Read Samo, Southern SNS 9 Bible Online

SNS 9 - Samo, Southern bible

SNS 9

¹Lon a dia dí-a wole soorobaa ǹ wɔ tɔ́n a bɛn pɛ. Má yɛ leere goon bɔ lon á mɛ tán. Ǹ nə́ nɔmaa ǹ nyankɔrɔ zuzulu kɛ a goo nɛ kɔ la.

² Leere lɛ bɛ́ á bɛa nyankɔrɔ zuzulu kɛ lɛ lɛ bũ, tɛmaa soo a nɛ, a n kɔnboe ka kùsì kaara tɛmaa nɛ. Nyankɔrɔ lɛ a tɛmaa wasa kũ á baa tì ka lon tumaa nɛ.

³ Bisinin nə́ soo tɛmaa lɛ nɛ, ǹ nə́ n nyɔmaa tán la. Ǹ sɔn-dɔ lɛ n we ka ton wɔ bɛ́ lɔn.

⁴ Ǹ nə́ pɛ ǹ nɛ, mà ǹ nyan toa ǹ basaã kɔ buu kɔ́n nɛ wa, ǹ nyan toa ǹ basaã kɔ da laanka màn zumii kɔ́n nɛ wa. Sɛnɛ, minin mɛnɛn bɛ́ Lawa a nyaǹ ná a kiɛ̃ nɛ ǹ nyanlɛ-a wa, mà ǹ basaã kɔ bɛn nɛ.

⁵Ǹ lɛ kɔ bisinin lɛn la mà ǹ minbuiinin dɛ ǹ gã wa, sɛnɛ, mà ǹ bɔ ǹ yii ni yǎa mui sooro. Ǹ bɛ́ boe ǹ yii-n ka yɔrɔ mɛn nɛ, a lɛ n busi ka ton na á sɔn dɔ min ganaa.

⁶ Bɛa mui sooro kɛ lɛ gɔ́ɔ̃ nɛ, minbuiinin tá re giɛ gɛ̀ li mà ǹ gã, sɛnɛ, ǹ ba re yii wa. Ǹ tá re n yiri koɛ gɛ̀ ganaa, sɛnɛ, gɛ̀ á re lɛ koe a n mɔrɔ ǹ ganaa wa.

⁷ Bɛa bisinin lɛn man nə́ kɔnbɔ ka sùin mɛnɛn bɛ́ ǹ nə́ ǹ yɔrɔ bɔ, ǹ nə́ re woe ǹ ne zia la. Mànan manə ǹ mìi ganaa ka sana kii bafolon bɛ́ lɔn, ǹ yɔrɔn dɔn man nə́ kɔnbɔ ka minbuiin yɔrɔ nɛ.

⁸ Ǹ mìi ka n sɔsɔrɔ ka lɔ mìi ka bɛ́ lɔn, ǹ sɔn man ka yàra sɔn bɛ́ lɔn.

⁹ Ǹ foobii n ka maǹ nə́ fɔlɔ dɔnkɛ wɔ a ganaa. Sùin bɛ́ ziabaa ǹ wotoro mɛn baɛ̃, bɛ̀ ǹ tá woe zia la, ǹ nyàa ka wuu n boe ka bɛ wuu bɛ́ lɔn.

¹⁰Ǹ mui lɛwɔn na a tan pɛpɛnɛ ka ton wɔ bɛ́ lɔn, sèwò n bɛa muin kɛn lɛn nɛ, ń giɛ ǹ tá boe la ǹ bɔ minbuiin yii ni yǎa mui sooro.

¹¹Min mɛn bɛ́ nɔmaa ǹ nyankɔrɔ zuzulu lɛduĩ, bɛ nə ǹ kii lɛa, á ǹ nyɛɛnaan sa boe. Maǹ bíi "Minin-Ziziɛ̃li", *Ebrəə bɔlɔ nɛ, maǹ bíi "Abadɔn", Grɛki bɔlɔ nɛ, maǹ bíi "Apoliɔn".

¹²Bɔ̀n bibinaa kɛ kiɛ̃, sɛnɛ, bɔ̀n màn paa kɔsɔ doamaa nɛ a da bɛ kio.

¹³ Lon a dia dí-a wole sɔrɔbaa ǹ wɔ tɔ́n a bɛn pɛ. *Wúlu bɔ ǹ bǎã mɛn bɛ́ sana lɛa, a n doa-n Lawa din yɔrɔ-a, má lɛn goon ma boe bɛ kara sii din tumaa ganaa.

¹⁴Lon a dia dí-a wole sɔrɔbaa ǹ wɔ mɛn bɛ́ á golee ka a bɛn nɛ a gɔn, lɛn lɛ na á goã pii bɛ nɛ: «Lon a dia dí-a wole màn sii mɛn bɛ́ ǹ nə́ ǹ yii Efrati tà gole lɛ-a, wo ǹ fore n nə ǹ kaa.»

¹⁵Ǹ nə́ lon a dia dí-a wole màn sii lɛ kaa. Maǹ nə́ goã ǹ nə́ ǹ yɔrɔ bɔ lɛlɛndun bɛa biikoo kɛ lɛ a lɛa, bɛa lɛawaa lɛ a lɛa, bɛa mui lɛ a lɛa, bɛa lɛ̀ kɛ lɛ nɛ, ǹ doamaa nɛ ǹ minbuiinin talakɔn sɔɔbaa ǹ wɔ dɛ ǹ gã.

¹⁶Sɔraasi sùidɛnan mɛnɛn bɛ́ woe zia lɛ biɛ kunun ǹ ni, má ma, mà min pùru biɛpaa (200 000 000) nɛ.

¹⁷Ma sùidɛnan lɛn yɛ ka yɔrɔ mɛn nɛ, bɛ yɔrɔ n ke: Maǹ nə́ fɔlɔ dɔnkɛ tãtãn wɔ, bɔlɔn lɛa, ka kùsi ni. Ǹ sùin lɛn mìi n ka yàra mìi bɛ́ lɔn, ǹ lɛ n tɛ boe, ka kiribi wùsu ni ka tɛmaa nɛ.

¹⁸Bɛa koe, bɔ̀n màn sɔɔ kɛ n soe ǹ lɛ-n, tɛ nɛ, ka kiribi wùsu ni, ka tɛmaa nɛ, bɛn lɛn man nə́ minbuiin talakɔn sɔɔbaa ǹ wɔ dɛ ǹ nə́ gã.

¹⁹Sùin lɛn koe bɔ ǹ pàã tumaa na á goã ǹ lɛ-n ka ǹ mui ni. Ǹ muin lɛn man nə́ goã ka miɛ̃n bɛ́ lɔn, mìi nə́ ǹ ganaa ǹ nə́ min yawɛɛ nɛ.

²⁰ Sɛnɛ, minbuiin gialakun mɛn goã, ǹ nə́ ǹ gã koen kɛn lɛn gɔ́ɔ̃-n wa, bɛa minin kɛn lɛn nə wusoo ǹ nya ǹ dín kio wa. Ǹ nɔ̀ɔnɔn guguru koe laanka dì wúlu boe lɛ da wa. Ǹ dinin man nə́ bɛa dìn lɛn zɛnaa ka sana nɛ, ka wɔrɔ nɛ, ka zan nɛ, ka kɔlɔ nɛ, ka gɔn nɛ. Ǹ yii a wɔlɔ yii wa, ǹ too a boo miɛ wa, ǹ ba tɔ we doɛ̃ wa.

²¹Ǹ nə n taasɛ ǹ nə́ wusoo ǹ gɛ̀-dɛn kio, dabara sii zɛnaa nɛ, naarɛbaa nɛ, ka wurumu baa-n wa.