Read Samo, Southern Sam1 19 Bible Online

Sam1 19 - Samo, Southern bible

Sam1 19

¹Sayulu pɛ a nɛgiĩ Zonaatan laanka a dí-nyalin tumaa nɛ, mà ǹ Davida dɛ a gã. Sɛnɛ, Davida sii goã kɔɔ̃n, Sayulu a nɛgiĩ Zonaatan lɛ ganaa parsiini.

²Zonaatan boo lɛ pɛ Davida nɛ: «Ma di Sayulu lɛ n giɛ li a n dɛ, n gã. Biɛ̃ baayɛlɛ, n die n bǐɛ̃ kɔ n yiri bɔ n din li, ga duru ǹ bǎã li n giã walan. N bɛ́ re goɛ̃ durii-n bǎã mɛn li

³ma á re soe ma giã ma di genli walan. Ma á re boo diɛ n wɔ paǹ li ma di ni, bɛ̀ sii mɛn nɛ, ma á re pii n ni.»

⁴Zonaatan Davida tɔ bǐɛ̃ pɛ ǹ di Sayulu ni. Zonaatan pɛ nɛ: «Kii lɛ baran wɔ a dí-nyali Davida lon wa, a giala Davida sii kɔn la la wa, a dí dadaran mɛnɛn dinin nya, kii lɛ din bǐɛ̃ kɔ ǹ wɔn man ka bɛn nɛ.

⁵Á n din kɔ gɛ̀ la, á Filisiti min lɛ dɛ, Dɛnaa Lawa gɔ̀lɔ̀baa gole kɔ Izirayeli minin tumaa la. Ń bɛ yɛ, á n foo kɔɔ̃n kɔ. Davida sii kɔn la wa. Wàa na á baa n tá re Davida dii, n zɛ̀rɛbaãnaa kɛ mà kaa, á sii baraa zɛnaa?»

⁶Sayulu Zonaatan bɔlɔ si, á tɔ́n nə n liɛ ka Dɛnaa Lawa Yiikoonaa tɔ nɛ mà asɛ a die Davida dii wa.

⁷Zonaatan lɛ dia Davida la á bɛa boon lɛn tumaa pɛ nɛ. Bɛ kio, Zonaatan woo ka Davida nɛ Sayulu li, Davida giã a giulun á dí nyɛɛ nɛ ká a goã nyɛɛ lɛlɛ lɔn.

⁸Zia lɛ bɛ́ á wusoo á yoo, Davida woo zia baa Filisiti minin lɛn ganaa. Á ǹ dɛ babaraa, ǹ nə́ baa si a nyɛɛnɛ.

⁹Dɛnaa Lawa goã á nɔ̀ɔn baraa mɛn da Sayulu ganaa, bɛ lɛ daa kũ doo. Á goã giã-n tán a kion sɛmiɛ̃ ná a gɔn. Bɛa biikoo li, bɛ̀ Davida n tùtu dii.

¹⁰Sayulu mà a n Davida foɛ̃ ka sɛmiɛ̃ nɛ a dama kion gɔ̀nɔn-a, sɛnɛ, Davida nə́ n kanaa á n bɔ Sayulu a sɛmiɛ̃ lɛ li. Sayulu a sɛmiɛ̃ lɛ kiɛ̃ á nyəə kion gɔ̀nɔn ganaa, Davida baa si, á la bɛa tèlò lɛ nɛ.

¹¹ Sayulu minin dia Davida a piɛ, mà ǹ wo Davida lɛduə̃, ǹ dɛ a lɛawaa baayɛlɛ. Davida a lɔ Mikaali boo lɛ pɛ nɛ: «Tèlò kɛ lɛ nɛ, bɛ̀ n baa si wa, biɛ̃, ǹ tá re n dii n gã.»

¹²Mikaali Davida gisĩ tán ka fənɛtərə nɛ, á baa si á la á woo.

¹³Bɛ kio, Mikaali màn nyín saa, á naa tán piì lɛ la, á bòe ki da a mìi li, á mɔnaa pɛnɛ a ganaa.

¹⁴Sayulu a minin lɛn bɛ́ ǹ nə́ daa mà maǹ Davida kuĩ, Mikaali pɛ ǹ nɛ, mà Davida ba lon wa.

¹⁵Sayulu wusoo á n dia, mà ǹ woo ǹ yii Davida yɛ. Á pɛ ǹ nɛ mà ǹ saa a piì la, ǹ da nɛ asɛ li asɛ dɛ a gã.

¹⁶Minin lɛn bɛ́ ǹ nə́ wusoo ǹ nə́ daa, bɛ̀ màn nyín nə ke piì lɛ la ka bòe ki ná a mìi li.

¹⁷Sayulu pɛ Mikaali ni: «Wàa na á baa ń ma bebele kɛnɛn? Ń toa maa zɔ́ɔ lɛ la á woo!» Mikaali pɛ Sayulu ni: «Davida din ná á pɛ ma nɛ, mà bɛ̀ ma asɛ toa walan á woo wa, mà asɛ n die ma dii.»

¹⁸Davida bɛ́ á baa si á la miɛ̃, á woo dɔ Samayeli li Ramaa kiwi. Sayulu màn mɛn yii zɛnaa nɛ, á bɛ pɛ nɛ. Bɛ kio, Davida laanka Samayeli woo Naayɔti[19], ǹ nə́ giã walan.

¹⁹Ǹ nə́ daa pɛ Sayulu ni: «Á ke, Davida tá Naayɔti, Ramaa kiwi.»

²⁰Sayulu minin dia mà ǹ wo Davida kũ. Ǹ nə́ woo Lawa a boo gii-dalin yaa bɛ̀ ǹ nə́ kaa kɔn li, ǹ tá a gialaa Lawa a boo gii-dalibaa ǹ siin zɛnɛɛ, Samayeli nə́ ǹ mìi la. Lawa yiri gisĩ Sayulu a minin lɛn la, ǹ dɔn nə́ goã Lawa a boo gii-dali baa ǹ siin zɛnɛɛ.

²¹Ǹ ná a boo da Sayulu ni, á min kɔsɔn dia, ǹ dɔn nə́ bɔ ǹ nə́ kaa Lawa a boo gii-dali baa ǹ siin la ǹ nə́ ǹ zɛnaa. Sayulu minin dia, a sɔɔbaa ǹ wɔ; ǹ dɔn nə́ kaa la, ǹ nə́ Lawa a boo gii-dalibaa ǹ siin zɛnɛɛ.

²²Bɛ kio, Sayulu dinmaa kiɛ̃ á woo Ramaa. A bɛ́ á dɔ mu nyankɔrɔ gole kɛ li Seekuu kiwi, á nɔ̀n da: «Samayeli laanka Davida n maa?» Ǹ ná a lɛ si, mà ǹ tá Naayɔti kiwi Ramaa genli.

²³Á kiɛ̃ á woo walan, Naayɔti lɛ nɛ, Ramaa-genli. Lawa yiri gisĩ a dɔ la. Á goã tɔ wewe, bɛ̀ a tá Lawa a boo gii-dali baa ǹ siin zɛnɛɛ, yǎa á dɔ Naayɔti, Ramaa genli.

²⁴ Sayulu dɔ ná a mɔnaan sɔlɔ á bɔ a din-a, a dɔ́ Lawa a boo gii-dali baa ǹ siin zɛnaa Samayeli yii ni. Bɛ kio, á bɔ á mɛnaa tán a gɔ̀nɔn kooro, á goã miɛ̃ bɛa pinaa kɛ lɛ nɛ, á woo tèlò tumaa yaa. Bɛ lɛ n ke ǹ tá pii: «Sayulu dɔ n kun ka Lawa a boo gii-dalin ni ya?»