Read Samo, Southern Sam1 18 Bible Online

Sam1 18 - Samo, Southern bible

Sam1 18

¹Davida bɛ́ á boo da ka Sayulu ni á nya, Zonaatan dama Davida ganaa, á narɛ ka a dinmaa bɛ́ lɔn.

²Bɛa pinaa kɛ lɛ nɛ, Sayulu Davida kurəə a toa á n bɔyaa á woo ǹ di li wa.

³Zonaatan nə́ n lɛ kɔ Davida la, a giala, a na á goã narɛ ka a dinmaa bɛ́ lɔn.

⁴Dɔnkɛ gole mɛn goã Zonaatan ganaa, á sɔlɔ á kɔ Davida la. Zonaatan ná a mɔnaan dɔn kɔ la, haalɛ a gɔya sa, a sa nɛ ka a maabɛlɛ nɛ, á bɛn dɔn kɔ la.

⁵Sayulu goã Davida diɛ woe koe bǎãn mɛnɛn tumaa lɛ, á goã gɔ̀lɔ̀baa yii. Sayulu Davida kũ á da a zia-baalin mìi la. Davida a sii goã siĩni zaman lɛ tumaa yii li. Á goã siĩni Sayulu a dí-nyalin dɔn yii li.

⁶Davida bɛ́ á Filisiti min lɛ dɛ, a nə́ n bɔyɛɛ die piɛ kun ka sɔraasin lɛn nɛ, lɔn nə́ soo Izirayeli a kiwin tumaa nɛ ǹ nə́ daa ǹ da kii Sayulu lɛ. Lɔn lɛn bɛ́ die, maǹ nə́ goã loe loe, bɛ̀ biɛ tùtu laanka maà wuu li, bɛ̀ ǹ tá ǹ nyɛnyɛɛ ǹ lɛ dii.

⁷ Lɔn lɛn bɛ́ nyɛnyɛɛ la, maǹ nə́ goã siɛ loe-n kun kɛnɛn: «Sayulu na á min gigiã dɛ, sɛnɛ Davida ná á min duu damata dɛ.»

⁸Boo lɛ kɔɔ̃n kɔ Sayulu ganaa wa. A foo yoo parsiini, á tɔ́n pɛ: «Minin lɛ n boe pii mà masɛ n má min gigiã dɛ, sɛnɛ mà Davida na á min duu damata dɛ? A n giɛ wàa li kɛ kio, bɛ̀ kiibaa bie wa.»

⁹A saa bɛa pinaa kɛ lɛ ganaa lɔn, Sayulu ná a giala kɔ, á n yiri babaraa boe Davida li.

¹⁰Bɛa lɛawaa, Dɛnaa Lawa nɔ̀ɔn baraa lɛ da Sayulu ganaa, Sayulu goã nɔ̀ɔndɛnan siin zɛnɛɛ kion fúlu bii. Davida goã a tùtu lɛ dii ka a bɛ́ nɛn bɛ̀ a dɛ lɛawaa gialakunun kɛn li lɔn. Sɛmiɛ̃ na á goã Sayulu gɔn bɛa pinaa kɛ lɛ nɛ.

¹¹Sayulu ná a sɛmiɛ̃ lɛ zũ. A na á goã pii a din gɔ́ɔ̃ nɛ: «Man die Davida foɛ̃, a dama kion gɔ̀nɔn ganaa.» Á sɛmiɛ̃ lɛ zũ gunyin paa, sɛnɛ, Davida nə́ n kanaa á n bɔ li.

¹²Sayulu nyɛ́ɛ baa Davida nɛ, a giala, Dɛnaa Lawa goã kun ka Davida nɛ, á Sayulu toa walan.

¹³Sayulu Davida baa sɔraasi duu goon a goledɛnaa lɛa, á zɔ̃, á bɔ a din ganaa. Davida na á goã miɛ zaman lɛ nyɛɛnɛ, bɛ̀ a wo zia la, a n bɔyaa.

¹⁴A soon lɛn tumaa gɔ́ɔ̃ nɛ, á goã gɔ̀lɔ̀baa yii, a giala Dɛnaa Lawa goã kun ni.

¹⁵Sayulu yii bɛ́ a ganaa, Davida a sii tumaa n bǐɛ̃ koe, á nyɛ́ɛ baa Davida nɛ.

¹⁶Sɛnɛ, Davida goã kɔɔ̃nɛ Izirayeli minin tumaa laanka Zudaa minin tumaa ganaa, a giala, a din lɛ na á goã miɛ̃ ǹ nyɛɛnɛ bɛ̀ a wo zia la, a n bɔyaa.

¹⁷Sayulu pɛ Davida nɛ: «Maa nɛlɔ goledɛnaa Meraabu lɛ á ke, man die a din lɛ koe n la lɔ lɛa. Sɛnɛ, n doa n dí nya masɛ nɛ, n Dɛnaa Lawa a zian da.» Sayulu na á goã taasɛ mà asɛ ba n gɔn diɛ Davida ganaa a dɛ wa, mà Filisiti minin die n dɛ.

¹⁸Davida pɛ Sayulu ni: «Masɛ n die lɛa, ma tɔrɔ basa laanka ma di kion nə wàa lɛa Izirayeli gána nɛ, kii tɔn masɛ daãgiĩ baa?»

¹⁹Sayulu a nɛlɔ Meraabu doamaa bɛ́ nɛ a dɔ Davida ganaa biikoo mɛn li, ǹ nə́ kũ ǹ nə́ kɔ Meholaa a nɛgiĩ Adriyeli la, lɔ lɛa.

²⁰Davida sii kɔɔ̃n kɔ Sayulu a nɛlɔ Mikaali ganaa. Ǹ ná a boo da Sayulu ni. Bɛa boo lɛ kɔɔ̃n kɔ a ganaa.

²¹Sayulu na á goã taasɛ ma asɛ n die Mikaali koe Davida la, màn mɛn bɛ́ toɛ Mikaali na a mìi dɔ li, Filisiti minin gɔn die a dɔ ganaa. A gunyin paabaa ǹ wɔ n ke Sayulu n pii Davida nɛ mà a tá re asɛ daãgiĩ biɛ kanna.

²²Sayulu na á kɛ pɛ a dí-nyalin manɛ: — Ka pɛ Davida n kɛnɛn ka durii ni: «Ga, kii lɛ n giɛ n bǐɛ̃-kɔ li, n tá kɔɔ̃n kii lɛ a dí-nyalin tumaa ganaa. Sisia, toa n kii lɛ daãgiĩ baa!»

²³Sayulu a dí-nyalin lɛn nə́ kɔ bɛa boon lɛn lɛ, ǹ nə́ pɛ Davida nɛ; Davida tɔ́n nə n toa: «Ka n kii a nɛ saa biɛ sii kiɛɛrɛ lɛa? Masɛ n giĩ doobaa lɛa, ma dɔ a boo n maa?»

²⁴Sayulu a dí-nyalin nə́ bɛa boon lɛn pɛ Sayulu ni mà Davida na á pɛ miɛ̃.

²⁵Sayulu nə́ n toa: — Ka pɛ Davida-n kɛnɛn: «Kii lɛ bɛ́ giɛ màn mɛn dinsɔɔ̃ li, a nɛlɔ lɛ a gɔn si ǹ wɔ lɛa, bɛ n ka Filisiti min giulun lɛpii paabiɛ nɛ (100), a kii lɛ a dòo bɔ nɛ a zɔ́ɔn ganaa.» Sayulu gɔ́ɔ̃ na á goã a ganaa bɛa yɔrɔ kɛ lɛ la, mà Filisiti minin lɛn gɔn nə dɔ Davida ganaa.

²⁶Sayulu a dí-nyalin nə́ bɛa boon lɛn gũ ǹ nə́ pɛ Davida nɛ. Kii a daãgiĩbaa boo lɛ kɔɔ̃n kɔ Davida ganaa. Biikoo laan bɛ̀ a n doe,

²⁷Davida bɔ á mɛ zii la á woo ka a minin ni. Á min biɛpaa (200) dɛ Filisiti minin lɛn bii. Davida daa ka ǹ giulun lɛpiin ni, ǹ ná a lɛ-piɛ̃ kɔ kii lɛ nɛ, màn mɛn bɛ́ toɛ Davida kii lɛ daãgiĩ baa. Sayulu tɔ́n na a nɛlɔ Mikaali kɔ Davida la lɔ lɛa.

²⁸Sayulu yɛ, á dɔ̃ dɔn, mà Dɛnaa Lawa goã kun ka Davida nɛ, mà a nɛlɔ, Mikaali tá Davida narɛ.

²⁹Sayulu wusoo, á nyɛ́ɛ baa Davida nɛ á kaa li, á tɔ́n Davida baa zɔ́ɔ a yiikoonaabaa tumaa gɔ́ɔ̃ nɛ.

³⁰Filisiti minin kiin nə́ goã soe woe zia biɛ, ǹ woo gogoonmaa, Davida goã gɔ̀lɔ̀baa yii á la Sayulu a sɔraasin tumaa nɛ. Davida tɔ nɔmaa á bɔ parsiini.