Read Samo, Southern SNS 22 Bible Online

SNS 22 - Samo, Southern bible

SNS 22

¹ Lon a dia dí-a wole lɛ tɔn yiikoonaabaa ǹ tà mu lɛ nyaa ma nɛ, tɛ pii ka gɛ̀fu mɛn bɛ́ yii n wɔlɔ yii a nɛ. Bɛa mu lɛ na á goã soe Lawa laanka Sère Nɛ a kii dankan paǹ li.

² A n baa sii kiwi lɛ a zii gole kɛ la. Yiikoonaabaa ǹ da n zumii ni tà mu lɛ paǹan paanan li, da lɛ n nɛ koe gunyin fulupaa lɛ̀ goon gɔ́ɔ̃ nɛ, gunyin goon mui tumaa gɔ́ɔ̃ nɛ. A luu n dagòã lɛa, a n gánan tumaa a busu nyɛɛ.

³ Bɔ̀n ba min yii walan doo wa. Lawa laanka Sère Nɛ a kii dankan tá re goɛ̃ kiwi lɛ nɛ, a dí-nyalin nə́ die a guguru koe walan.

⁴Ǹ tá re a yɔrɔ yii, a tɔ á re goɛ̃ kiɛ̃ nɛ ǹ nyanlɛ ganaa.

⁵ Tèlò a re koe wa, min kɔ́n laadoo a re goɛ̃ bolon fúlu ganaa, ka wasa a yoo lon ne wa, a giala mà Dɛnaa din tá re a fúlu kiɛ ǹ ganaa. Ǹ tá re goɛ̃ pàã la baraabaraa yǎa duduu.

⁶Lon a dia dí-a wole lɛ tɔ́n pɛ ma nɛ: «Boon kɛn man taãn lɛa, ǹ nə́ kɔnboe ka foo doamaa nɛ. Dɛnaa Lawa na á lɛ kɔ a boo gii-dalin la ka a din yiri ni, a ná a lon a dia dí-a wole dia, mà sii mɛnɛn bɛ́ re n zɛnɛɛ sisia mà a wo bɛ pɛ a dí-nyalin manɛ.»

⁷Yezu n pii: «Á ke, ma á die kànaa ka boɛɛn nɛ! Min mɛnɛn bɛ́ Lawa a boo gii-dalibaa ǹ boon kɛn miɛ sɛ́wɔ kɛ nɛ, ǹ nə́ ǹ lɛ sii, Lawa á re barka diɛ bɛn ganaa.»

⁸Masɛ Zaã mɛn bɛ́ má boon kɛn ma, má a siin tumaa yɛ. Ma bɛ́ má ǹ ma, má ǹ yɛ má nya, lon a dia dí-a wole mɛn bɛ́ á ǹ nyaa ma nɛ, má kaa tán a giulun, máa ma na a guguru koe.

⁹Sɛnɛ, á pɛ ma nɛ: «N nyan toa n bɛ zɛnaa wa! Masɛ dɔ n Lawa a dí-nyali lɛa ka n dɔ bɛ́ lɔn, ka n dɔɔ̃n Lawa a boo gii-dalin bɛ́ lɔn, ka min mɛnɛn tumaa bɛ́ sɛ́wɔ kɛ a boo miɛ, ǹ ná a lɛ sii. Wɔ tumaa n goon, Lawa dinsɔɔ̃ guguru kɔ!»

¹⁰Á tɔ́n pɛ ma nɛ: «N nyan sɛ́wɔ kɛ a Lawa a boo gii-dalibaa ǹ boon kɛn gũ n gɔ́ɔ̃-n wa, a giala mà biikoo mɛn nə n koa siin kɛn lɛa, á diri foɛɛ̃nɛ.

¹¹ Bɛ̀ min mɛn tá kɔkɔrɔ, bɛ goã kɔkɔrɔ, min mɛn bɛ́ gɔgɔrɛ, bɛ dɔ goã gɔgɔrɛ. Sɛnɛ, min mɛn bɛ́ pepere, bɛ goã pepere, min mɛn dɔ bɛ́ min sonbore lɛa, bɛ dɔ goã min sonbore lɛa.»

¹² Yezu n pii wɔ-n doo: «Á ke, ma á die kànaa ka boɛɛn nɛ! Man die ka kaa saraan nɛ ma gɔn, man die koe didie tumaa la a sii-zɛnaa yii li.

¹³ Masɛ din nə bibinaa lɛa, ma din nə giala-nyɔmɔɔ dɔ lɛa, giala-kɔ nɛ, ka a nya ǹ bǎã nɛ.»

¹⁴ Min mɛnɛn bɛ́ wusii ǹ siin kio, ǹ nə́ goɛ̃ *yoreen ne, bɛn foo á re kɔɔ̃n koe, a giala masɛ n lɛ koe ǹ la, ǹ yiikoonaabaa ǹ da nɛ bii, ǹ tá re we ka kiwi lɛ a kiɛnlɛn nɛ.

¹⁵Sɛnɛ, min baraan nɛ, minin yiri sã ǹ dagòã-bɔlen ne, min gɛsɛn nɛ, gɛ̀-dɛlen ne, dì wúlu-bɔlen ne, ka min mɛnɛn tumaa bɛ́ soɛ-bɔ narɛ, ǹ ná a sii zɛnɛɛ, bɛn kɔ́n ba re we kiwi lɛ gɔ́ɔ̃-n wa.

¹⁶ Ma din Yezu má lon a dia dí-a wole dia máa a da bɛ lɛ tumaa pɛ Lawa a sɔmɔn minin manɛ. Masɛ n Davida tɔrɔ lɛa, ma ń baayɛlɛ a leere tɛ-pɛle lɛa.

¹⁷ Yiri Fu ni ka Lawa a sɔmɔ minin ni bɛn man pii: «Daa.» Min mɛn dɔ too bɛ́ á ma, a dɔ́ pɛ: «Daa.» Mu boro bɛ́ min mɛnɛn ganaa ǹ dɔn nə daa, bɛ̀ ǹ mɛn tá giɛ yiikoonaabaa ǹ mu li, a yɛ kooro.

¹⁸ Masɛ Zaã a gòon lɔ tán-a ǹ boo n ke: Min mɛn tumaa bɛ́ re sɛ́wɔ kɛ a Lawa a boo gii-dalibaa ǹ boon kɛn miɛ, bɛ̀ ǹ dɛnaa màn boɛɛn kooro da li, koen mɛnɛn bɛ́ kiɛ̃-n sɛ́wɔ kɛ nɛ, Lawa á re dɔlɔ boe ǹ dɛnaa ganaa ka bɛn nɛ.

¹⁹Bɛ̀ ǹ dɛnaa dɔ́ màn boɛɛn kooro bɔ lɛ, ǹ dɛnaa gii mɛn bɛ́ yiikoonaabaa ǹ da nɛ kɛ nɛ, ka kiwi sonbore kɛ nɛ, a siin mɛnɛn bɛ́ kiɛ̃-n sɛ́wɔ kɛ nɛ, Lawa á re bɛ kuri ǹ dɛnaa lon.

²⁰Min mɛn bɛ́ golee sɛ́wɔ kɛ a boon taãnbaa li, ǹ dɛnaa n pii: «Hiĩ. Ma á die sisia!» A n baa miɛ̃. Dɛnaa Yezu, daa!

²¹Wɔa Dɛnaa Yezu a bǐɛ̃ die a goã ka tumaa li.