Read Samo, Southern Zud 1 Bible Online

Zud 1 - Samo, Southern bible

Zud 1

¹ Masɛ Zude mɛn bɛ́ Yezu *Krita a bɛ̀rɛ lɛa, man Zaaki ǹ diɛ̃giĩ lɛa, masɛ n sɛ́wɔ kɛ kiɛ̃. Díi Lawa min mɛnɛn bíi, a nə́ ǹ narɛ, Yezu Krita nə́ ǹ tamaɛ, man sɛ́wɔ lɛ diɛ bɛn la.

²Lawa die a ka makara dɔ̃ parsiini, a là nyantoro laanka kɔn-narɛɛ gigiã kɔ ka la!

³Maa giaára sonboren lɛn, kirisibaa mɛn bɛ́ wɔ tumaa wɔ lɛa kun, man má goã giɛ li parsiini, ma sɛ́wɔ kiɛ̃ ma dia ka la bɛ wɔ gɔn la. Sɛnɛ, má yɛ máa a na á pàã baa ma ganaa sisia, ma sɛ́wɔ lɛ kiɛ̃, màn mɛn bɛ́ toɛ, ma ka foo taã ka n doa, ka yɔ bɔ golee Lawa li gɔ́ɔ̃ nɛ, golee Lawa li mɛn bɛ́ Lawa din kɔ wɔ la gunyin goon dinsɔɔ̃, kɔsɔ ná a ba kio wa, wɔsɛn mɛnɛn tumaa bɛ́ a din wɔn lɛa.

⁴Sonbore, min baraan kɔnɔn nə́ wɔ ka bii ka durii ni, ǹ nə́ wɔa Lawa a bǐɛ̃baa ǹ boo kɛ kɔkɔrɛ, ǹ nə́ sonbore koe ǹ dinin la, ǹ naarɛbaa siin kɛn zɛnaa gɔ́ɔ̃ nɛ. Maǹ nə́ n piɛ̃ ka wɔ Mìinaa laanka wɔa Dɛnaa Yezu Krita dɔ nɛ. Bɛa minin kɛn lɛn, ǹ dɔlɔ bɔ ma ganaa boo nə́ n da haalɛ bibi.

⁵ A laan ka á bɛ doɛ̃ taãn-taãn gɔrɔ, man giɛ li, ma ka yiri gisĩ a nɛ, máa Dɛnaa bɛ́ a ná a din a minin kɛn si, á ǹ bɔ Ezipti minin pàã giulun ǹ mɛn waáraa, ǹ mɛnɛn nə n piã bɛ kio, ǹ nə́ ǹ golee li wa, Lawa toa bɛn nə́ gã.

⁶Ka n yiri kɔ kɛ dɔ nɛ, lon a dia dí-a wolen mɛnɛn bɛ́ ǹ giã ǹ dia dí-a wolebaa-n wa, ǹ nə́ ǹ bǎã toa walan, Lawa na á bɛn gisĩ á ǹ kaa wɔlɔ tì li, á fɔlɔ biɛn kaa ǹ ganaa. Maǹ die goɛ̃ bɛ-n duduu yǎa kiri kuru ǹ lɛawaa gole kɛ a pinaa.

⁷ Doo, Sodɔmu laanka Gomɔɔrɔ kiwi babaraan kɛn, ka ǹ lɛ-a ǹ kiwin dɔn nə́ zɛnaa, ka lon a dia dí-a wolen lɛn wɔ bɛ́ lɔn. Ǹ nə́ n dinin kɔ naarɛbaa la, siin mɛnɛn bɛ́ ǹ ba kɔnboe ka zɛnaa-n wa, maǹ nə́ goã giɛ li ǹ bɛn zɛnaa. Pelo, tɛ nyabaã wole nə ǹ mìi-n dɔlɔ lɛa, bɛ n sii lɛa a nə́ n gɔn wɛɛ min tumaa nɛ.

⁸Ka bɛ din tumaa nɛ, bɛa min baraan kɛn lɛn man sii zɛnɛɛ ka bɛa yɔrɔ kɛ lɛ nɛ. Maǹ soɛ boon taasɛ, ǹ nə́ *gɔ̀ diɛ ǹ dinin ganaa, ǹ nə́ Lawa pàã gole kɛ puusə koe, ǹ nə́ sɔ koe lon màn pàãdɛnan kɛn ganaa.

⁹ Lon a dia dí-a wolen goledɛnaa Miseli din bɛ zɛnaa wa. A laanka *Sɛtaan bɛ́ zia diɛ ǹ mɛn waáraa, ǹ nə́ kɔn liere koe Muizu gere ganaa, Miseli lɛ kɔ, á dɔlɔ da Sɛtaan mìi ni, a sɔ kɔ Muizu ganaa kɛ a lɛa wa. A na á pɛ kooro mà «Dɛnaa Lawa die a dɔlɔ bɔ n ganaa!»

¹⁰Sɛnɛ, soɛ-bɔlen kɛn lɛn sɛn, ǹ bɛ́ ǹ ba màn mɛn giala miɛ wa, maǹ sɔ koe bɛ ganaa. Ǹ bɛ́ mànan mɛnɛn doɛ̃ ǹ dinin ganaa, baãnaabaa gɔ́ɔ̃ nɛ ka tɔɔn wɔ bɛ́ lɔn, bɛ lɛ nə ǹ papaɛ̃.

¹¹ Bɔ̀n nə ǹ wɔ lɛa! A giala, maǹ nə́ Kanyɛ a baraabaa ǹ zii kɛ saa. Ǹ dɔn nə́ n dinin kɔ minin bebele a màn si ǹ dí kɛ la, ka Balaamu bɛ́ á goã zɛnɛɛ lɔn. Koore minin gɔ́ɔ̃ tii lɔn, ǹ tumaa bɔ̀n baa kun, ǹ dɔn man nə́ bɛa zii lɛ saa, ǹ nə́ woe bɔ̀n biɛ.

¹²Biikoo mɛn waáraa, bɛ̀ ka á dɔɔ̃nbaa ǹ màn bii kun, soɛ-bɔlen kɛn lɛn man wɔ̀lɔ̀ baraa lɛa kaa sii-zɛnaa ganaa, a giala, ǹsɛn man sii lɛ zɛnɛɛ ka sìi doɛ̃baã nɛ, ǹ nə́ ǹ ba n yiri koɛ ǹ miãn nɛ wa, yǎa ǹ dinin. Maǹ kɔnboe ka labaran mɛnɛn bɛ́ piɛ̃ nə́ ǹ siɛ kiɛ̃ ǹ nɛ, ǹ nə́ ǹ ba la mu koe wa. Maǹ goon dɔn ka dan mɛnɛn bɛ́, ta ǹ nɛ-kɔ waáraa nɛ, ǹ ba nɛ koe wa; dan manɛ, ǹ gòonən nə́ bɔyaa lenlen, ǹ nə́ gã ǹ nə́ laa.

¹³Bɛa minin kɛn lɛn man ka yìsi mu a bìn-diɛ gàãnaa bɛ́ lɔn, yìsi mu bɛ́ woe lɔn a kaã gɔgɔrɛ toa walan, ǹ nya ǹ dín là n ka ǹ dinin sìi ni. Maǹ goon ka leeren bibiə̃ wolen kɛn nɛ, Lawa na á ǹ koa wɔlɔ tì biribiri kɛ wɔn lɛa yǎa duduu.

¹⁴ Enɔɔki mɛn bɛ́ á goã Aadã a nɔ̀ɔ fulupaa lɛa, bɛ́ Lawa a boo gii da lɛlɛ bɛa minin kɛn lɛn dɔlɔ wɔ gɔn la á pɛ: «Á ke! Dɛnaa n die ka lon a dia dí-a wole duu damata kɛ nɛ,

¹⁵màn mɛn bɛ́ toɛ, a kiri kuru min tumaa la. Á die dɔlɔ diɛ piã-wɔlen mìi ni, ǹ gɔ́ɔ̃ tii Lawa ganaa siin kɛn lɛa, ka ǹ boo bɔnɛɛn kɛn tumaa nɛ, ǹ nə́ ǹ da Lawa gana.»

¹⁶Biikoo tumaa waáraa, ǹ dinin lɛn man zùũzùũ sii, ǹ nə́ min kɔsɔn zɛ̀rɛ biɛ. Maǹ koe ǹ dinin dùũ sii babaraan kɛn dininsɔɔ̃nɔn lɛ. Maǹ nə ǹ dinin gole kɔ ǹ boon diɛ. Maǹ min kɔsɔn bebele ǹ dinin là a lɛa.

¹⁷Maa giaáran lɛn, wɔa Dɛnaa Yezu Krita a kialandɛnan lɛn nə wɔ daraa boon mɛnɛn ganaa lɛlɛ ke, ka n yiri gisĩ bɛn nɛ.

¹⁸ Ǹ nə́ goã ǹ nə́ pɛ ka nɛ, mà bɛ̀ giala-nyɔmiɛ biikoon nə́ dɔ, mà minin tá re die, ǹ ka da yaa lɛa, ǹ tɔ wɔ a kɔnpɛ ǹ dinin dùũ sii babaraan kɛn nɛ.

¹⁹Bɛa soɛ-bɔlen kɛn lɛn man toɛ̃-kɔn we minin bii. Ǹ dinin dùũ babaraa kɛ nə ǹ sii tumaa mìi la, Yiri Fu ba ǹ li wa.

²⁰Sɛnɛ, maa giaáran lɛn, kasɛn nə ga wo-nyɛɛn li kaa goleemali sonbore kɛ gɔ́ɔ̃ nɛ. Ka Lawa nyankɔ ka Yiri Fu pàã nɛ.

²¹Lawa bɛ́ ka narɛ ke, ka toa ka goã bɛ gɔ́ɔ̃ nɛ, ka n yii da, wɔa Dɛnaa Yezu Krita bɛ́ re die a bǐɛ̃baa gole kɛ gɔ́ɔ̃ nɛ, a n die nyin nyabaã koe ka la.

²²Ka makara bɔ gɔ́ɔ̃ lonlankɔ wolen kɛn ganaa,

²³ka ǹ kirisibaa, ka ǹ gòã bɔ biɛ̃ ǹ tɛ kɛ lɛ. Ka makara bɔ gialakunun kɛn dɔn ganaa. Sɛnɛ, ka zɛnaa ka nyɛ́ɛ-n ka ganaa, màn mɛn bɛ́ toɛ, ka baran ǹ sɔ̀n bɔnɛɛ kɛ saa wa.

²⁴Barka tá Lawa ganaa, a giala á boe la a ka sàabaa mɛnaa ganaa, a ka tamaa. Á boe la a soo ka nɛ a din yɔrɔ-a a gugurubaa ǹ bǎã kɛ nɛ, zɛ̀rɛ baãnaan lɛa, a ka foo kɔɔ̃n kɔ.

²⁵Lawa goon toto mɛn wɔ nyin si ka wɔa Dɛnaa Yezu Krita barka nɛ, gugurubaa laanka golebaa nɛ, pàãyiidɛnaabaa laanka màn tumaa mìilandɛnaabaa goã bɛ wɔ lɛa haalɛ lɛlɛ-lɛlɛ, ka kanna nɛ, yǎa duduu. A n miɛ̃.