Read Samo, Southern Sam1 27 Bible Online

Sam1 27 - Samo, Southern bible

Sam1 27

¹Davida taasɛ a din gɔ́ɔ̃-n kɛnɛn: «Ta á n baa lɔn, masɛ á re bɔ̀n biɛ Sayulu gɔn ǹ kɔn pinaa. Màn kɔn din ba soɛ masɛ ganaa, á dɔ maa baa si a wo Filisiti minin gána-n li wa. Bɛ̀ á n baa miɛ̃, Sayulu á re masɛ a gamali lɛ diɛ, Izirayeli gána kuturu ni, bɛ á re n biɛ maa la lɛa Sayulu la.»

²Davida bɔ á mɛ zii la ka a min biɛsɔrɔ (600) lɛ nɛ, á woo bɔ Gaati gána a kii Akiisi li. Akiisi lɛ n Maawɔki a nɛ lɛa.

³Davida giã Akiisi li, Gaati gána nɛ, a din laanka a minin ni, didie n kun a kion minin ni. Davida a lɔ min paa lɛ goã a li. A lɔ Zizereyɛli nɛ Ayiinoamu ni, ka a lɔ Abigayili ni, kɛ lɛ á goã Naabaali a lɔ lɛa boe Karmɛli kiwi.

⁴Ǹ ná a boo da Sayulu ni, mà Davida baa si á woo Gaati gána nɛ. Sayulu nɔmaa á ná a gamali lɛ da.

⁵Davida pɛ Akiisi ni: «Bɛ̀ masɛ a sii tá n foo ne, ka don kion kiwi kɔ ma la, ma giã walan. A giala, n bɛ̀rɛgii n ka masɛ nɛ, n din kii bɛ́ giã-n kiwi mɛn nɛ, masɛ dɔ wusoo ma giã walan ma á doe bɛ-n ya?»

⁶A din pinaa lɛ nɛ, Akiisi, Siiklagi kiwi kɔ la. Bɛ lɛ nɛ, Siiklagi nə́ n baa Zudaa kiin wɔ lɛa a da kaa pelo lɛ.

⁷Davida giã Filisiti don lɛ nɛ, á belebɔ á dɔ lɛ̀ goon ka mui sii.

⁸Davida laanka a minin nə́ goã nɛn bɛ̀ ǹ soo ǹ wo zia da Gesuuru minin ganaa ka Girizii minin laanka Amalɛki tɔrɔn nɛ. A giala, bɛa tɔrɔn kɛn lɛn man giã nɛ gána lɛ nɛ, haalɛ bibi, a kũ dia-n woe Suuru ganaa yǎa a die doe Ezipti gána nɛ.

⁹Davida na á goã pipiri zaman lɛ ganaa a tá ǹ dii. A giĩ toɛ a yii n koo wa, a lɔ dɔ toɛ a yii n koo wa. Tɔɔ dadaran nɛ a bisinin ni, dundunun ni, nyɔɔmaan nɛ, a na á goã bɛn lui bɛ̀ a kiɛ̃ ǹ nɛ, bɛ̀ a mɔnaan dɔn goa. Bɛ̀ Davida nə́ n bɔyaa, a n woe Akiisi li.

¹⁰Akiisi na á goã nɔ̀n diɛ mà maǹ nə́ woo zia da bǎã mɛn ganaa pelo? Davida na á goã a lɛ si mà ǹsɛn man nə́ woo zia da Zudaa gána a gusin a lɛ̀gɔn la, hinlaa Zerameyeli tɔrɔn kɛn bǎã a gusin a lɛ̀gɔn la hinlaa Kenii minin kɛn bǎã a gusin a lɛ̀gɔn la.

¹¹Davida giĩ hinlaa lɔ kɔn yii toa koo, á daa nɛ Gaati gána-n wa, a giala, a na á goã taasɛ mà bɛ̀ ǹsɛn nə́ boo da, mà n nə ǹ yaa kiɛ̃ ǹsɛn giala diɛ kanaa. A Davida toa giã-n Filisiti don lɛ nɛ biikoo mɛn yii li, a na á goã a sii zɛnɛɛ kɛa yɔrɔ lɛ la.

¹²Akiisi foo goã doa-n Davida a sii ganaa. A na á goã taasɛ mà Davida nə́ n din tìĩ bɔ a din tɔrɔn, Izirayeli minin lɛn nyin ni. Bɛ̀ lɛ nɛ, mà a tá re dí nyɛɛ asɛ nɛ duduu.