Read Samo, Southern Sam1 20 Bible Online

Sam1 20 - Samo, Southern bible

Sam1 20

¹Davida baa si á n bɔ Naayɔti, Ramaa genli. Á woo Zonaatan yaa á pɛ nɛ: «Ma n má wàa pɛ, ma zɛ̀rɛ n ka ǹ mɛn nɛ, man má wàa sii la n di lɛ la, á n giɛ li a tá ma nyin boe?»

²Zonaatan ná a lɛ si: «Bɛ din boo bie wa! N ba re giɛ̃ wa. Á ke ma di lɛ ba si kɔn zɛnɛɛ, bɛ̀ a ná a ba pii masɛ-n bɔrɔ wa. A n siɛ lɔn kəni maa díi lɛ tɔn kɛ duru ma la. Boɛɛ wa!»

³Davida nə́ n liɛ á pɛ doo: «Zonaatan n di lɛ tá doɛ̃ taãn-taãnɛ, mà maa sii á kaka n gɔn. N di lɛ á maa á pɛ a gɔ́ɔ̃ nɛ, mà Zonaatan ba siĩni a bɔ kɛ siére-a wa, màn mɛn bɛ́ toɛ, a foo baran busu wa. Sɛnɛ, Dɛnaa Lawa yii á koo, n dɔ yii á tɔn koo. Bɛa liere banban. Gɛ̀ gɔn dɔ masɛ ganaa á nya.»

⁴Zonaatan pɛ Davida nɛ: «Ma á die n gɔ́ɔ̃gɔ́ɔ̃ ǹ sii zɛnɛɛ n nɛ.»

⁵ Davida pɛ Zonaatan nɛ: — Mui dii zɔ́n lɛ á ke biɛ̃, ma doamaa nɛ ma giã tán kii lɛ genli wɔ màn bii. Toa ma wo n duru don yǎa biɛ̃ a làan wasamiɛ̃nɛ.

⁶Bɛ̀ n di lɛ bɔ a siére-a mà ma banban wa, n die n pɛ-n kɛnɛn: «Davida na á laa, mà ǹ zii kɔ asɛ la, a wo bɔ a kiwi, Bɛtlehɛmu, a giala, mà lɛ̀li wúlu boe tá walan asɛ a tanlɛ tumaa wɔ lɛa.»

⁷Bɛ̀ kii lɛ pɛ mà a tá siĩni, piɛ̃ na á kaa a dí-nyali lɛ ganaa. Sɛnɛ, bɛ̀ a foo yoo, a dɔ̃, mà a na á n yɔrɔ bɔ á n die masɛ dii.

⁸Bǐɛ̃ kɔ n dí-nyali lɛ-a, a giala, n nə n lɛ kɔ ma la ka Dɛnaa Lawa tɔ nɛ. Sɛnɛ, sii woo sii má zɛnaa, bɛ̀ ma zɛ̀rɛ n ka ǹ mɛn nɛ, n dinmaa lɛ ma dɛ, a giala, wàa na á baa, n tá re woe ka ma nɛ yǎa n di li?

⁹Zonaatan nə́ n toa: «Bɛ boo bie wa! Bɛ̀ má dɔ̃ sonbore, má maa díi lɛ nə́ n yɔrɔ bɔ a n die dii, ta á n baa lɔn, ma á re pii n ni.»

¹⁰Davida pɛ Zonaatan nɛ: «Bɛ̀ n di lɛ nə́ n lɛ si ka foo ne, die tɔn bɛ pɛ masɛ nɛ?»

¹¹Zonaatan pɛ Davida nɛ: «Kiɛ̃ n daa wɔ soo, wɔ wo don!» Ǹ dinin paanan soo, ǹ nə́ woo don lɛ nɛ.

¹²Zonaatan pɛ Davida nɛ: «Masɛ n Dɛnaa Lawa biɛ siére lɛa, Izirayeli a Lawa lɛ. Biɛ̃ kɛnɛn yirəə hinlaa bɛa lɛawaa, man die n diɛ ma di lɛ gɔ́ɔ̃ li, bɛ̀ a giã ǹ gɔn tá siĩni n wɔ paǹ li, ma á die a boo diɛ n nɛ.

¹³Bɛ̀ á daa yaa, á tá ma di lɛ gɔ́ɔ̃ nɛ mà a baraa zɛnaa n nɛ, ma á die pii n ni, man da zii n wo ka là nyantoro ne. Sɛnɛ, bɛ̀ a ba miɛ̃ wa, bɛ̀ ma pɛ n nɛ wa, Dɛnaa Lawa die a dɔlɔ babaraa bɔ masɛ Zonaatan ganaa. Dɛnaa Lawa die a goã kunun n ni, ka a goã kun ka masɛ a díi-n lɔn!

¹⁴Bɛ̀ masɛ yii goã koo, n liɛ mɛn wɔ ma nɛ Dɛnaa Lawa yɔrɔ-a, n die n bɛ zɛnaa ma nɛ. Ta masɛ n má gã,

¹⁵ ta Dɛnaa Lawa n Davida a zɔ́ɔn bɔnbiɛ gogoon, ǹ boe tán kɛ la, n baran n bǐɛ̃ lɛ goa maa kion minin ganaa wa.»

¹⁶Zonaatan nə́ n lɛ kɔ Davida laanka a kion minin la, á pɛ: Dɛnaa die a dɔlɔ bɔ Davida a zɔ́ɔn ganaa.

¹⁷A giaárabaa lɛ gɔ́ɔ̃ nɛ ka Davida nɛ, Zonaatan wusoo doo, á n lɛ kɔ Davida la, a giala, a na á goã Davida narɛ ka a din bɛ́ lɔn.

¹⁸Zonaatan nə́ n toa Davida ganaa: — Biɛ̃ n mui dii zɔ́n lɛ lɛa. Minin tá re n yiri diɛ li mà n banban wa, a giala, n giã ǹ bǎã kooro n die goɛ̃.

¹⁹Biɛ̃ a làan nɛ, n goã ń nə n duru bǎã mɛn nɛ sii lɛ a biikoo li, wusoo n wo walan ka baa nɛ, n nə n duru Ezɛli kɔlɔ kɛ kio.

²⁰Ma á die kòã kiɛ sɔɔ zuĩ bɛa wàã lɛ li, ka n pɛ mà man màn piɛ̃.

²¹Bɛ kio, ma á die pii nɛginin ni, máa a wo ga kiɛn lɛn li. Bɛ̀ ma pɛ nɛginin lɛ-n kɛnɛn: «Kiɛn lɛn nə́ ke walan li n giulun, ǹ goa», bɛ giala mà n tá boe la n daa, sii tumaa bǐɛ̃ kɔ, sii kɔn ba re boe a n wa, Dɛnaa Lawa tan.

²²Sɛnɛ, bɛ̀ má pɛ tɔntɔraa lɛ nɛ «kiɛn lɛn tá n nyɛɛn walan li», bɛ giala mà n woo, a giala, Dɛnaa Lawa n woe n ne.

²³Ma laanka n din nə lɛ-kɔ mɛn wɔ kɔn la, Dɛnaa Lawa n bɛa siére lɛa miɛ̃ duduu, n din laanka ma bii ni.

²⁴Davida tɔ́n kiɛ̃ á woo n duru don. Mui dii zɔ́n lɛ dɔ. Kii lɛ daa giã tán, á màn bii.

²⁵Á giã tán a giã ǹ bǎã zizi ni, a dankan nɛ, tiləə ne kion gɔ̀nɔn ganaa. Zonaatan giã tán a yɔrɔ-a, Abnɛɛrɛ giã tán Sayulu genli. Davida a giã ǹ bǎã goã tán kooro.

²⁶Sɛnɛ, Sayulu boo kɔn da bɛa pinaa kɛ lɛ-n wa. A giala, a na á goã taasɛ, mà sii kɔn na á Davida yɛ. Mà a n die goɛ̃ nɛ a *yoreen wa.

²⁷Bɛa lɛawaa, mui dii zɔ́n lɛ a lɛawaa paabaa ǹ wɔ pinaa, Davida a giã ǹ bǎã lɛ kooro goã tán doo. Sayulu nɔ̀n da a nɛgiĩ Zonaatan la mà wàa na á baa Zesee a nɛgiĩ lɛ da màn lɛ bii gunun wa, a da bii pelo dɔn wa?

²⁸Zonaatan Sayulu lɛ si: — Davida na á n laa ma ganaa mà ma zii kɔ asɛ la a wo yǎa Bɛtlehɛmu kiwi.

²⁹A na á pɛ ma-n kɛnɛn: «Bǐɛ̃ kɔ n toa ma woo, a giala, maa tanlɛ minin man die wúlu boe Bɛtlehɛmu kiwi. Á pɛ dɔn, mà asɛ golo mà a n doa a yɛ a bǎã nɛ. Bɛ lɛ nɛ, mà bɛ̀ asɛ á maa giaára lɛa sonbore, mà ma bǐɛ̃ kɔ ma asɛ toa asɛ baa si a woo, a ǹ dɔɔ̃nɔn yɛ.» Bɛ lɛ n ke, a da kii lɛ a màn bii ǹ bǎã-n wa.

³⁰Sayulu foo yoo Zonaatan li, á tɔ́n pɛ nɛ: «N màn piã wole, too kaka-a ke! Ma á doɛ̃ ka kɛ nɛ máa n lɛ n kun ka Zesee a nɛgiĩ lɛ nɛ. Sìi nə n din laanka ǹ dan kũ!

³¹N ba doɛ̃, mà bɛ̀ Davida yii á koo, mà n ba boe la n gána kɛa kii baa duduu wa? Sisia, wo kũ, n da-n kànaa a giala Davida doamaa-n ka gɛ̀ nɛ.»

³²Zonaatan nə́ ǹ di Sayulu lɛ lɛ si á pɛ nɛ: «Wàa na á baa, ǹ tá re Davida nyin boe? A na á wàa mɛn sii la?»

³³Sayulu ná a sɛmiɛ̃ zũ Zonaatan nɛ, mà a n dii. Zonaatan tɔ́n dɔ̃ mà ǹ di lɛ wen waamaa nɛ ka Davida nyin bɔ boo ne.

³⁴Zonaatan yoo ka foo ne á n bɔ tán. A màn kɔn bii bɛa mui dii zɔ́n lɛawaa paabaa ǹ wɔ kɛ li wa. A giala, ǹ di sɔ babaraa kɔ Davida ganaa. Bɛ lɛ nɛ, Zonaatan goã n gɔ́ɔ̃ bii ka Davida a sii ni.

³⁵Bɛa lɛawaa baayɛlɛ, ǹ goã ǹ nə́ don bǎã mɛn boo da kɔn nɛ, Zonaatan woo walan kun ka nɛginin boɛɛn goon ne.

³⁶Zonaatan pɛ nɛginin lɛ-n kɛnɛn: «Ma bɛ́ re kiɛn mɛnɛn zuĩ, baa si n wo ga ǹ li!» Nɛginin lɛ baa si, Zonaatan kiɛ goon zũ, á kiɛ̃ á na.

³⁷Nɛginin lɛ bɛ́ á dɔ, Zonaatan a kiɛ lɛ a mɛnaa ǹ bǎã nɛ, Zonaatan nə́ n toa a kio, á paraa: «Kiɛ lɛ ba n nyɛɛn wa?»

³⁸Zonaatan nə́ n toa a kio doo á paraa: «N nanaa fufuu, n baran golee wa!» Nɛginin lɛ kiɛ lɛ saa, á n bɔyaa á daa a dɛnaagiĩ li.

³⁹Nɛginin lɛ goã màn kɔn giala miɛ a-n wa. Zonaatan laanka Davida dinsɔɔ̃ na á goã sii lɛ giala miɛ.

⁴⁰Nɛginin mɛn goã kun ka Zonaatan nɛ, Zonaatan ná a ziabaa ǹ mànan kɔ bɛ la, á pɛ nɛ: «Wo ǹ ne kiwi.»

⁴¹Nɛginin lɛ woo. Davida nə́ n doa á yoo tán kɔlɔ lɛ a gusin a lɛ̀gɔn la, á para á mɛnaa tán a lɛ la, á n musi lɛn doa tán gunyin sɔɔ. Bɛ kio, Davida laanka Zonaatan nə́ n sɔɔ kɔn nɛ, ǹ nə́ wuu pɛ, Davida sɛ wɔ goã á là da.

⁴²Zonaatan pɛ Davida nɛ: «Wo ka là nyantoro ne. Wɔsɛn dinin min paa lɛ-kɔ mɛn wɔ kɔn la ka Dɛnaa Lawa tɔ nɛ, Dɛnaa Lawa die a goã siére lɛa miɛ̃ duduu masɛ laanka n din biin ni, n nɛnyaanan laanka maa nɛnyaanan biin ni!»