Read Samo, Southern Sam1 5 Bible Online

Sam1 5 - Samo, Southern bible

Sam1 5

¹Filisiti minin bɛ́ ǹ nə́ Lawa a goo lɛ si, ǹ nə́ n toa nɛ Ebɛn-Ezɛrɛ ǹ nə́ woo ne Asidɔdi[8].

²Filisiti minin nə́ Lawa a goo lɛ saa. Ǹ dì mɛn bɛ́ ǹ nə́ bíi Daagɔn ǹ nə́ woo da bɛ genli a kion.

³Bɛa lɛawaa, Asidɔdi minin lɛn nə́ yoo baayɛlɛ yiisoone, bɛ̀ Daagɔn bɛ́ á bɔ á mɛnaa tán a lɛ la, Dɛnaa Lawa a goo lɛ yɔrɔ-a. Ǹ nə́ wusoo ǹ nə́ Daagɔn saa ǹ nə́ da a bǎã nɛ.

⁴Bɛa Lɛawaa doo, ǹ nə́ yoo baayɛlɛ yiisoone, bɛ̀ Daagɔn bɛ́ á bɔ á mɛnaa a lɛ la, Dɛnaa Lawa a goo lɛ yɔrɔ-a. Daagɔn mìi na, a gɔnɔn nə́ yiyiɛ ǹ nə́ goa tán kiɛnlɛ baã bii, á dinmaa tunturun kɛ́ goã tán.

⁵Bɛ lɛ na á toa, a da kaa pelo lɛ, Asidɔdi kiwi, min mɛnɛn yii tumaa bɛ́ we Daagɔn a kion, ka Daagɔn a wúlu-bɔlen ne, ǹ ba ǹ gòã diɛ a kiɛnlɛ mìi-n wa.

⁶Dɛnaa Lawa fuu nyaa Asidɔdi minin manɛ, á bɔ̀n da ǹ ganaa. Á gɔ̀nɔn kokoree busu da ǹ ganaa, Asidɔdi laanka a lɛ-a ǹ kiwin ni.

⁷Ǹ bɛ́ ǹ nə́ yɛ miɛ̃, Asidɔdi minin lɛn nə́ pɛ mà Izirayeli a Lawa a goo kɛ a goɛ̃ ǹsɛn li wa, a giala a ba n gɔn nyɔnyoɛ ǹsɛn li wa, a nyɔnyoɛ ǹsɛn dì, Daagɔn dɔ li wa.

⁸Ǹ lɛ dɔ Filisiti minin kiin tumaa ganaa mà ǹ da ǹ lɛ sɔkɔn ǹsɛn li. Ǹ nə́ tɔń pɛ ǹ nɛ: «Wɔsɛn man die Izirayeli a Lawa a goo kɛ biɛ lɔn?» Ǹ nə́ n toa: «Izirayeli a Lawa a goo lɛ doamaa nɛ a wo Gaati kiwi.» Bɛ kio, ǹ nə́ woo ka Izirayeli a Lawa a goo lɛ nɛ walan.

⁹Sɛnɛ goo lɛ a dɔ kio, Dɛnaa Lawa baraa kɔ kiwi lɛ ganaa, bɛ́ nyɛ́ɛ da kiwi lɛ ganaa parsiini. Lawa gɔ̀nɔn kokoree busu da kiwi lɛ a minin ganaa, nɛnyaanan laanka min golen ne.

¹⁰Ǹ nə́ Lawa a goo lɛ dia Ekrɔn. Sɛnɛ, Lawa a goo lɛ bɛ́ á dɔ Ekrɔn lɔn gɔrɔ, Ekrɔn minin lɛn nə́ n lɛ dɛ bɛ̀ ǹ nə́ pii: «Ka n ka daa ka Izirayeli a Lawa a goo lɛ nɛ wɔsɛn li mà ka wɔsɛn dɛ wɔ gã, wɔsɛn laanka wɔa zaman nɛ?»

¹¹Ǹ lɛ dɔ Filisiti minin kiin tumaa ganaa mà ǹ da n lɛ sɔkɔn. Ǹ nə́ pɛ: «Ka Izirayeli a Lawa a goo lɛ dia a bɔ ǹ bǎã nɛ, ń giɛ a ba wɔsɛn bɔ̀n biɛ wa, wɔsɛn laanka wɔa zaman nɛ.» Nyɛ́ɛ na á goã ka a daa a kiwi minin lɛn tumaa dɛ, a giala, Lawa dɔlɔ baraa bɔ a minin ganaa.

¹²Min mɛnɛn bɛ́ ǹ nə́ goã ǹ yii n koo, gɔ̀nɔn kokoree busu na á goã bɛn ganaa. A bɛ miɛ̃, kiwi minin lɛn nə́ bubui da, yǎa ǹ lɛn dɔ lon.