Read Samo, Southern Sam1 2 Bible Online

Sam1 2 - Samo, Southern bible

Sam1 2

¹ Anɛɛ Lawa nyankɔ á pɛ: «Dɛnaa Lawa pàã nɛ, ma foo á kɔɔ̃n nɛ, Dɛnaa Lawa pàã nɛ, ma mìi á lon. Ma á boe la ma yaa wɔ maa zɔ́ɔn kɛn ganaa. Ma nə n nyɛnyɛɛ a giala, ń ma kanbaa.

²Dɛnaa Lawa miã banban ka siĩnbaa-n wa. Dɛnaa Lawa kɔsɔ banban, bɛ̀ n din lɛ bie wa. Màn kɔsɔ a wɔ tamaɛ ka wɔa Lawa bɛ́ lɔn wa.

³Ka baran din golee kɔ ǹ boo mɔnaa wa. Ka baran din koa ǹ boo da wa. Lawa mɛn bɛ́ sii-dɔɛ̃, bɛ n ka Dɛnaa Lawa nɛ. A din ni minbuiinin zɛnaa ǹ sii tumaa a kiri kuri.

⁴Pàãdɛnan sa yiɛ. Pàãwɛnaan nə́ pàã yɛ.

⁵Min mɛnɛn nə́ goã kiɛ̃ nɛ, sisia, bɛn man dí nyɛɛ. Man giɛ ǹ lɛ-a ǹ bii li. Sɛnɛ bòonaan ba dí nyɛɛ doo wa. Lɔ mɛn din bɛ́ a nɛ yii wa, bɛ́ nɛ sɔbaa yɛ, sɛnɛ ǹ mɛn nɛ gigiã yɛ, nɛ ba bɛ gɔn doo wa.

⁶Dɛnaa Lawa din ni nyin koe, a din ni sii. A din ni min diɛ geren piɛ a din dɔ n min kanbiɛ a ganaa.

⁷Dɛnaa Lawa din ni min biɛ doobaa lɛa a din ni min dɔ biɛ pàãma lɛa. A din ni min kiɛɛrɛ koe a din dɔ n min siɛ lɔn.

⁸A n pàãwɛnaa sii gusuũn la. A n doobaa dɔ kuĩ tonton bɔlɔ la, a ǹ kaa tán kun ka min dadaran nɛ, a bǎã tɔnaa kɔ ǹ la. A giala, tán a bìbĩn lɛn man Lawa wɔn lɛa, a na á kanaa lɛ giala doa bɛn la.

⁹Min mɛnɛn bɛ́ a wɔn lɛa, a n bɛn tamaɛ, sɛnɛ sii baraa-zɛnaalin man papaɛ̃ wɔlɔ tì li. A giala, minbuiin nɛ ba boe la a gɔ̀lɔ̀ baa ka a din pàã-n wa.

¹⁰Dɛnaa Lawa a zɔ́ɔn tá re zɔzoɛ, lon a Lawa tá re n toɛ lon a paraa ǹ li. Lawa tá re kiri we tán kuturu ganaa. A tá re pàã koe a kii la. A din kii mɛn bɔ á koa, a n bɛ mìi siɛ lon.»

¹¹Ɛlkaana nə́ n bɔyaa á woo piɛ Ramaa. Nɛ lɛ sɛ goã dí nyɛɛ Dɛnaa Lawa nɛ, Lawa a wúlu-bɔle Yiili giulun.

¹²Yiili a nɛgiĩn lɛn man nə́ goã min gɛsɛn lɛa, ǹ goã Dɛnaa Lawa doɛ̃ wa.

¹³A laanɛ ǹ tá Lawa a wúlu-bɔlen lɛa, maǹ nə́ goã sii zɛnɛɛ zaman lɛ nɛ yɔrɔ kɛ la: bɛ̀ min ná a *wúlu màn dɛ, siĩ lɛ a kɔrɛɛ biikoo li, Lawa a wúlu-bɔle a dí-nyali n die ka siĩ fɔ̃ ǹ bàlà nɛ a gɔn.

¹⁴A n siɛ a dere siĩ màn lɛ nɛ. Bɛ̀ siĩ fɔ̃ ǹ bàlà lɛ kɔnpɛ ka ǹ mɛn nɛ, Lawa a wúlu-bɔle lɛ din ni nɔmɛ bɛ ganaa. Izirayeli min mɛn tumaa goã woe Lawa a kion, Siiloo, maǹ nə́ goã zɛnɛɛ ǹ nɛ miɛ̃.

¹⁵Ǹ tɛn din ni, Lawa a wúlu-bɔle a dí-nyali lɛ ba toɛ siĩ nyɔɔ lɛ nə n tã[4] bɔrɔ wa, a n die pii wúlu màn-dɛli lɛ nɛ kɛnɛn: «Siĩ kɔ ma la, ma tã Lawa wúlu-bɔle wɔ lɛa. A die lɛ koe a siĩ kɔrɛɛ si n la bɛ̀ a fumaa ná a bie wa.»

¹⁶Bɛ̀ giĩ lɛ pɛ nɛ mà siĩ nyɔɔ lɛ doa nɛ a n tã bɔrɔ, bɛ kio, bɛ̀ a tá ǹ mɛn li a tɔn bɛ saa, dí-nyali lɛ na a lɛ si kɛnɛn: «Haayii, n doama nɛ n kɔ ma la sisia, bɛ̀ bie wa, man sii ka pàã nɛ.»

¹⁷Nɛ tenən lɛn sii baraa gole kɔ parsiini Dɛnaa Lawa yɔrɔ-a, a giala, ǹ nə́ goã barka boe Dɛnaa Lawa a wúlu màn lɛ nɛ.

¹⁸Samayeli sɛ na á goã dí nyɛɛ Dɛnaa Lawa yɔrɔ-a. A bɛ́ nɛnyaan lɛa, dí nya ǹ mɔnaa yii nɔnɔɔ sonbore na á goã a ganaa.

¹⁹Lɛ̀ tunaa nɛ, ǹ dan na á goã dɔnkɛ tiɛ̃ bɛ̀ a kɔ la, bɛ̀ ǹ laanka ǹ zuũ tá woe lɛ̀ li ǹ wúlu boe ǹ mɛn waáraa.

²⁰Yiili na á goã barka diɛ Ɛlkaanaa laanka a lɔ ganaa bɛ̀ á n pii. «Nɛ mɛn nə́ n kɔ Dɛnaa Lawa la ke, Dɛnaa Lawa die a toa n nɛ kɔsɔn yɛ n lɔ lɛ ganaa bɛ lɛ dòo.» Bɛ kio, ǹ nə́ wusoo ǹ nə́ woo piɛ.

²¹Dɛnaa Lawa bǐɛ̃ kɔ Anɛɛ ganaa, á wusoo á nɛnyaanan kɔsɔn yɛ, nɛgiĩ sɔɔ ka nɛlɔ paa nɛ. A nɛginin Samayeli dɔ goã gole koe, bɛ̀ á n kun ka Lawa nɛ.

²²Yiili goã á zizi kɔ parsiini. A nɛgiĩn lɛn nə goã sii mɛn zɛnɛɛ Izirayeli minin tumaa nɛ, á bɛa boo ma minin lɛ-n. Lɔn mɛnɛn nə goã soe-n kɔn kɔn yɛ ǹ kion kɛa kiɛnlɛ-a, á ma dɔn mà ǹ nə́ goã giɛ̃ kun ka bɛn nɛ.

²³Á pɛ ǹ nɛ mà wàa na á baa ǹ tá siin kɛn miãn zɛnɛɛ? Mà asɛ bɛ́ nya ǹ dí baraan mɛnɛn miɛ ǹ wɔ paǹ li, mà bɛ lɛ n zaman tumaa lɛ-n.

²⁴Mà asɛ nɛnyaanan lɛn ganaa, mà ǹ bɛ lɛ da. A giala, mà asɛ bɛ́ boo mɛn miɛ pɔpɔpɔ nɛ, Dɛnaa Lawa a zaman lɛ-n, mà bɛ́ a siĩn wa.

²⁵Bɛ̀ min sii la ǹ miã kɔsɔ la, Lawa n die bɛ yɔrɔ boe. Sɛnɛ bɛ̀ min sii la Dɛnaa Lawa la, die n die yii, a bɛ yɔrɔ bɔ? Sɛnɛ ǹ nə n too kɔ ǹ di lɛ a boo ganaa wa, a giala, Dɛnaa Lawa na á goã giɛ li mà a ǹ nyin bɔ.

²⁶ Samayeli sɛ bɛ́ nɛ ten lɛa, á goã gole koe woe nyɛɛnɛ, a sii goã kɔɔ̃n Dɛnaa Lawa laanka minbuiinin ganaa.

²⁷Lawa a boo gii-dali goon n daa Elii li á pɛ nɛ mà Dɛnaa Lawa n kɛ pii: «Á ke, masɛ nə́ n din nyaa n digolon[5] lɛn manɛ foãnɛ, a ǹ toa Faarahɔn a bɛ̀rɛbaa gɔ́ɔ̃ nɛ Ezipti gána nɛ.

²⁸ N din digolon kɛn lɛn manɛ, má ǹ bɔ Izirayeli tɔrɔn tumaa bii, má ǹ baa maa wúlu-bɔlen lɛa, màn mɛn bɛ́ toɛ ǹ wo *wúlu bɔ ǹ bǎã nɛ, ǹ da yon gìĩ kɔɔ̃n tã, ǹ dí nya ǹ mɔnaa wɔ masɛ yɔrɔ-a. Izirayeli nɛnyaanan bɛ́ wúlu màn mɛn din tumaa tiɛ̃, ma bɛ kɔ n digolo lɛ laanka a tɔrɔn la.

²⁹Wàa na á baa ka tá barka boe masɛ a wúlu màn lɛ laanka masɛ gɔ ǹ màn lɛ nɛ? Ma bɛ́ máa ka ǹ mɛnɛn bɔ maa kion. Wàa na á baa Elii ná a nɛnyaanan narɛ á la masɛ nɛ, a giala, manə ǹ dinin toe ka masɛ a zaman, Izirayeli nɛnyaanan gɔn màn tumaa a sonbore ne.

³⁰Bɛ lɛ na á toa, Dɛnaa Lawa, Izirayeli a Lawa lɛ n kɛ pii: Sonbore ne, masɛ goã má pɛ máa n kion minin laanka n tɔrɔn tá re dí nyɛɛ masɛ nɛ duduu. Sɛnɛ sisia Dɛnaa Lawa n kɛ pii: Bɛ ba masɛ bǎã-n doo wa. A giala, min mɛnɛn bɛ́ ma guguru koe, man die bɛn guguru koe. Sɛnɛ, min mɛnɛn bɛ́ ma puusə koe, bɛn tá re paan biɛ ma gɔn.

³¹Á ke, biikoo á re doe, bɛ gɔ́ɔ̃ nɛ, man die n kion min tenən laanka n tanlɛ min tenən dii, min zizi din ná a die yii n kion doo wa.

³²Ń tá re min kɔsɔ yii wúlu lɛ boe n bǎã nɛ, Izirayeli minin sii tumaa á re bǐɛ̃ koe, Sɛnɛ, min zizi na a die yii nsɛ kɛa kion doo wa.

³³Man die n din a min goon toɛ maa wúlu bɔ ǹ bǎã lɛ nɛ màn mɛn bɛ́ toɛ bɛ bɔ n yii ni a n foo busu. N nɛnyaanan mɛnɛn tumaa bɛ́ re n kion lɛ giala boe li, bɛn kɔ́n ba re zizi koe ǹ tɔn gã wa.

³⁴ Sii mɛn bɛ́ re n nɛgiĩ min paa lɛ yii, Ɔfuni laanka Fineyasi, bɛ n die sii a kɔnboe biɛ n gɔn. Ǹ dinin paanan tá re giɛ̃ pinin goon.

³⁵Masɛ n die bɔlɔgoondɛnaa koɛ maa wúlu-bɔle lɛa. A sii zɛnaa tá re kɔnpii ka ma foo dùũ ni. Ma á die toɛ a nɛnyaanan nə wúlu-bɔlen baa miɛ̃ duduu. Ma kii mɛn bɔ, á re tɔ we bɛ yɔrɔ-a biikoo yii li.

³⁶Min woo min, a n die goɛ̃ Elii a kion, bɛ á re die n kurumii tán wúlu-bɔle lɛ giulun, wɔrɔ boɛɛn laanka màn-bii taman yii. Ǹ tá re pii wúlu-bɔle lɛ nɛ, bǐɛ̃ kɔ ma ganaa, n ma goɛ̃ wɔ wúlu bɔ ǹ dí lɛ kɔn nɛ, ǹ giɛ ma tá màn-bii boɛɛn yii ma bii.»