Read Samo, Southern Zaã3 1 Bible Online

Zaã3 1 - Samo, Southern bible

Zaã3 1

¹ Masɛ *min gole kɛ n sɛ́wɔ kɛ diɛ maa giaára Gayusu la, má n narɛ taãn-taãnɛ.

²Maa giaára sonbore, man Lawa nyankoe, máa n sii tumaa bǐɛ̃ kɔ, n goã gɔ̀nɔn nyantoro la, ka n telenboen bɛ́ la lɔn.

³Ma foo kɔɔ̃n kɔ parsiini, bɛ̀ wɔ dɔɔ̃nɔn kɔnɔn bɛ́ ǹ nə́ daa, ǹ nə́ pɛ ma nɛ, mà n tá bɔlɔgoondɛnaa lɛa sonbore wɔ paǹ li. A n miɛ̃ dɔn, n tá tɔ we sonbore gɔ́ɔ̃ nɛ.

⁴Bɛ̀ ma á miɛ, mà maa nɛnyaanan tá sonbore gɔ́ɔ̃ nɛ, màn kɔ́n ba kɔɔ̃n ma ganaa á dɔ bɛ li wa.

⁵Maa giaára sonbore, n tá dɔmalɛ we ka bɔlɔgoondɛnaabaa nɛ, n dɔɔ̃n Lawa-nyankɔlen manɛ, haalɛ ǹ mɛnɛn bɛ́ tiin lɛa.

⁶Ǹ nə́ n minin-narɛɛ kɛ boo da wɔa Lawa a sɔmɔ minin yɔrɔ-a. Ma nə n nyankoe, n dɔ ǹ lɛ ǹ zii tɔ-wɔ kɛ gɔ́ɔ̃ nɛ, a kɔnpɛ ka Lawa foo sii ni.

⁷A giala, mà maǹ nə́ zii saa ǹ tá *Krita a dí la, ǹ lɛ kɔ min kooron dɔmalɛ kɔn ganaa wa.

⁸Wɔsɛn Lawa-nyankɔlen man siĩn kəni, wɔ n dɔ bɛa minin kɛn miãn lɛ, ń giɛ, wɔ dɔn tá n gii we ǹ dí kɛ lɛ nɛ, ǹ nə́ nyɛɛ sonbore a lɛa.

⁹Má boo boɛɛn kiɛ̃ má dia kaa Lawa a sɔmɔ la. Sɛnɛ, Diotrɛfu mɛn bɛ́ zoɛ̃ ǹ kiibaa li, bɛ nə́ n piã, ma boo mɛn da, a baa boo lɛa wa.

¹⁰Bɛ lɛ nɛ, bɛ̀ má daa walan, a sii bɔnɛɛ mɛn tumaa zɛnaa, a boo baraan mɛnɛn da, ka soɛn mɛnɛn nɛ wɔsɛn wɔ paǹ li, ma á re a tumaa nyɛɛ. Sɛnɛ, bɛ kɔ́n dɔ a yii li wa: wɔ dɔɔ̃nɔn mɛnɛn bɛ́ die walan, a nə n piɛ̃ doo mà ǹ baran bɛn dɔn si wa. Min mɛnɛn dɔn dinin bɛ́ zoɛ̃ mà ǹ nə ǹ si, a n bɛn dɔn kurii mà ǹ baran ǹ si wa, a n giɛ li mà a ǹ loo dinin, a ǹ bɔ Lawa a sɔmɔ-n.

¹¹Maa giaára sonbore, sii mɛn bɛ́ baraa, n baran bɛ lɛn zɔɔ̃ wa, sɛnɛ sii mɛn bɛ́ siĩni, bɛ lɛn zɔɔ̃. Min mɛn bɛ́ sii bǐɛ̃ zɛnɛɛ, bɛa dɛnaa n Lawa wɔ lɛa; min mɛn bɛ́ sii baraa zɛnɛɛ, bɛa dɛnaa Lawa yɛ wa.

¹²Demetriyusu wɔ paǹ li, min tumaa na a tɔ bǐɛ̃ pii. Taãn dɔ nɛ ǹ tá pii. Wɔsɛn dɔn dinin tá a siéren biɛ. N tá doɛ̃ mà bɛ̀ wɔ siére mɛn pɛ, mà a n taãn lɛa.

¹³Boo gigiã tá ma li, man zoɛ̃ máa ma ǹ pɛ n nɛ, sɛnɛ, ma ba li, ma kiɛ̃ ka sɛ́wɔ kiɛ̃ ǹ màn nɛ ma dia n la wa.

¹⁴Man zoɛ̃ máa ma da n yii kɔ n li, kànaa ka boɛɛn nɛ, wɔ dininmaan tá re boo diɛ kɔn nɛ ka wɔ lɛ nɛ.

¹⁵Là nyantoro die a goã n li. N giaáran tá fòo diɛ n nɛ. Maa fòo da wɔa giaára gogoonmaa nɛ.