Read Southern Sotho 2 Bakorinthe 3 Bible Online

2 Bakorinthe 3 - Southern Sotho bible

2 Bakorinthe 3

¹A re boela re qala ho ithorisa? Kapa na, joalo ka ba bang, re hloka mangolo a bopaki a eang ho lōna, kapa lengolo la bopaki le tsoang ho lōna?

²Lona le lengolo la rona le ngotsweng ka dipelong tsa rona, le tsejwang, le balwang ke batho bohle.

³Erekaha le bonahaditswe hore le lengolo la Kreste, le ngotsweng ke rona, e seng ka enke, empa e le ka Moya wa Modimo o phelang; e seng matlapeng a lejoe, empa matlapeng a nama a pelo.

⁴Mme re na le tshepo e jwalo ho Modimo ka Kreste.

⁵E seng hore re lekane ka borona ho nahana ntho leha e le efe e ka e tswa ho rona; empa ho lekana ha rona ho tswa ho Modimo;

⁶Ke yena ya re entseng hore re be basebeletsi ba selekane se setjha; e seng wa letere, empa e le wa moya: hobane lengolo le a bolaya, empa moya ke wona o phedisang.

⁷Empa ha tshebeletso ya lefu, e ngodilweng, e betlilweng majweng, e ne e na le kganya, hoo bana ba Iseraele ba neng ba sitwa ho tadima sefahleho sa Moshe ka baka la kganya ya sefahleho sa hae; e leng tlotla e neng e tla fela.

⁸Tshebeletso ya Moya e ke ke ya ba le kganya e fetisang jwang?

⁹Hobane tshebeletso ya kahlolo ha e ka ba le kganya, tshebeletso ya ho loka e tla fetisa kganya ka ho fetisa hakakang.

¹⁰Hobane le sona se neng se tlotlisitswe ha se a ka sa kganya ka mokgwa oo, ka baka la kganya e fetisisang.

¹¹Hobane ha se neng se fela se bile le kganya, se sa feleng se tla ba le kganya e kgolo hakaakang!

¹²Ka hona, kaha re na le tšepo e joalo, re bua ka bolokolohi bo boholo.

¹³E seng jwaloka Moshe ya neng a ikgurumetsa sefahleho ka lesira, hore bana ba Iseraele ba tle ba se ke ba tadimisisa pheletso ya ntho e felang.

¹⁴Empa dikelello tsa bona di ne di foufaditswe, hobane ho fihlela kajeno lona lesira leo le ntse le sa tlosoe ha ho balwa testamente ya kgale; lesira leo le tlositsweng ho Kreste.

¹⁵Empa ho fihlela kajeno, ha Moshe a balwa, lesira le ntse le le hodima dipelo tsa bona.

¹⁶Leha ho le jwalo, mohla ba sokolohelang ho Morena, lesira le tla tloswa.

¹⁷Jwale Morena ke Moya oo; mme moo Moya wa Morena o leng teng, ho na le tokoloho.

¹⁸Empa rona bohle, ka difahleho tse ahlamileng, re tadima jwaloka seipone kganya ya Morena, re fetohela setshwantshong se le seng ho tloha kganyeng ho isa kganyeng, jwalokaha re le ka Moya wa Morena.