Read Samo, Southern Sam1 22 Bible Online

Sam1 22 - Samo, Southern bible

Sam1 22

¹Davida kiɛ̃ á n bɔ Gaati kiwi, á woo n duru Adulaamu kiwi a yala kɛ nɛ. Davida ǹ golon laanka ǹ di a kion minin tumaa bɛ́ ǹ nə́ ma, mà Davida tá walan ǹ nə́ woo a li.

²Min mɛnɛn tumaa goã foo ziziɛ̃ gɔ́ɔ̃ nɛ, giɔ̀mɔ goã min mɛnɛn tumaa ganaa, min mɛnɛn tumaa yɔrɔ goã kɔsiɛ nɛ, ǹ nə́ woo kaa kun ka Davida nɛ, á n baa ǹ goledɛnaa lɛa. Ǹ nə́ dɔ min biɛsii (400) kɛ miã kun ni.

³Davida nə́ n toa walan á kiɛ̃, á woo Misipee kiwi, Moabu gána nɛ. Á pɛ Moabu gána a kii-n kɛnɛn: «Bǐɛ̃ kɔ n toa, maa náa laanka maa díi da giã ka li, ǹ goã ka li miɛ̃, yǎa ma doɛ̃ Lawa bɛ́ re sii mɛn zɛnɛɛ ma nɛ.»

⁴Davida woo ǹ ne Moabu gána a kii lɛ li. Ǹ nə́ goã kii lɛ li, Davida a durii waáraa lɛ tumaa gɔ́ɔ̃ nɛ.

⁵Lawa a boo gii-dali Gaadi pɛ Davida nɛ: «N baran goã n durii lɛ gɔ́ɔ̃-n wa, kiɛ̃ n nə n ta Zudaa gána nɛ!» Davida kiɛ̃ á woo á dɔ Erɛti daã li.

⁶Sayulu ma, mà ǹ tá Davida laanka a takun wolen lɛn bǎã doɛ̃. Sayulu na á goã giã-n tán tamarisi da giulun tenten la, Gibeya kiwi. A sɛmiɛ̃ goã a gɔn, a dí-nyalin tumaa goã a genli.

⁷Sayulu pɛ a dí-nyalin lɛn manɛ golee ne a genli: «Bɛnzamɛn tɔrɔn lɛn, ka n too kɔ doɛ̃! Ka n taasɛ mà Zesee a nɛgiĩ lɛ dɔ tá re wurun laanka *rezɛ̃ dan koe ka tumaa la, a ka baa a sɔraasin nyɛɛnaandɛnan lɛa, kɛn nə giã sɔraasi duu goon mìi la, kɛn nə giã sɔraasi paabiɛ mìi la?

⁸Bɛ lɛ nɛ, ka tumaa tá n bɔyɛɛ ma li ka durii ni? Ma dinmaa a nɛgiĩ na á n lɛ kɔ Zesee a nɛgiĩ Davida la, min kɔn pɛ ma-n wa. Ka kɔn din ba n gɔ́ɔ̃ bii ka masɛ-n wa. Ka kɔn pɛ masɛ nɛ mà Davida lɛ, ma dinmaa a minin lɛn goon lɛa, mà a n giɛ masɛ dɛ ǹ gɔn li biikoo kɛ-n wa. Ka bɛ dɔ nɛ, min kɔn pɛ masɛ nɛ, mà maa nɛgiĩ na a foo taɛ̃ wa.»

⁹ Dowɛgi lɛ, Edɔmu min lɛa, Sayulu a dí-nyalin lɛn mìi la, bɛ́ tɔ́n pɛ: «Zesee a nɛgiĩ bɛ́ á daa Ayitubu a nɛgiĩ Akiimelɛki li Nɔɔbu kiwi, má yɛ.

¹⁰Akiimelɛki nɔ̀n da Dɛnaa Lawa la mà Davida doamaa nɛ a wàa sii zɛnaa. Akiimelɛki màn-bii kɔ la. Goliati lɛ Filisiti min lɛa, á bɛ dɔ a gɔya sa kɔ Davida la.»

¹¹A bɛ́ miɛ̃, Sayulu tɔ́n lɛ dia, Lawa a wúlu-bɔle, Akiimelɛki la, Ayitubu a nɛ lɛ. Á lɛ dɔ dia Akiimelɛki a kion minin tumaa la ka Nɔɔbu kiwi a Lawa a wúlu-bɔlen ne. Ǹ tumaa daa kii lɛ li.

¹²Sayulu nə́ n toa: «Ayitubu a nɛgiĩ, n too kɔ doɛ̃!» Akiimelɛki ná a lɛ si á pɛ: «Maa dɛnaagiĩ, ma too tá n lon.»

¹³Sayulu nɔ̀n da la: «Wàa na á baa n din laanka Zesee a nɛgiĩ lɛ nə́ n bɔyaa masɛ li ka durii ni? Wàa na á baa, ń buuru laanka gɔya sa kɔ la? Wàa na á baa ń nɔ̀n da Lawa la ka a sii ni? Pelo, Davida lɛ nə́ n bɔyaa masɛ li, a n kuu koe ma ganaa, ka durii ni, a n die ma dii.»

¹⁴Akiimelɛki kii lɛ lɛ si á pɛ-n kɛnɛn: «N dí-nyalin lɛn tumaa bii, die na a tan ka Davida bɛ́ lɔn foo n doa nɛ a ganaa? A n kii lɛ daãgiĩ lɛa, min mɛnɛn bɛ́ kii lɛ lɛduĩ, a n bɛn goledɛnaa lɛa. Á guguru kii lɛ a kion.

¹⁵Ma bie a giala koe pelo, má n nɔ̀n diɛ Lawa la ka Davida a sii-n wa. Taasiɛ kɔsɔ wɔlɔ tá lui ni ma ganaa koe! E kii lɛ, n baran sii da n dí-nyali lɛ mìi-n wa. N baran sii da masɛ a kion min kɔn mìi-n wa, a giala, n dí-nyali lɛ bɔ màn kɔn siére-a sii lɛ gɔ́ɔ̃-n wa.»

¹⁶Kii lɛ pɛ: «Akiimelɛki, n tá re giɛ̃ ka n di a kion min tumaa nɛ!»

¹⁷Bǎã-lɛduə̃lin mɛnɛn nə goã golee ne kii lɛ genli, kii lɛ pɛ ǹ nɛ: «Ka n bɔyaa ka Dɛnaa Lawa a wúlu-bɔlen lɛn dɛ ǹ gã. A giala, ǹ dɔn giala n kun ka Davida nɛ, ǹ nə́ dɔ̃ dinin taãn-taãnɛ mà Davida n baa sii, sɛnɛ, ǹ pɛ ma-n wa.» Sɛnɛ, kii a dí-nyalin lɛn nə́ n piã mà ǹ ba ǹ gɔn diɛ Dɛnaa Lawa a wúlu-bɔlen lɛn ganaa wa.

¹⁸Kii lɛ tɔ́n pɛ Dowɛgi ni mà a n bɔyaa a ǹ dɛ! Dowɛgi lɛ, Edɔmu min lɛa, á n bɔyaa, a dinmaa Lawa a wúlu-bɔlen lɛn dɛ. Bɛa pinaa kɛ lɛ nɛ, Lawa a wúlu-bɔlen lɛn Lawa a dí nya ǹ mɔnaa we ǹ ganaa, a na á bɛn min pɔkiwisiwensooro (85) dɛ.

¹⁹Lawa a wúlu-bɔlen kiwi Nɔɔbu lɛ nɛ, á giĩn dɛ, lɔn nɛ, nɛnyaanan nɛ, nɛ tiɛɛ̃nɛn nɛ, diin ni, dundunun ni, ka sèren ne.

²⁰Akiimelɛki lɛ, Ayitubu a nɛ lɛa, bɛa nɛgiĩ goon dinsɔɔ̃ na á la, a gã wa. A tɔ na á goã Abiataara. Á baa si á woo n ti Davida ganaa.

²¹Abiataara gũ á pɛ Davida nɛ, mà Sayulu Dɛnaa Lawa a wúlu-bɔlen dɛ.

²²Davida pɛ Abiataara nɛ: «Ma bɛ́ má Edɔmu min Dowɛgi lɛ yɛ walan, ǹ mɛn pinaa lɛ-n, má dɔ̃, má á re a boo diɛ Sayulu ni. Bɛ̀ ǹ nə́ Abiataara ǹ di a kion minin tumaa dɛ, masɛ din sii ni.

²³Nyɛ́ɛ baran n kũ wa, giã kun ka masɛ nɛ. Min mɛn bɛ́ re giɛ li, a n nyin bɔ, a n goon ka ǹ dɛnaa giɛ li a masɛ dɔ wɔ bɔ. Bɛ̀ n tá masɛ genli, n ta re goɛ̃ tamaa nɛ sɔnbɔraanɛ.»