Read Samo, Southern SNS 17 Bible Online

SNS 17 - Samo, Southern bible

SNS 17

¹ Lon a dia dí-a wolen mɛnɛn bɛ́ ǹ nə́ goã ka koe mànan nɛ ǹ gunun, bɛn goon nə́ n zɔ̃ á dɔ ma li, á pɛ ma nɛ: «Ǹ bɛ́ re dɔlɔ boe lɔ naarɛbaali gole kɛ ganaa ka yɔrɔ mɛn nɛ, daa, ma á re bɛ nyɛɛ n nɛ, kiwi gole mɛn bɛ́ ǹ nə́ dɔ pɛrɛ damata lɛkoro lɛ-a.

² Kanaa a kiin tumaa nə́ n dinin kɔ a din kũ doɛ̃baã siin kɛn la, tán minbuiin tumaa lɛ kɔ á ǹ bebere ka a din kũ doɛ̃baã siin kɛn nɛ, ǹ nə́ ziziɛ̃.»

³ Lawa a Yiri Fu taasiɛ da ma ganaa, má yɛ, lon a dia dí-a wole ma saa á woo ma nɛ don bii. Má lɔ goon yɛ á giã Tɔɔ goon la, Tɔɔ lɛ n tã, a gɔ̀nɔn tumaa kiɛ̃maa-n ka sɔ kɔ Lawa ganaa ǹ boo ne. A mìi n sɔbaa, a bɛn nə fù.

⁴ Lɔ lɛ mɔnaa mɛn wɔ, a na á goã sisia, a paǹ tɛn nə́ tã birəə ne, a paǹ tɛn nə́ tã bonbon, sana laanka gɛ̀fu sonbore, ka gii n pɛnɛɛ nɛ a paǹ tumaa ganaa ka zuzəə ne. Sana kaaran na á goã a gunun, a piɛ̃maa-n ka a din kũ doɛ̃baã ǹ *gɔ̀ gìĩ-bɔle-a kɛ nɛ.

⁵Ǹ nə́ tɔ giməə kiɛ̃ a nyanlɛ-a. Bɛa tɔ giməə lɛ giala mà "*Baabilonii gole mɛn bɛ́ naarɛbaa laanka sii gɔgɔrɛ tumaa a náa lɛa kanaa gɔ́ɔ̃ nɛ".

⁶Má yɛ, ǹ Lawa a min sonboren mɛnɛn dɛ, bɛn mà na á goã lɔ lɛ yii-a. Min mɛnɛn nə́ foo doa ǹ min baa Yezu wɔ gɔn la, lɔ lɛ na á bɛn mà mi, a ná a yii-a ka yɔ bɛ́ lɔn. Ma bɛ́ má yɛ lɔn, tɔwaa gole ma kũ.

⁷Lon a dia dí-a wole lɛ tɔ́n pɛ ma nɛ: «Wàa na á baa kɛ tá n tɔwɛɛ? Lɔ kɛ laanka Tɔɔ mɛn bɛ́ á saa, a mìi n sɔbaa a bɛn nə́ fù, ma á re ǹ sii-duriibaa giala pii n ni.

⁸N yii bɛ́ Tɔɔ mɛn ganaa, a yii goã koo, sɛnɛ, a yii a koo doo wa. Á re soe nɔmaa ǹ nyankɔrɔ zuzulu lɛ nɛ a wo a ziziɛ̃ ǹ bǎã nɛ. Tán minin mɛnɛn bɛ́ ǹ tɔ goã kiɛ̃-n yiikoonaabaa ǹ sɛ́wɔ kɛ nɛ kanaa giala kɔ waáraa wa, bɛ̀ bɛn nə́ yɛ, á re ǹ tɔwɛɛ. Taãn nɛ, a na á goã a yii n koo lɛlɛ, a yii ná a koo doo wa, sɛnɛ, a n die wusii a daa doo.

⁹Kanna, ka daa wɔ n yiri kũ doɛ̃, wɔ tɔn boo kɛ giala ma. Lɔ kɛ a giã ǹ bǎã bɛ́ kele sɔbaa mɛn bii ni, Tɔɔ lɛ mìi sɔbaa kɛ n bɛ giala pii, a n kii sɔbaa dɔ giala pii.

¹⁰Kii lɛ a sooro a kiibaa nya, a sɔrɔbaa ǹ wɔ á tɔn kiibaa la, a sɔbaabaa ǹ wɔ tɔn kii baa wa, sɛnɛ, ta á kii baa a re beleboe kiibaa la wa.

¹¹Tɔɔ mɛn bɛ́ á goã, a ná a banban doo wa, a din nə kiin lɛn kiwisibaa ǹ wɔ lɛa. Sɛnɛ, a na á n nimi kun ka kii sɔbaa kɛ nɛ, asɛ lɛ n woe a ziziɛ̃ ǹ bǎã ganaa.

¹² A bɛn fù kɛ n kii fù giala pii, ǹ nə́ ǹ tɔn kiibaa yɛ bɔrɔ wa. Sɛnɛ, ǹ tá re pàã siɛ ǹ biikoo goon toto a kiibaa ǹ pàã zɛnaa kun ka Tɔɔ kɛ nɛ.

¹³Kii fù lɛ tumaa a taasiɛ n goon, ǹ nə́ ǹ boo sii la ǹ pàã sii tumaa kɔ Tɔɔ kɛ la.

¹⁴Ǹ tá re zia biɛ Sère Nɛ kɛ ganaa. Sɛnɛ, Sère Nɛ lɛ á re gɔ̀lɔ̀ biɛ. A giala a din nə dɛnaan Dɛnaa lɛa, a n kiin tumaa a Kii lɛa. Min mɛnɛn bɛ́ Lawa nə́ ǹ bíi á ǹ bɔ, ǹ nə́ bɔlɔgoondɛnan lɛa, bɛn dɔn tá re gɔ̀lɔ̀ biɛ kun ni.»

¹⁵Lon a dia dí-a wole lɛ tɔ́n pɛ ma-n doo: «N mun mɛnɛn tumaa yɛ naarɛbaali kɛ a giã ǹ bǎã nɛ, bɛn man gánan minin lɛa, ka zaman nɛ, ka tɔrɔn nɛ, ka bɔlɔ totoro pɛlen ne.

¹⁶N bɛn fù mɛn yɛ ka Tɔɔ lɛ dinmaa nɛ, naarɛbaali kɛ tìĩ á re boe ǹ tumaa nyin ni. Ǹ tá re a mànan tumaa sii la, ǹ nà a gɔ̀nɔn kooro da. Ǹ tá re a siĩ soɛ̃, ǹ tɛ kaa a wen ganaa.

¹⁷A giala Lawa na á taasiɛ goon wɔ ǹ foo ne, mà ǹ nə n pàã tumaa kaa kun ǹ dí nya tɔ kɛ nɛ, yǎa Lawa a boo-diɛn lɛn tumaa lɛ piɛ̃.

¹⁸Ma lɔ mɛn dɔ yɛ, kiwi gole mɛn bɛ́ kanaa tumaa a kiin lɛduĩ, bɛ n ka bɛ nɛ.»