusoo doo, ǹ nə́ bɛ zɛnaa.

²Bɛ lɛ nɛ, Dɛnaa Lawa nə́ ǹ wɔ Kanaan kii Zabɛn kɛ gɔn, giã-n Asɔɔrɔ kiwi. A zia-baalin goledɛnaa na á goã ka Sizeraa nɛ. Bɛ na á goã giã-n Arosɛti-Goyimu.

³Izirayeli minin lɛn nə́ n lɛ dɛ Dɛnaa Lawa ganaa. A giala fɔlɔ wotoro biɛmanangɔrɔ na á goã Sizeraa lon. Á bɔ Izirayeli minin lɛn yii-n taãn-taãnɛ, yǎa lɛ̀ fuə.

⁴Bɛa biikoo li, bɛ̀ Lapidɔti a lɔ Deboraa ke Lawa a boo gii-dali lɛa, bɛ̀ bɛ n Izirayeli minin lɛn sii yɔrɔ boe.

⁵A na á goã giɛ̃ tán sèwo da kɔn giulun, Ramaa laanka Betɛli biin ni, Efrayimu a kele yii bǎã kɛ nɛ. Bɛ kio, ǹ nə́ bɛa sèwo da lɛ bíi mà "Deboraa a sèwo da". Izirayeli minin lɛn man nə́ goã woe a li walan, bɛ̀ a ǹ sii yɔrɔ bɔ.

⁶Ǹ kɔn pinaa, Deboraa minin dia, mà ǹ wo lɛ dia Abinoamu a nɛgiĩ Baraki la, Kedɛsi kiwi, Nɛfutalii gána nɛ. Deboraa pɛ nɛ: «Dɛnaa Lawa lɛ, Izirayeli minin Lawa lɛa, a din na á dí kɛ kɔ mà n wo Tabɔɔrɔ kele la, kun ka giĩ duu fù kɛ nɛ, n nə́ ǹ bɔ Nɛfutalii tɔrɔn laanka Zabulɔn tɔrɔn bii.

⁷Mà asɛ re Zabɛn a zia-baalin goledɛnaa Sizeraa diɛ n la Kisɔn tà lɛ-a, kun ka a ziabaa ǹ wotoron laanka a zia-baalin ni. Mà asɛ á re Sizeraa lɛ we n gɔn.»

⁸Baraki tɔ́n pɛ Deboraa-n kɛnɛn: «Bɛ̀ n tá woe kun ka ma nɛ, ma á woe. Sɛnɛ, bɛ̀ n ba woe kun ka ma-n wa, ma a woe wa.»

⁹Deboraa pɛ nɛ: «Ma á re woe kunun n ni. Sɛnɛ, bɛ̀ má woo, n din ni n ba re gugurubaa yii a-n wa. A giala, Dɛnaa Lawa n die Sizeraa lɛ we lɔ gɔn.» Bɛ kio, Deboraa yoo á woo kun ka Baraki ni Kedɛsi kiwi.

¹⁰Baraki Zabulɔn laanka Nɛfutalii tɔrɔn bíi Kedɛsi kiwi. Giĩ duu fù (10 000) lɛ kɔ, á kɔ lɛ. Deboraa dinmaa dɔ woo kun ni.

¹¹Ebɛɛrɛ na á goã á n na, á n bɔ a tɔrɔ Kenii minin lɛn ganaa. Muizu ǹ daãgiĩ Obabu tɔrɔn manɛ. Ebɛɛrɛ woo a mɔnaa kion doa yǎa Sanayimu a da sasa kɛ li, kunu Kedɛsi ganaa.

¹²Ǹ nə́ pɛ Sizeraa nɛ, mà Abinoamu a nɛgiĩ Baraki daa Tabɔɔrɔ kele la.

¹³Bɛa biikoo li, Sizeraa a ziabaa ǹ fɔlɔ wotoro biɛmanangɔrɔ lɛ tumaa, ka min mɛn tumaa dɔ goã kun ni, á ǹ sɔkɔn Arosɛti-Goyimu, á woo ǹ ne Kisɔn tà lɛ-a.

¹⁴Deboraa tɔ́n pɛ Baraki ni: «Yoo, a giala, pelo lɛ nɛ, Dɛnaa Lawa á re Sizeraa we n gɔn. Dɛnaa Lawa din nə́ soo á mɛ n nyɛɛnɛ.» Baraki gisĩ á n bɔ Tabɔɔrɔ kele la, ka giĩ duu fù lɛ nɛ a kio.

¹⁵Dɛnaa Lawa mɛ a nyɛɛnɛ, á baa da Sizeraa gòã li, kɔnlɛ ka a ziabaa ǹ wotoron lɛn tumaa laanka a zia-baalin lɛn tumaa nɛ. Sizeraa din gisĩ á n bɔ a ziabaa ǹ wotoro la, á baa si ka a gòã nɛ.

¹⁶Baraki ziabaa ǹ wotoron lɛn laanka zia-baalin lɛn loo yǎa Arosɛti-Goyimu. Ǹ nə́ Sizeraa a zia-baalin lɛn tumaa dɛ. Min goon din la ǹ bii wa.

¹⁷Sizeraa baa si ka a gòã nɛ, á tele Kenii tɔrɔ Ebɛɛrɛ a lɔ Zayeli a mɔnaa kion ganaa. A giala, là nyantoro goã Asɔɔrɔn kii Zabɛn laanka Kenii tɔrɔ Ebɛɛrɛ a kion minin bii.

¹⁸Zayeli soo á woo n da Sizeraa lɛ á pɛ nɛ: «Maa dɛnaagiĩ ganaa, golee, golee masɛ a piɛ. N baran nyɛ́ɛ goon baa wa.» Á golee a li a piɛ, Zayeli duru mɔnaa giulun.

¹⁹Bɛ kio, á pɛ Zayeli ni: «Ma nə n nyankoe, mu boɛɛn kɔ ma la ma mi. A giala, mu boro n ma ganaa.» Á bɔ̀nyaa bɔnaa lɛ bũ, á bɔ̀nyaa kɔ la á mi, á wusoo á mɔnaa kɔ lɛ.

²⁰Sizeraa tɔ́n pɛ doo: «Golee kiɛnlɛ-a. Bɛ̀ min mɛn daa á nɔ̀n da mà min tá kànaa ya, n pɛ mà Haayii.»

²¹Sɛnɛ, nɔmaa bɛ́ á la Sizeraa yii ni, á nyuù wɔ taãn-taãnɛ. Ebɛɛrɛ a lɔ Zayeli mɔnaa kion lɛ a doa ǹ fɔlɔ goon saa ka tutoarɛ nɛ, á wɔ a li sɛlɛlɛlɛ, á dere a paragiala nɛ, yǎa á woo tán kũ. Sizeraa gã.

²²Bɛ á zɛnɛɛ, bɛ̀ Baraki dɔ á ke á dɔ gɔrɔ. A na á goã Sizeraa lɛ kio lui. Zayeli soo á woo n da lɛ á pɛ nɛ mà a daa, mà a bɛ́ giɛ giĩ mɛn li, mà asɛ á re nyɛɛ nɛ. Á wɔ Zayeli a kion, bɛ̀ Sizeraa á ke á gã, á n lɛ bɔ tán walan, ka kiɛ ná a paragiala ganaa.

²³Bɛa pinaa kɛ lɛ nɛ, Lawa sìi da Kanaan kii Zabɛn ganaa Izirayeli minin lɛn yɔrɔ-a.

²⁴Izirayeli minin nə́ pàã la Kanaan kii Zabɛn nɛ miɛ̃, yǎa ǹ nə́ dɛ.