Read Southern Sotho Mattheu 25 Bible Online

Mattheu 25 - Southern Sotho bible

Mattheu 25

¹Mohlang oo mmuso wa mahodimo o tla tshwantshwa le barwetsana ba leshome, ba nkileng mabone a bona, ba tswa ho ya kgahlanyetsa monyadi.

²Ba bahlano ba bona e ne e le ba bohlale, ba bahlano e le mawatla.

³Ba mawatla ba nka mabone a bona, mme ba se ke ba nka ole le bona.

⁴Empa ba bohlale ba nka ole ka dipitseng tsa bona, le mabone a bona.

⁵Eitse ha monyadi a dieha, ba otsela bohle, ba robala.

⁶Yare hara mpa ya bosiu ha utlwahala mokgosi, ha thwe: Bonang, monyadi ke eo; tsoang le mo khahlanyetse.

⁷Yaba barwetsana bao bohle ba tsoha, ba lokisa mabone a bona.

⁸Mawatla a re ho ba bohlale: Re feng ole ya lona; hobane mabone a rona a a tima.

⁹Empa ba bohlale ba araba, ba re: Che; esere mohlomong ha a ka a lekana rona le lona, le mpe le ye ho ba bapatsang, le ithekele.

¹⁰Yare ba sa ya reka, monyadi a fihla; mme ba neng ba itokisitse ba kena le yena moketeng wa lenyalo, mme monyako wa koaloa.

¹¹Kamorao, le bona barwetsana ba bang ba tla, ba re: Morena, Morena, re bulele!

¹²Empa a araba, a re: Kannete ke re ho lona: Ha ke le tsebe.

¹³Fadimehang ke hona, hobane ha le tsebe letsatsi kapa hora eo Mora motho a tla tla ka yona.

¹⁴Hobane mmuso wa mahodimo o jwaloka motho ya etang, a bitsa bahlanka ba hae, a ba nea maruo a hae.

¹⁵A nea e mong ditalenta tse hlano, e mong tse pedi, e mong e le nngwe; e mong le e mong ka matla a hae; mme a phakisa a tloha.

¹⁶Ya neng a amohetse ditalenta tse hlano a ya, a hweba ka tsona, a fumana tse ding tse hlano.

¹⁷Le ya neng a amohetse tse pedi, le yena a rua tse ding tse pedi.

¹⁸Empa ya amohetseng e le nngwe a ya, a tjheka fatshe, a pata tjhelete ya monga hae.

¹⁹Eitse hobane ho fete nako e telele, monga bahlanka bao a tla, mme a lokisa le bona.

²⁰Ya neng a amohetse ditalenta tse hlano a tla, a tlisa tse ding tse hlano, a re: ’Morena, o ne o nneile ditalenta tse hlano; bona, ke ruile ditalenta tse ding tse hlano ka tsona.

²¹Mong wa hae a re ho yena: O entse hantle, mohlanka ya molemo, ya kgabane!

²²Ya neng a amohetse ditalenta tse pedi a tla, a re: ’Morena, o ne o nneile ditalenta tse pedi; bona, ke ruile ditalenta tse ding tse pedi.

²³Morena wa hae a re ho yena: O entse hantle, mohlanka ya molemo, ya tshepehang; o tshepehile dinthong tse seng kae, ke tla o bea hodima tse ngata: kena thabong ya morena wa hao.

²⁴Jwale ya amohetseng talenta e le nngwe a tla, a re: “Morena, ke o tsebile hore o motho ya thata, ya kotulang moo o sa kang wa jala teng, mme o bokella moo o sa kang wa jalla teng.

²⁵Ka tshoha, ka ya, ka pata talenta ya hao mobung; bona, o na le ya hao.

²⁶Mong wa hae a araba, a re ho yena: Mohlanka ya kgopo, ya botswa, o tsebile hobane ke kotula moo ke sa kang ka jala, mme ke bokella moo ke sa kang ka jala.

²⁷Ka baka leo, o ka be o beile tjhelete ya ka ho ba ananyang, mme etlare ha ke fihla, nka be ke amohile tsa ka ka phaello.

²⁸Jaanong mo tseeleng talente e e mo go ene, lo e neye yo o nang le ditalente di le some.

²⁹Hobane e mong le e mong ya nang le letho, o tla newa, a be le ho hongata haholo;

³⁰Le lahleleng mohlanka ya se nang molemo lefifing le kantle; teng ho tla ba dillo le ditsikitlano tsa meno.

³¹Mohla Mora motho a tlang ka kganya ya hae, a ena le mangeloi a halalelang kaofela, ke moo a tla dula teroneng ya kganya ya hae.

³²Mme ditjhaba tsohle di tla bokellwa kapele ho yena, mme o tla kgetha batho ho ba bang, jwaloka modisa ha a arola dinku ho dipodi.

³³O tla bea dinku ka letsohong la hae le letona, empa dipodi ka ho le letshehadi.

³⁴Ke moo Morena a tla re ho ba ka letsohong la hae le letona: Tloong, lona ba hlohonolofaditsweng ke Ntate, le rue mmuso oo le o lokiseditsweng haesale lefatshe le thewa.

³⁵Hobane ke ne ke lapile, mme la mpha dijo; ke ne ke nyorilwe, mme la nnea ka nwa;

³⁶Ke hlobotse, la nkapesa; ke ne ke kula, mme la nketela; ke ne ke le teronkong, mme la tla ho nna.

³⁷Ke moo ba lokileng ba tla mo araba, ba re: Morena, ke neng re ileng ra o bona o lapile, mme ra o fepa? kapa o nyorilwe, mme ra o nosa?

³⁸Ke neng re o boneng o le moeti, mme ra o amohela? kapa o hlobotse, mme ra o apesa?

³⁹Kapa re o bone neng o kula, kapa o le teronkong, mme ra tla ho wena?

⁴⁰Morena o tla araba, a re ho bona: Kannete ke re ho lona: Erekaha le etseditse e mong wa bana beso ba banyenyane bana, le entse ho nna.

⁴¹Jwale o tla re ho ba ka ho le letshehadi: Tlohang ho nna, lona ba rohakilweng, le ye mollong o sa feleng, o lokiseditsweng Diabolose le mangeloi a hae;

⁴²Hobane ke ne ke lapile, mme ha le a ka la mpha dijo;

⁴³ke ne ke le moeti, la se ke la nkamohela; ke hlobotse, la se ke la nkapesa; ke kula, ke le teronkong, mme ha le a ka la nketela.

⁴⁴Jwale le bona ba tla mo araba, ba re: Morena, ke neng re ileng ra o bona o lapile, kapa o nyorilwe, kapa o le moeti, kapa o hlobotse, kapa o kula, kapa o le teronkong, mme ra se ke ra o sebeletsa?

⁴⁵Ke moo a tla ba araba, a re: Kannete ke re ho lona: Erekaha le sa ka la etsa e mong wa ba banyenyane bana, le nna ha le a ka la nketsa jwalo.

⁴⁶Bao ba tla ya bohlokong bo sa feleng, empa ba lokileng ba tla ya bophelong bo sa feleng.