Read Samo, Southern SNS 21 Bible Online

SNS 21 - Samo, Southern bible

SNS 21

¹ Má tɔ́n lon dii laanka tán dii yɛ. Lon zizi kɛ laanka tán zizi kɛ papaã, yìsi mu gole dɔ din banban doo wa.

² Kiwi sonbore ke, Zeruzalɛmu dii lɛa, má tɔ́n bɛ yɛ boe lon Lawa li gisĩ tán. Á n yɔrɔ bɔ ka lɔ tii bɛ́ n yɔrɔ boe lɔn, a tɔn wo zuũ kion.

³ Má lɛn kaka goon ma boe kii dankan paǹ li, a n pii: «Kanna, Lawa a giã ǹ bǎã lɛ á ke minbuiinin bii! A n die giɛ̃ kunun ǹ ni, ǹ ná a din a zaman baa. Lawa dinmaa n die goɛ̃ kunun ǹ ni, a ǹ Lawa baa.

⁴ Á re ǹ yii mu tumaa tuturi a bɔ ǹ yɔrɔ nɛ, gɛ̀ ná a banban doo wa, gɛ̀-koa banban doo wa, duwəə ka là-paparɛɛ banban doo wa. Màn zizin kɛn nə́ papaã ǹ nə́ nya.»

⁵Min mɛn bɛ́ kii dankan nɛ, bɛ́ tɔ́n pɛ: «Kanna, má màn tumaa zɛnaa dii lɛa.» Á tɔ́n pɛ ma nɛ: «Kɛ kiɛ̃, a giala, masɛ a boon man taãn lɛa, ǹ nə́ kɔnboe ka foo doamaa nɛ.»

⁶Á tɔ́n pɛ doo kəni: «Màn tumaa nə́ n zɛnaa. Masɛ din nə bibinaa lɛa, masɛ din nə giala-nyɔmɔɔ dɔ lɛa, giala-kɔ nɛ ká a nya ǹ bǎã nɛ. Bɛ̀ mu boro tá min mɛn ganaa, mu mɛn bɛ́ yiikoonaabaa ǹ mu yala-n, masɛ á re bɛ koe la a mi kooro.

⁷ Min mɛnɛn bɛ́ re gɔ̀lɔ̀baa yii, ma din nə die bǐɛ̃ kɛ biɛ ǹ nɛ, ma á re ǹ Lawa biɛ, ǹ dɔn tá re n biɛ maa nɛnyaanan lɛa.

⁸Sɛnɛ, fɔ̃ ma din baa lɛ wolen wɔa paǹ li, ka bɔlɔgoondɛnaabaabaã wolen ne, min gɛsɛn nɛ, gɛ̀-dɛlen ne, din kũ doɛ̃baã wolen ne, minin yiri sã ǹ dagòã-bɔlen ne, dì wúlu-bɔlen ne, ka soɛ-bɔlen ne, bɛn tumaa a woo ǹ bǎã n ka kiribi tɛ panapana kɛ nɛ. A din lɛ dɔ n gɛ̀ paabaa ǹ wɔ lɛa.»

⁹Lon a dia dí-a wole sɔbaa mɛn bɛ́ ka paan sɔbaa nɛ ǹ gɔn, ǹ piɛ̃maa-n ka Lawa a koen giala-nyɔmɔɔ sɔbaa nɛ, bɛn goon daa ma li, á pɛ: «Daa ma Sère Nɛ a lɔ tii lɛ nyaa n nɛ, a lɔ-wɔsiɛ lɛ.»

¹⁰ Lawa a Yiri Fu gisĩ ma la, á ma saa, á woo ma nɛ kele gole sasa goon mìi ni: Kiwi sonbore ke, Zeruzalɛmu lɛa, má bɛ yɛ boe lon Lawa li gisĩ tán.

¹¹Lawa a siĩnbaa toa kiwi lɛ n tɛ pii ka gɛ̀fu sonbore zɔzɔnɔ bɛ́ lɔn, yii n wɔlɔ yii a nɛ.

¹² Kungɔn gole sasa na á kiwi lɛ lɛnpɛnɛ, kiɛnlɛ fulupaa ná a ganaa, lon a dia dí-a wole fulupaa nə́ ǹ lɛduĩ. Izirayeli tɔrɔ fulupaa lɛ tumaa tɔn n kiɛ̃ nɛ kiɛnlɛ fulupaa lɛ gogoonmaa ganaa.

¹³Lɛ̀giala-n, kiɛnlɛ sɔɔ, lɛ̀nyɛɛnɛ, kiɛnlɛ sɔɔ, gusin a lɛ̀ gùru la, kiɛnlɛ sɔɔ, gɔsɛ a lɛ̀ gùrù la, kiɛnlɛ sɔɔ.

¹⁴Maǹ nə́ kungɔn lɛ gòã daa gɛ̀fu fulupaa la, ǹ nə́ Sère Nɛ a dia dí-a wole fulupaa lɛ gogoonmaa tɔ kiɛ̃ gɛ̀fu lɛ gogoonmaa ganaa.

¹⁵ Lon a dia dí-a wole mɛn goã boo diɛ ma nɛ, màn zɔɔ̃ ǹ bàbàla ná a gɔn, sana lɛa, a n kiwi lɛ zoɛ̃ nɛ, a kungɔn nɛ, ká a kiɛnlɛn nɛ.

¹⁶Kiwi lɛ gùrù sii tumaa n goon, a sasabaa nɛ ka a pəməbaa nɛ. Lon a dia dí-a wole lɛ bɛ́ á zɔɔ̃, a na á goã biɛ yii duu fulupaa (12 000) a sasabaa li, hinlaa kilo duu paa ka biɛpaa (2 200). A pəməbaa nɛ, a sasabaa nɛ ka a wo lon ne, a din tumaa na á goã goon.

¹⁷Á tɔ́n kungɔn lɛ a wo lon zɔɔ̃, minbuiinin màn zɔ́ɔ yii li, gùrù yii paabiɛ ka pusiwensii (144), hinlaa mɛtərə pɔsɔrɔwensooro.

¹⁸ Maǹ nə́ kungɔn lɛ dɔ ka gɛ̀fu tɔrɔ goon ne a n zɔzɔnɔ. Kiwi lɛ dinmaa gɔ̀nɔn nə ka sana bɛ́ lɔn, yoreen ne, yii n wɔlɔ yii a nɛ.

¹⁹Maǹ nə́ kungɔn lɛ gòã daa ka gɛ̀fu tɔrɔ gigiã nɛ, gɛ̀fu tɔrɔ sonbore fulupaa nɛ. A gòã daa ǹ bǎã lɛ gogoonmaa a gɛ̀fu n tɔrɔ totoro lɛa, ǹ kɔ́n ná a goon ka ǹ miã-n wa, ǹ kɔ́n dɔ gɔ̀nɔn ba goon ka miã-n wa. A bibinaa n buu buruu tì lɛa, a paabaa ǹ wɔ n bɔlɔn lɛa, a sɔɔbaa ǹ wɔ n totoro a siibaa ǹ wɔ n buu buruu lɛa, a soorobaa ǹ wɔ n tã ka mà bɛ́ lɔn, a sɔrɔbaa ǹ wɔ n tã bonbon, a sɔbaabaa ǹ wɔ n buu buruu lɛa, a kiwisibaa ǹ wɔ n pupuru, a manangɔrɔbaa n wɔ n lɔɔ lɛa, a fùbaa ǹ wɔ n bɔlɔn buu buruu lɛa a fulugoon wɔ n tã lɔɔ-dɛnaa lɛa, a fulupaabaa ǹ wɔ n tã[3].

²¹A kiɛnlɛ-a ǹ goo fulupaa lɛ tumaa n gii tɔrɔ sonbore lɛa. Ǹ nə́ zɛnaa ka gii gole goon toto ne, ǹ nə́ wɔ kiɛnlɛ lɛ gogoonmaa lɛ. Zii gole mɛn bɛ́ kiwi lɛ bii, ǹ nə́ bɛ zɛnaa ka sana yoreen ne, yii n wɔlɔ yii a nɛ.

²²Ma Lawa a kion yɛ kiwi lɛ-n wa, a giala Dɛnaa Lawa Pàãyiidɛnaa din laanka Sère Nɛ lɛ din nə Lawa a kion lɛa.

²³ Kiwi lɛ laadoo ba wasa ganaa ka mui ni wɔlɔ tɔn fulu wa, a giala mà Lawa a siĩnbaa n wɔlɔ fúlu kiɛ a ganaa, Sère Nɛ kɛ na a wasa lɛa.

²⁴ Tɔrɔn tumaa á re tɔ we a din a tɛ fúlu li, kanaa a kiin tumaa á re die a nɛ ka ǹ gɔn mànan nɛ.

²⁵ Lɛawaa a biikoo tumaa li, a kiɛnlɛn ba n tiɛ̃ wa, a giala mà kiwi lɛ nɛ, tèlò a re koe wa.

²⁶Ǹ tá re die ka gánan tumaa gɔn màn siĩnin ni walan.

²⁷ Màn mɛn tumaa bɛ́ *gɔ̀ lɛa, bɛ kɔ́n ba we kiwi kɛ-n wa, min gɛsɛ a we wa, soɛ-bɔle dɔ a we wa. Sɛnɛ, min mɛnɛn tɔ bɛ́ kiɛ̃-n Sère Nɛ a yiikoonaabaa ǹ sɛ́wɔ kɛ nɛ, bɛn dininsɔɔ̃nɔn man we kiwi lɛ nɛ.