Read Samo, Southern Sam1 13 Bible Online

Sam1 13 - Samo, Southern bible

Sam1 13

¹Sayulu bɛ́ kii biɛ, bɛ̀ á dɔ lɛ̀ dan kɔn[16]. Á goã Izirayeli minin mìi la, á biikoo kɔn saa.

²Sayulu giĩ duu sɔɔ (3 000) bɔ Izirayeli gána nɛ. A duu paa (2 000) goã kun ka a din ni Mikmaasi kiwi, ka Betɛli kele la nɛ. Á duu goon (1 000) kɛ dɔ́ goã kun ka Zonaatan nɛ Gibeya, Bɛnzamɛn tɔrɔn tán la. Sayulu zaman gialakun lɛ dia piɛ.

³Filisiti minin pàãdɛnaa mɛn bɛ́ á goã Gebaa, Zonaatan zia da a ganaa, á boo la. Filisiti minin lɛn nə́ bɔ a siére-a. Sayulu tɔ́n minin da bɛn pɛ ganaa Izirayeli gɔ́ɔ̃ din tumaa nɛ. Maǹ nə́ goã pii: «*Ebrəən lɛn tumaa, ka n too kɔ!»

⁴Izirayeli tumaa ma, mà Sayulu zia da Filisiti minin pàãdɛnaa lɛ ganaa á boo la, bɛ́ nɔmaa á Izirayeli gána dinmaa tìĩ bɔ Filisiti minin lɛn nyin ni. Zaman lɛ tumaa tɔ́n nə n sɔkɔn, ǹ nə́ kaa kun ka Sayulu ni Gilgaali kiwi.

⁵Filisiti minin lɛn nə́ n yɔrɔ bɔ ǹ nə́ die zia biɛ Izirayeli minin ganaa. Ǹ zia da ǹ wotoron man nə́ goã duu pɔsɔɔ (30 000), ǹ sùidɛnan man nə́ goã duu sɔrɔ. Ǹ sɔraasin man nə́ goã mɔnaa nɛ ka n pɛ mà kɔ̀ mu lɛ-a ǹ nyɔɔsɔ̃ nɛ. Ǹ nə́ woo giã Mikmaasi, Bɛti-Avɛn a lɛ̀giala gɔn la.

⁶Izirayeli minin lɛn yii na á goã a ganaa mà ǹsɛn tá re bɔ̀n biɛ, a giala, Filisiti minin lɛn nə́ kunu kɔ zaman lɛ ganaa ǹ ná a lɛ gɛwaa. Zaman lɛ nə́ n duru kele yalan nɛ, kɔlɔ biin ni, nyankɔrɔ gɔ́ɔ̃n nɛ, ka da kusin ni.

⁷Ebrəə minin nə́ yɛ, ǹ nə́ Zurdɛ̃ tà lɛ kuru, ǹ nə́ woo Gaadi gána laanka Galaati gána nɛ. Bɛ́ daa yaa bɛ̀ Sayulu tá tɔn Gilgaali, zaman lɛ din tumaa gɔ̀nɔn nə́ bìn diɛ a kio.

⁸ Sayulu nə́ n yii da Samayeli la yǎa lɛawaa sɔbaa, ka Samayeli din pɛ lɔn. Sɛnɛ, Samayeli da Gilgaali wa. Zaman lɛ sasawaa á Sayulu toa walan.

⁹Sayulu tɔ́n pɛ: «Ka da ka tɔɔn nɛ ka ǹ baa *wúlu màn tiɛ̃ laanka barka da ǹ wúlu mànan lɛa.» Sayulu wúlu bɔ ka wúlu màn tiɛ̃ lɛ nɛ.

¹⁰A bɛ́ wúlu màn lɛ tiɛ̃ nyɛɛ gɔrɔ, bɛ̀ Samayeli dɔ á ke á dɔ. Sayulu soo, á woo ǹ da lɛ, á fòo da nɛ.

¹¹Samayeli pɛ: «Wàa mɛn sii n ke ń zɛnaa?» Sayulu ná a lɛ si: «Masɛ ga a ganaa, zaman lɛ n sasawɛɛ ma toɛ walan, n dinmaa lɛ biikoo mɛn bɔ ń koa, n bɛ́ n ba die bɛ li wa, ka bɛ dɔ nɛ, Filisiti minin lɛn nə́ n sɔkɔn Mikmaasi,

¹²bɛ lɛ n ke má taasɛ: Filisiti minin lɛn tá re die ma gialaa Gilgaali, a da yaa, ma tɔn Dɛnaa Lawa foo basã bɔrɔ wa. Bɛ lɛ na á ma da wúlu màn lɛ a tiɛ̃ ganaa.»

¹³Samayeli pɛ Sayulu ni: «Gaãnaa baa ǹ dí n ke ń nya. Dɛnaa Lawa lɛ, kaa Lawa lɛa, bɛ dí mɛn kɔ n la, ń nə n piã ka bɛ nɛ. A na á goã bɛ̀ Dɛnaa Lawa n die toɛ kii lɛa miɛ̃ duduu Izirayeli mìi la.

¹⁴ Sɛnɛ, sisia, n pàã lɛ ba re woe nyɛɛn wa. Dɛnaa Lawa min bɔ, min mɛn a sii bɛ́ kiɛ a foo la. Dɛnaa Lawa bɛa dɛnaa lɛ koa a zaman lɛ nyɛɛnaan-bole lɛa, a giala, Dɛnaa Lawa dí mɛn kɔ n la, n nə n piã nɛ.»

¹⁵Samayeli nə́ n toa Gilgaali, á zii saa a woo Gibeya Bɛnzamɛn tɔrɔn tán la. Zaman mɛn goã kun ka Sayulu ni, á ǹ nimi ǹ nə́ dɔ min biɛ sɔrɔ kɛ miã (600).

¹⁶Sayulu ni, a nɛgiĩ Zonaatan nɛ ka zaman mɛn goã kunun ǹ ni, ǹ tumaa golee Gebaa, Bɛnzamɛn tɔrɔn tán la. Bɛ́ daa yǎa bɛ̀ Filisiti minin lɛn sɛn tá Mikmaasi.

¹⁷Sɔraasi kuru sɔɔ nə́ n toa Filisiti minin giã ǹ bǎã lɛ nɛ, ǹ nə́ die basaã koe. Kuru goon nə́ n yɔrɔ dia Ofra li, Suwali gána nɛ,

¹⁸a paabaa ǹ wɔ nə́ n yɔrɔ dia Bɛti-Ɔrɔn li. Gèlè mɛn nə́ ke Siiboamu mìi lalan, dia-n woe diə gole ganaa, a sɔɔbaa ǹ wɔ nə́ n yɔrɔ dia walan li.

¹⁹Izirayeli gána kuturu lɛ nɛ, min goã n niɛ̃ fuũ-n doo wa, a giala, Filisiti minin lɛn man nə́ goã ǹ nə́ taasɛ mà a doamaa bie Ebrəən lɛn nə́ gɔya san laanka sɛmiɛ̃n zɛnaa wa.

²⁰Izirayeli minin man nə́ goã woe ǹ dí nya ǹ mànan lɛ dii, Filisiti minin lɛn li: diin kána sɔ nɛ, kána nɛ, sukun ni, sɛ̀miɛ̃ nɛ, sɛǹ gɔya nɛ.

²¹Maǹ nə́ goã bɛa dí nya n mànan kɛn lɛn tumaa lɛ dii giɔ̀mɔ kaka ganaa: diin kána sɔn lɛn nɛ, kánan lɛn nɛ, sɛ̀miɛ̃n lɛn nɛ, sɛǹ gɔyan lɛn nɛ ka tɔɔ da baa-a ǹ kiɛn nɛ.

²²Ziabaa pinaa, bɛ̀ á n bɔ Sayulu din laanka a nɛ Zonaatan nɛ, gɔya hinlaa sɛmiɛ̃ goã ǹ kiodɛnan lɛn kɔn gɔn wa.

²³Filisiti minin lɛn sɔraasi kuru goon daa n doa Mikmaasi kiwi a kiɛ̃ ǹ bǎã nɛ.