Read Samo, Southern SNS 11 Bible Online

SNS 11 - Samo, Southern bible

SNS 11

¹ Ǹ nə́ tɔ́n kàwɔ buu kɔ ma la màn zɔɔ̃ ǹ màn lɛa, ǹ nə́ pɛ ma nɛ: «Yoo n Lawa a Kion kɛ laanka *wúlu bɔ ǹ bǎã kɛ zɔɔ̃, n Lawa-nyankɔlen tumaa nimi.

² Sɛnɛ, Lawa a Kion lɛ a kanaa sumu gole ke, n nyan bɛ zɔɔ̃ wa, a giala, maǹ nə́ bɛ kɔ tɔrɔ kɔsɔn la, ǹsɛn mɛnɛn bɛ́ re Zeruzalɛmu kiwi sonbore kɛ tɔtɔrɛ yǎa mui pusiwenpaa.

³Bɛa biikoo li ma á re a Siére màn paa diɛ, ǹ wɔ ǹ mɔnaan yii n kokoro ka boroo bɛ́ lɔn, ǹ da Lawa a boo gii da yǎa lɛawaa duu goon biɛpaa ka pɔsɔrɔ (1 260) kɛ lɛ piɛ̃.»

⁴ Bɛa Siére màn paa lɛ n kɔnboe ka *olivie da màn paa laanka bolon màn paa mɛn bɛ́ ǹ nə́ ǹ boo da, mà ǹ tá re golee tán a Dɛnaa yɔrɔ-a.

⁵Bɛ̀ min mɛn tá giɛ li mà a sii baraa zɛnaa ǹ nɛ, tɛ n soe ǹ lɛ-n bɛ̀ a ǹ zɔ́ɔn kũkũ. Bɛ lɛ nɛ, bɛ̀ min mɛn ga ǹ lɛ li, bɛa dɛnaa n die giɛ̃ bɛa yɔrɔ kɛ lɛ la.

⁶ Pàã tá ǹ lon ǹ nə́ boe la ǹ lon lɛ tã, la ná a doɛ tán ǹ Lawa a dí-pɛ ǹ biikoo kɛ li wa. Pàã tá ǹ lon ǹ nə́ boe la ǹ mu tumaa bɔyaa ǹ baa mà lɛa. Bɛ̀ ǹ nə́ golee li, ǹ tá boe la ǹ koe tɔrɔ tumaa bɔ tán ganaa.

⁷ Sɛnɛ, bɛ̀ ǹ nə́ ǹ siérebaa ǹ dí pɛ ǹ nə́ nya, Tɔɔ mɛn soo nɔmaa ǹ nyankɔrɔ zuzulu ni, bɛ á re zia biɛ ǹ ganaa, á re boe ǹ la a ǹ dɛ ǹ gã.

⁸ Ǹ bɛ́ ǹ nə́ Dɛnaa dere gɔn ganaa kiwi gole mɛn nɛ, ǹ geren tá re goɛ̃ tán-a bɛa kɔn yɛ ǹ bǎã nɛ. A din kiwi kɛ lɛ nɛ ǹ nə́ bíi ka tɔ giməə ne, mà "Sodɔmu", ka "Ezipti".

⁹Zaman tumaa a minin ni, gánan tumaa nɛ, bɔlɔ tumaa pɛlen ne, tɔrɔ din tumaa nɛ, ǹ tá re die giɛ ǹ geren ganaa yǎa lɛawaa sɔɔ ka talɛɛ, ǹ ba re lɛ koe mà ǹ nə ǹ bĩ wa.

¹⁰Tán min tumaa foo á re kɔɔ̃n koe ka min paa kɛ a gɛ̀ nɛ. Ǹ tá re ǹ nyɛnyɛɛ parsiini, ǹ kɔn gɔ ka màn nɛ kooro, a giala mà Lawa a boo gii-dali màn paa kɛ bɔ tán minin yii-n parsiini.

¹¹ Sɛnɛ, lɛawaa sɔɔ ka talɛɛ lɛ kio, yiikoonaabaa kɔ ǹ piɛ̃ bɔ Lawa li, á daa kaa ǹ nɛ, ǹ nə́ yoo ǹ nə́ golee lon. Min mɛn tumaa nə́ ǹ yɛ, nyɛ́ɛ gole nə́ ǹ kũ.

¹² Siéren lɛn paanan nə́ tɔ́n lɛn gole goon ma lon, a n pii ǹ ni: «Ka dii ka da kànaa!» Ǹ nə́ kaa labara goon ne ǹ nə́ dii lon, ǹ zɔ́ɔn lɛn yii ni.

¹³ A din biikoo goon kɛ lɛ li, tán bìn-diɛ bɔbɔnɛɛ goon nə́ n zɛnaa. Á kiwi lɛ a talakɔn fùbaa ǹ wɔ dɛ á kaa. Min duu sɔbaa dɔ́ gã bɛa tán bìn-diɛ kɛ lɛ gɔ́ɔ̃ nɛ. Min mɛnɛn nə n bɔ a nɛ, nyɛ́ɛ gole bɛn kũ, ǹ nə́ lon a Lawa tɔ guguru kɔ.

¹⁴Koe lɛ a paabaa ǹ wɔ kiɛ̃, sɛnɛ, ka n yiri kɔ a sɔɔbaa ǹ wɔ dɔ á re die sisia.

¹⁵ Lon a dia dí-a wole sɔbaabaa ǹ wɔ tɔ́n a bɛn pɛ, lɛn dadaran nə́ bɔ lon ǹ nə́ pii: «Kanaa a kiibaa lɛ n wɔa Dɛnaa Lawa wɔ lɛa kanna, ká Krita kɛ nɛ. A n die goɛ̃ pàã la baraabaraa yǎa duduu.»

¹⁶*Min gole fuəwensii mɛn bɛ́ ǹ kii dankanan nɛ Lawa yɔrɔ-a, ǹ nə́ kaa tánaa ǹ lɛ la, ǹ nə́ Lawa guguru koe,

¹⁷bɛ̀ ǹ nə́ pii: «Dɛnaa Lawa Pàãyiidɛnaa, nsɛ mɛn bɛ́ n tan, n goã n tan, wɔ a barka diɛ n nɛ. A giala n dí nya ka n pàãyiidɛnaabaa nɛ, n nə́ n kiibaa koa.

¹⁸ Tɔrɔn foo yoo, sɛnɛ, n din a foo-yoo na á daa. Sisia, n geren kiri-wɔ biikoo na á dɔ, n dí-nyalin saraa biikoo dɔ na á dɔ, ǹ mɛnɛn bɛ́ n boo gii-dalin lɛa ka ǹ mɛnɛn tumaa bɛ́ n din wɔn lɛa, ǹ nə́ nyɛ́ɛ biɛ n nɛ, ta a boɛɛn nɛ, ta a gole ne. Min mɛnɛn dɔn bɛ́ ǹ nə́ goã tán-ziziɛ̃lin lɛa, ǹ dɔn ziziɛ̃ biikoo na á dɔ!»

¹⁹ Lawa a kion mɛn bɛ́ lon, bɛ nə́ n lɛ bũ, má *lɛ kɔ kɔn la ǹ goo lɛ yɛ. Bɛ ganaa, la tɛ pɛpɛ, la gigini, la gii dadaran nə́ kaa, tán bìn da.