Read Samo, Southern SNS 7 Bible Online

SNS 7 - Samo, Southern bible

SNS 7

¹ Bɛ kio, má lon a dia dí-a wole màn sii yɛ golee-n tán gùrù sii kɛ ganaa. Ǹ nə́ tán a piɛ̃ màn sii kɛ kũ ǹ nə́ golee ne, ń giɛ piɛ̃ nyan bɔ tán la wa, a nyan bɔ yìsi mu gole la wa, a nyan kaa da kɔ́n ganaa wa.

²Má tɔ́n lon a dia dí-a wole goon yɛ doo, á n toa lɛ̀giala-n á dii lon, Lawa yiikoonaa a nyaǹ kiɛ̃ ǹ màn kɛ ná a gɔn. Lawa pàã kɔ lon a dia dí-a wole sii mɛn la, mà ǹ tán laanka yìsi mu gole nɔmaa, á n lɛn gole bɔ, á paraa bɛn li, á pɛ ǹ nɛ:

³ «Ka n dinin kũ. Tán nɛ, yìsi mu gole ne hinlaa dan nɛ, ka nyan sii kɔ́n zɛnaa bɛn man bɔrɔ wa, yǎa wɔsɛn nə nyaǹ kiɛ̃ wɔa Lawa a dí-nyalin nyanlɛ ganaa wɔ nya.»

⁴Ǹ nyaǹ kiɛ̃ min mɛnɛn ganaa ǹ nə́ tɔ́n bɛn lɛ pɛ, má ma: Minbuiin duu paabiɛ ka pusiwensii (144 000) ni, ǹ nə́ ǹ nyaǹ kiɛ̃, ǹ nə́ boe Izirayeli gána paǹ din tumaa nɛ.

⁵Zudaa tɔrɔn li maǹ nə́ duu fulupaa (12 000) nyaǹ kiɛ̃, Urubɛn tɔrɔn li duu fulupaa, Gaadi tɔrɔn li duu fulupaa,

⁶Asɛɛrɛ tɔrɔn li duu fulupaa, Nɛfutalii tɔrɔn li duu fulupaa, Manaasee tɔrɔn li duu fulupaa,

⁷Simiɔn tɔrɔn li duu fulupaa, *Levii tɔrɔn li duu fulupaa, Isakaara tɔrɔn li duu fulupaa, Zabulɔn tɔrɔn li duu fulupaa,

⁸Zozɛfu tɔrɔn li duu fulupaa, Bɛnzamɛn tɔrɔn li maǹ nə́ duu fulupaa nyaǹ kiɛ̃.

⁹Bɛ kio, má zaman gole yɛ, min kɔ́n ná a boe la a tá ǹ nimii wa. Ǹ nə́ golee ǹ gòãn la, kii dankan kɛ yɔrɔ-a ka Sère Nɛ kɛ nɛ, mɔnaa fufun ni ǹ ganaa ka gɔ̀lɔ̀baa ǹ da luun nə́ ǹ gɔn. Maǹ zaman gigiã lɛa, ǹ nə́ boe gána tumaa nɛ, ǹ nə́ tɔrɔ tumaa lɛa, ǹ nə́ bɔlɔ totoro tumaa pii.

¹⁰Maǹ nə n lɛn siɛ lon ǹ nə́ pii: «Wɔa Lawa mɛn bɛ́ giã-n kii dankan nɛ, ka Sère Nɛ kɛ nɛ, gɔ̀lɔ̀baa n bɛn wɔ lɛa.»

¹¹Lon a dia dí-a wole mɛn tumaa goã soe-n kɔn, ǹ nə́ kii dankan kɛ lɛnpɛnɛ, ka min golen kɛn nɛ, ka màn yiikoonaa pàãdɛnaa sii kɛ nɛ, ǹ nə́ kaa tán-a kii dankan lɛ yɔrɔ-a, ǹ nə́ n yɔrɔ kɔ tán lɛ, ǹ nə́ Lawa guguru kɔ.

¹²Ǹ nə́ goã pii: «Taarɛ! A n miɛ̃! Tɔ-bɔ nɛ, ka guguru-kɔ nɛ, sii-doɛ̃ nɛ, ka bǐɛ̃-doɛ̃ nɛ, tɔ gole kɔ nɛ, pàãdɛnaabaa nɛ, ka kakabaa nɛ, bɛn man wɔa Lawa wɔn lɛa baraabaraa yǎa duduu! A n miɛ̃.»

¹³Min golen lɛn goon tɔ́n boo saa á nɔ̀n da ma la: «Minin kɛn dɔnkɛ fufun ni ǹ ganaa dien manɛ? Maǹ boe maa?»

¹⁴ Má tɔ́n pɛ nɛ: «Giĩ gole, n din tá doɛ̃!» Á tɔ́n pɛ ma nɛ: «Maǹ boe damagɔ́ɔ̃li a fuu yɛ ǹ bǎã gole kɛ nɛ. Maǹ nə́ ǹ dɔnkɛn lɛn pii ka Sère Nɛ kɛ mà nɛ, ǹ nə́ fu kɔ.

¹⁵Bɛ lɛ n toɛ ǹ tá golee ne, Lawa a kii dankan yɔrɔ-a, ǹ nə́ Lawa guguru koe baayɛlɛ ka tèlò ne Lawa a Kion. Min mɛn bɛ́ kii dankan lɛ nɛ, bɛ á re a din a wúlu kumii ǹ la.

¹⁶ Bòo á re ǹ kuĩ doo wa, mu boro á re n kuĩ doo wa, wasa fuu kaka a re ǹ dii doo wa.

¹⁷ A giala, Sère Nɛ mɛn bɛ́ golee-n kii dankanan kɛn bii, bɛ á re ǹ lɛduĩ, á re woe ǹ ne yiikoonaabaa ǹ mu yala lɛa. Lawa á re ǹ yii mu tumaa tuturi a bɔ ǹ yɔrɔ nɛ.»