Read Samo, Southern Sam1 29 Bible Online

Sam1 29 - Samo, Southern bible

Sam1 29

¹Filisiti minin nə́ ǹ sɔraasin tumaa sɔkɔn Afɛki kiwi. Mu pìã mɛn bɛ́ Zizereyɛli kiwi, Izirayeli minin nə́ giã kunu bɛ ganaa.

²Filisiti minin kiin nə́ goã sɔraasi kurun mìi la, n gòã zoɛ̃. Kuru lɛ tɛn nə min paabiɛ, ǹ tɛn dɔ n min duu goon (1 000) Davida laanka a minin man nə́ n gòã zɔɔ̃ nyɔɔbaa kun ka Akiisi ni.

³Filisiti minin kiin lɛn nə́ n toa: «*Ebrəən kɛn dɔn wɔ giala n ka wàa nɛ?» Akiisi tɔ́n pɛ Filisiti minin kiin lɛn manɛ: «Davida lɛ nɛ. Izirayeli gána a kii Sayulu a dí-nyali kɛ lɛ! A lɛ̀ goon hinlaa a lɛ̀ paa n ke, á n kun ka ma nɛ. A kũ a daa lɛ ganaa, a da kaa pelo lɛ, ma zɛ̀rɛbaa ǹ bǎã yɛ a ganaa wa.»

⁴Filisiti minin kiin lɛn foo yoo Akiisi li, ǹ nə́ pɛ nɛ: — N gɔn bɔ giĩ kɛ lɛ ganaa, n bǎã mɛn lɛ kɔ la, a lɛ goa a wo walan. A siĩni a wo kun ka wɔsɛn nɛ zia lɛ la wa, màn mɛn bɛ́ toɛ, a baran n bɔyaa wɔsɛn li zia lɛ a diɛ biikoo li wa. A giala, kɛa sii n die wusii a kɔɔ̃n kɔ a dɛnaagiĩ zizi lɛ ganaa lɔn, bɛ̀ a bie a wɔsɛn minin kɛn lɛn dɛ bii-a wa.

⁵ Asɛ din Davida kɛ lɛ bie, ǹ nə́ goã loe loe, bɛ̀ biɛ a tɔ boe ne ǹ nə́ pii mà «Sayulu ná a min gigiã dɛ, Davida ná a min damata dɛ wa ya?»

⁶Akiisi lɛ dia Davida la, á pɛ-n kɛnɛn: «Ka Dɛnaa Lawa Yiikoonaa lɛ tɔ nɛ, n tá min pepere lɛa. N tá kɔɔ̃n masɛ ganaa, ma n yɛ woe zia biɛ kun ka ma nɛ. A giala, a kũ n da masɛ li lɛ ganaa, a da kaa pelo lɛ, masɛ zɛ̀rɛbaa ǹ bǎã yɛ n ganaa wa, sɛnɛ, n ba kɔɔ̃n masɛ miã kiin lɛn ganaa wa.

⁷Bɛ lɛ tɔ ganaa, n lɛ goa, n wo ka là nyantoro ne, n baran sii kɔn zɛnaa, sii mɛn nə́ ke, á ná a die kɔɔ̃n koe Filisiti minin kiin lɛn ganaa wa.»

⁸Davida pɛ Akiisi ni: «Man má wàa mɛn sii la kəni? Ń masɛ toa n li á daa dɔ pelo ganaa, ma nə ń zɛ̀rɛ mɛn yɛ n dí-nyali lɛ ganaa, bɛ ná a ba toɛ, má n boe la má n die zia diɛ maa dɛnaagiĩ kii lɛ a zɔ́ɔn ganaa wa?»

⁹Akiisi Davida lɛ si, á pɛ nɛ: «Ma á doɛ̃ sonbore máa n tá kɔɔ̃n masɛ ganaa ka n pɛ mà Lawa a lon a dia dí-a wole ne, sɛnɛ, Filisiti minin kiin lɛn man nə́ pɛ mà n ba woe zia biɛ kun ka ǹsɛn nɛ wa.

¹⁰A bɛ́ miɛ̃, n die n yoo baayɛlɛ yiisoone, kun ka n dɛnaagiĩ a dí-nyalin mɛnɛn nə da kunun n ni. Bɛ̀ lɛ̀ waa lɔn gɔrɔ, n yoo baayɛlɛ yiisoone ǹ woo.»

¹¹Lɛ̀ waa lɔn, Davida yoo baayɛlɛ yiisoone kun ka a minin ni, ǹ nə́ n bɔyaa ǹ nə́ woo Filisiti minin gána nɛ. Filisiti minin lɛn sɛn nə́ woo Zizereyɛli.