Read Samo, Southern SNS 19 Bible Online

SNS 19 - Samo, Southern bible

SNS 19

¹Bɛ kio, má ma, ka min gigiã lɛn nə boe lon, ǹ nə́ pii: «Aleluya! Lawa tɔ bɔ! Gɔ̀lɔ̀baa nɛ, ka gugurubaa nɛ, ka pàãyiidɛnaabaa nɛ, bɛn man wɔa Lawa wɔ lɛa.

² A kiri-kurii n taãnɛ, a n pepere! Naarɛbaali gole mɛn bɛ́ á goã kanaa tumaa yiri ziziɛ̃, ka a din kũ doɛ̃baã sii ni, á kiri wɔ bɛ ganaa. Á dɔlɔ bɔ a ganaa, a giala mà á Lawa dí-nyalin dɛ lɛlɛ ǹ nə́ gã.»

³ Ǹ nə́ wusoo ǹ nə́ pɛ doo: «Aleluya! Lawa tɔ bɔ! Kiwi gole lɛ a tɛmaa yoo, a tɛ n kuĩ baraabaraa yǎa duduu.»

⁴*Min gole fuəwensii kɛ laanka màn yiikoonaa pàãdɛnaa sii kɛ yoo ǹ nə́ kaa tán Lawa yɔrɔ-a, Lawa mɛn bɛ́ giã-n kii dankan nɛ, ǹ ná a guguru kɔ, ǹ nə́ pɛ: «Taarɛ, a n miɛ̃! Lawa tɔ bɔ!»

⁵ Lɛn goon bɔ kii dankan paǹ li a n pii: «Min mɛn tumaa bɛ́ Lawa a dí-nyalin lɛa, ǹ nə nyɛ́ɛ biɛ Lawa nɛ, a bɔnboɛɛnɛn nɛ ka a dadaran nɛ, ǹ tumaa Lawa tɔ bɔ!»

⁶ Má ma doo ka zaman gole lɛn nə boe, a wuu n boe ka mu bɛ́ n toe màn nɛ lɔn, ka la a paraa bɛ́ lɔn, á goã pii: «Aleluya! Lawa tɔ bɔ! A giala mà wɔa Dɛnaa Lawa Pàãyiidɛnaa n kiibaa ǹ pàã la!

⁷Ka daa wɔ n nyɛnyaa wɔ goã ka foo kɔɔ̃n nɛ, wɔ gugurubaa kɔ la! A giala Sère Nɛ a kɔn-wɔ ǹ zɔ́n dɔ, a bɛ́ kɔn-we ka min mɛn dɔ nɛ, bɛ dɔ nə́ n yɔrɔ bɔ.

⁸Ǹ nə́ lɛ kɔ la mà a mɔnaa yii nɔnɔɔ tɛ-pɛle wɔ, *gɔ̀ ná a ba a wa.» Bɛa mɔnaa lɛ n Lawa a min sonboren nya ǹ dí a yoreenbaa giala pii.

⁹ Lon a dia dí-a wole goon tɔ́n pɛ ma nɛ: «A kiɛ̃ sɛ́wɔ nɛ: Ǹ min mɛnɛn bíi Sère Nɛ a kɔn-wɔ ǹ zɔ́n màn-bii kɛ ganaa, bɛn foo á re kɔɔ̃n koe.» Á wusoo á pɛ doo: «Lawa din na á pɛ miɛ̃.»

¹⁰Má kaa tán lon a dia dí-a wole lɛ giulun, máa ma na a guguru koe. Sɛnɛ, á pɛ ma nɛ: «N nyan toa n bɛ zɛnaa wa! Lawa din sɔɔ̃ guguru kɔ. Masɛ dɔ n Lawa a dí-nyali lɛa ka n dɔ bɛ́ lɔn, ka n dɔɔ̃nɔn mɛnɛn bɛ́ Yezu boo taãn nyaa ǹ nɛ, a nə́ ǹ gɔn.» Yezu boo taãn mɛn nyaa, a din ni Yiri Fu nyaa Lawa a boo gii-dalin dɔn manɛ.

¹¹ Má lon yɛ a lɛ n buĩ ni, má tɔ́n sùi fu yɛ bii-a. Min mɛn bɛ́ á dii la, a tɔ n "Bɔlɔgoondɛnaa", ǹ nə́ bíi dɔn mà "Taãnɛ". A n kiri kuri, a n zia biɛ ka peperebaa nɛ.

¹² A yii nànan man kuĩ ka tɛ buə̃ bɛ́ lɔn. Kiibaa ǹ bafolo gigiã na a mìi ganaa. Tɔ mɛn bɛ́ kiɛ̃ nɛ a ganaa, min kɔ́n ba bɛ doɛ̃ wa, yǎa a dinsɔɔ̃.

¹³Maǹ ná a wɔ ǹ dɔnkɛ sã mà li, a din tɔ mà "Lawa a boo".

¹⁴Lon a zia-baalin nə́ dii sùi fufun la, ǹ nə́ koe lɛ, ka dɔnkɛ fufu yii nɔnɔɔ nə́ ǹ ganaa, gɔ̀ ná a ba a wa.

¹⁵ Gɔya sa lɛbɔle-a n soe a lɛ-n, a n die tɔrɔ din tumaa dii ka bɛ nɛ. A n die ǹ lɛduĩ ka fɔlɔ bàbàla nɛ, a foo-yoo gole kɛ gɔ́ɔ̃ nɛ, a n die tɔrɛ ǹ la, ká ǹ bɛ́ rezɛ̃ tɔrɛ yala-n lɔn.

¹⁶Ǹ nə́ tɔ kiɛ̃ a dɔnkɛ ganaa ka a gisi goon ne kɛnɛn: «Kiin Kii, dɛnaan Dɛnaa.»

¹⁷ Má tɔ́n lon a dia dí-a wole goon yɛ golee-n bii-a wasa nɛ. Bàanan mɛnɛn tumaa bɛ́ kiɛ̃ piɛ̃ li lon, á n lɛ dɛ kɔsɛkɔsɛ, á pɛ ǹ nɛ: «Ka tumaa da n lɛ sɔkɔn ka Lawa a zɔ́n gole màn kɛ bii.

¹⁸Ka da kiin laanka ǹ sɔraasin goledɛnan laanka pàãdɛnan siĩ mui. Ka da sùin laanka ǹ diimala wolen siĩ mui, ka da minbuiinin dinin tumaa siĩ mui, bɛ̀rɛn nɛ, ka tá ma din gɔn wìi a lɛa wolen ne, ta a gole ne, ta a boɛɛn nɛ, ka ǹ dinin tumaa siĩ mui.»

¹⁹Má tɔ́n Tɔɔ mìi sɔbaadɛnaa lɛ dɔ yɛ, ka tán a gánadɛnan nɛ, ka ǹ zia-baalin ni, ǹ nə́ n sɔkɔn ǹ nə́ die zia biɛ sùi fudɛnaa lɛ ganaa ka a zia baalin ni.

²⁰Tɔɔ lɛ laanka a boo gii-dali soɛ-bɔle mɛn bɛ́ á goã kaãbaa ǹ siin zɛnɛɛ a yɔrɔ-a, ǹ nə́ ǹ kũ ǹ nə́ ǹ kaa kòso-n. Tɔɔ lɛ a nyaǹ goã kiɛ̃-n min mɛnɛn ganaa, ǹ ná a nyin dɔ guguru koe, a na á bɛn yiri sã ka bɛa kaãbaa ǹ siin kɛn lɛn nɛ. Ǹ nə́ ǹ dinin paanan kũ ǹ nə́ ǹ zũ kiribi tɛ gole kɛ nɛ.

²¹Gɔya sa mɛn bɛ́ soe sùi fudɛnaa lɛ lɛ-n, bɛ na á ǹ zia-baali gialakunun kɛn dɛ. Bàanan tumaa nə́ ǹ mui ǹ nə́ kã.