Read Samo, Southern SNS 20 Bible Online

SNS 20 - Samo, Southern bible

SNS 20

¹Má tɔ́n lon a dia dí-a wole goon yɛ, a n boe lon gisĩ tán ka nɔmaa ǹ nyankɔrɔ zuzulu a goo nɛ ná a gɔn, ka fɔlɔ biɛ guguru goon ne.

² Á tɔɔ babaraa piɛ̃ wole kɛ kũ á da fɔlɔ biɛ nɛ, mà yǎa lɛ̀ duu goon. A din lɛ n lɛlɛ a miɛ̃ lɛ lɛa, ǹ nə́ bíi nɔ̀ɔn babaraan kiã, ǹ nə́ bíi *Sɛtaan dɔn.

³Lon a dia dí-a wole lɛ tɔ́n zũ nɔmaa ǹ nyankɔrɔ zuzulu lɛ nɛ, a ná a lɛ sɔɔ ka goo nɛ nɛ. Á zoo gón dɔ da a ganaa, a n gòon bǎã da a nɛ, min kɔ́n ná a boe la, a na a lɛ bũ wa, mà a nyan boo la, a tɔrɔ kɔ́n yiri sã doo wa, yǎa lɛ̀ duu goon lɛ piɛ̃. Bɛ̀ bɛ́ kiɛ̃, ǹ tá re fore ǹ da, a biikoo boɛɛn dinsɔɔ̃ zɛnaa.

⁴ Má tɔ́n kii dankanan yɛ. Min mɛnɛn bɛ́ giã nɛ ǹ la, ǹ nə́ lɛ kɔ ǹ la, mà ǹ dinin nə kiri kuru. Min mɛnɛn bɛ́ ǹ nə́ gɛ̀ wɔ lɛlɛ, Yezu a boo taãn laanka Lawa a boo a lɛa, ka ǹ mɛnɛn bɛ́ ǹ goã Tɔɔ kɛ laanka a nyín guguru koe wa, ǹ lɛ dɔ kɔ ǹ ná a nyaǹ kiɛ̃ ǹ nyanlɛ-a ka ǹ gɔn nɛ wa, má wusoo má bɛn telenboenən yɛ. Bɛn tumaa wusoo ǹ nə́ yiikoonaabaa yɛ, ǹ nə́ giã pàã la kun ka Krita nɛ, yǎa lɛ̀ duu goon.

⁵Gere gialakunun kɛn ba boe la, ǹ tá yiikoonaabaa yii wa, yǎa lɛ̀ duu goon kɛ lɛ piɛ̃. Geren yii-kaa bibinaa nɛ ka bɛ nɛ.

⁶Min mɛnɛn gii bɛ́ á yɛ bɛa yii-kaa bibinaa kɛ lɛ nɛ, bɛn foo á re kɔɔ̃n koe, maǹ Lawa wɔn lɛa. Gɛ̀ a paabaa ǹ wɔ kɛ a boe bɛn la doo wa. Ǹ tá re Lawa laanka Krita a wúlu-bɔlen biɛ, ǹ goã pàã la kun ka Krita nɛ, yǎa lɛ̀ duu goon.

⁷Bɛ̀ lɛ̀ duu goon lɛ dɔ, ǹ tá re Sɛtaan boe kòso-n ǹ da.

⁸ Á re woe minin yiri siɛ̃ kanaa gùrù sii din tumaa nɛ, Gɔgə ne ka Magɔgə ne. Á re ǹ lɛ soekɔn ziabaa yii li, ǹ tá re mɔnɛɛ ka yìsi mu lɛkoro lɛ-a ǹ nyɔɔsɔ̃ bɛ́ lɔn.

⁹Ǹ nə́ ke ǹ nə́ soo kanaa paǹ tumaa li, ǹ nə́ die, Zeruzalɛmu kiwi mɛn bɛ́ kɔɔ̃n Lawa ganaa, a din a minin giã ǹ bǎã lɛa, ǹ nə́ bɛ lɛnpɛnɛ. Sɛnɛ, tɛ bɔ lon á daa ǹ tumaa kũkũ.

¹⁰Bɛ ganaa, ǹ nə́ nɔ̀ɔn babaraan kiã kɛ kũ, ǹ nə́ zũ kiribi tɛ panapana kɛ nɛ, ǹ goã ǹ nə́ Tɔɔ kɛ laanka a boo gii-dali soɛ-bɔle kɛ zũ bǎã mɛn nɛ ke lɛn. Ǹ tá re nɔmaa ǹ fuu yii walan baayɛlɛ ka tèlò ne yǎa duduu.

¹¹ Má wusoo má kii dankan fu gole yɛ, ka ǹ dɛnaa ná a nɛ. Lon laanka tán baa si ǹ nə́ papaã a nyɛɛnɛ, min wusoo á ǹ yɛ wa.

¹²Má geren tumaa yɛ, a bɔnboɛɛnɛn nɛ ka a dadaran nɛ, ǹ nə́ golee kii dankan lɛ yɔrɔ-a. Ǹ nə́ sɛ́wɔn lɛ bũ, geren lɛn sii-zɛnaan nə́ kiɛ̃ nɛ ǹ nɛ. Sɛ́wɔ kɔsɔ dɔ nə́ n lɛ bũ, yiikoonaabaa ǹ sɛ́wɔ n ka bɛ nɛ. Geren lɛn siin mɛnɛn bɛ́ kiɛ̃-n sɛ́wɔn lɛn nɛ, maǹ nə́ kiri kuru ǹ la bɛn lɛn li.

¹³Yìsi mu gole ná a geren kɔ. Gɛ̀ laanka geren piɛ dɔ ná a geren kɔ. Ǹ nə́ didie tumaa a kiri kuru a nya ǹ dí li.

¹⁴Ǹ nə́ gɛ̀ laanka geren piɛ kũ ǹ nə́ ǹ zũ tɛ panapana kɛ nɛ. Bɛa tɛ panapana kɛ lɛ n gɛ̀ a paabaa ǹ wɔ lɛ lɛa.

¹⁵Min mɛnɛn tumaa tɔ bɛ́ a yɛ yiikoonaabaa ǹ sɛ́wɔ lɛ-n wa, ǹ nə́ bɛn tumaa zũ tɛ panapana lɛ nɛ.