Read Samo, Southern SNS 5 Bible Online

SNS 5 - Samo, Southern bible

SNS 5

¹ Min mɛn bɛ́ giã-n tán kii dankan nɛ, má sɛ́wɔ yɛ a gusin a gɔn nɛ, sɛ́wɔ lɛ gɔ́ɔ̃ kiɛ̃maa nɛ, ka a dɔ̀ɔ̃ nɛ, ǹ ná a lɛ tã ka zoo gón ne wɔlɔ sɔbaa, ǹ nə́ n gòon bǎã da a nɛ.

²Bɛ kio, má lon a dia dí-a wole pàãdɛnaa goon yɛ, a n pii ka lɛn gole ne: «Die n kɔnboe, a sɛ́wɔ kɛ a lɛ tã ǹ bǎã kɛ bɔyaa a bɔ a ganaa, a na a lɛ bũ?»

³Sɛnɛ, min kɔ́n yɛ lon, ka tán nɛ, ka tán giulun ni, a n boe la a sɛ́wɔ kɛ lɛ bũ, a n yii kɔ a-n wa.

⁴Ma foo ziziɛ̃ parsiini, a giala mà min kɔ́n yɛ, a n kɔnboe ka sɛ́wɔ kɛ a lɛ buĩ ni, a n yii kɔ a-n wa.

⁵ Min golen kɛn goon tɔ́n pɛ ma nɛ: «N nyan wuu pɛ wa! Á ke, Zudaa tɔrɔn Yàra ke kii Davida a nɔ̀ɔn lɛa! Á gɔ̀lɔ̀baa yɛ lɛlɛ. Á re sɛ́wɔ kɛ a lɛ tã ǹ bǎã sɔbaa kɛ bɔyɛɛ a bɔ a ganaa, a na a lɛ bũ.»

⁶ Má tɔ́n Sère Nɛ yɛ, kii dankan kɛ genli, màn yiikoonaa sii kɛ laanka min golen kɛn ná a lɛnpɛnɛ. Bɛa Sère Nɛ lɛ n ka maǹ ná a bɔlɔ kuru. A bɛn nə sɔbaa, a yii nàn dɔ n sɔbaa, Lawa yiri sɔbaa mɛn dia tán tumaa la, bɛn man ka bɛ nɛ.

⁷Min mɛn bɛ́ giã-n kii dankan nɛ, ka sɛ́wɔ lɛ ná a gusin ni, Sère Nɛ lɛ nə́ n zɔ̃ á dɔ a li, á tɔ́n sɛ́wɔ lɛ kɔ la.

⁸ A bɛ́ á sɛ́wɔ lɛ si biikoo mɛn li, màn yiikoonaa pàãdɛnaa sii kɛ laanka *min gole fuəwensii kɛ kaa tán Sère Nɛ lɛ giulun, tùtu n didie gɔn. Sana donkolon dɔ n didie tumaa gɔn, a piɛ̃maa-n ka màn gìĩ kɔɔ̃n-a nɛ. Bɛa màn gìĩ kɔɔ̃n-a lɛ n Lawa a min sonboren Lawa-nyankɔ giala pii.

⁹ Maǹ nə́ goã loe tii loe kɛnɛn: «Ń kɔnbɔ n sɛ́wɔ kɛ si, ń kɔnbɔ n na a lɛ tã ǹ bǎãn kɛn bũ, a giala, n din ni ǹ nə́ n baa *wúlu màn lɛa. Ń minin pii ka n din mà nɛ, ń kɔ Lawa la, ǹ nə́ zaman gigiã lɛa, tɔrɔ tumaa lɛa, gána tumaa minin lɛa, ǹ nə́ bɔlɔ tumaa pii.

¹⁰ Kanna, ka bɛ nɛ, n nə́ ǹ tumaa bɔyaa duduu n nə́ ǹ baa wɔa Lawa a dí-nyalin lɛa, n nə́ ǹ baa a wúlu-bɔlen lɛa, n nə́ ǹ baa kii dadaran lɛa, ka boo taãnɛ, n nə ǹ baa kanaa tumaa a dɛnan lɛa.»

¹¹ Ma bɛ́ giɛ doo, má lon a dia dí-a wole gigiã lɛn ma, ǹ nə́ dɔ duu damata damata, min ná a boe la a ǹ nimi wa. Ǹ nə́ golee ǹ nə́ min golen laanka màn yiikoonaa pàãdɛnan kɛn giã ǹ bǎã lɛnpɛnɛ,

¹²ǹ nə́ goã loe loe ka ǹ lɛn gole ne, ǹ nə́ pii: «Nsɛ Sère Nɛ mɛn bɛ́ ǹ nə́ Lawa a wúlu bɔ n nɛ lɛlɛ, ń kɔnbɔ ka pàãyiidɛnaabaa nɛ, ka pàãmabaa nɛ, ka sii-doɛ̃ nɛ, ka kakabaa nɛ, ka tɔ golebaa nɛ, ka guguru-kɔ nɛ, ka tɔ-bɔ nɛ.»

¹³Bɛ lɛ nɛ, màn-zɛnaa mɛn tumaa bɛ́ lon, ka tán nɛ, ka tán giulun ni, ka yìsi mu gole ne, ǹ nə́ piɛ̃-silin lɛa kanaa paǹ din tumaa ganaa, má ǹ lɛn ma, ǹ nə́ loe loe ǹ nə́ pii: «Min mɛn bɛ́ giã-n kii dankan nɛ, ka Sère Nɛ kɛ nɛ, tɔ bɔ n kaa wɔ lɛa, tɔ golebaa n kaa wɔ lɛa, gugurubaa n kaa wɔ lɛa, pàãyiidɛnaabaa n kaa wɔ lɛa, baraabaraa yǎa duduu.»

¹⁴Màn yiikoonaa pàãdɛnaa sii kɛ na á goã ǹ lɛ sii: «Taarɛ. A n miɛ̃!» Min golen kɛn dɔn nə́ kaa tán-a ǹ nə́ ǹ guguru koe.