Read Southern Sotho 2 Bakorinthe 13 Bible Online

2 Bakorinthe 13 - Southern Sotho bible

2 Bakorinthe 13

¹Lena ke lekhetlo la boraro ke tla ho lona. Ka melomo ya dipaki tse pedi kapa tse tharo taba tsohle di tla tiiswa.

²Ke le boleletse pele, mme ke le boleletse pele, jwaloka hoja ke le teng la bobedi; mme haele jwale, ke le sieo, ke ngolla ba kileng ba etsa sebe pele, le ba bang kaofela, hore, leha ke ka kgutla, nke ke ka ba qenehela.

³Erekaha le batla bopaki ba hore Kreste ya buang ka nna, ha a fokole ho lona, empa a le matla ka ho lona.

⁴Hobane le hoja a ile a thakgiswa sefapanong ka bofokodi, empa o phela ka matla a Modimo. Hobane le rona re fokola ho yena, empa re tla phela le yena ka matla a Modimo bakeng sa lona.

⁵Itebeleng hore na le tumelong; iponahatseng. Na ha le tsebe hore Jesu Kreste o ka ho lona, haese ha le le ba nyatsehang?

⁶Empa ke tshepile hore le tla tseba hore rona ha re ba hlolehang.

⁷Jwale ke rapela Modimo hore le se ke la etsa bobe; e seng hore re bonahale re amohetswe, empa e le hore lona le etse ho lokileng, leha rona re le jwaloka ba nyatsehang.

⁸Hobane re ke ke ra etsa letho le hananang le nnete, haese nnete.

⁹Hobane re a thaba, ha rona re fokola, mme lona le le matla;

¹⁰Ke ka baka leo ke ngolang taba tseo, ke le sieo, hore ha ke le teng, ke se ke ka etsa ka bohale, ka matla ao Morena a mphileng wona, e leng ho haha, e seng ho timetsa.

¹¹Qetellong, barab’eso, salang hantle. Le phethehe, le tshedisehe, le be le kgopolo e le nngwe, le phele ka kgotso; mme Modimo wa lerato le kgotso o tla ba le lona.

¹²Dumedisanang ka kako e halalelang.

¹³Bahalaleli bohle ba a le dumedisa.

¹⁴Mohau wa Morena Jesu Kreste, le lerato la Modimo, le kopano ya Moya o Halalelang di be le lona bohle. Amen. (Lengolo la bobeli le eang ho Bakorinthe le ngotsoe ke Tite le Lucas ho tsoa Filipi, e leng motse oa Macedonia.)