Read Southern Sotho 1 BaThesalonika 3 Bible Online

1 BaThesalonika 3 - Southern Sotho bible

1 BaThesalonika 3

¹Ka baka leo, ha re sa kgone ho mamella, ra bona ho le molemo ho siuwa Athene re nnotshi;

²ra roma Timothea, ngwaneso, mosebeletsi wa Modimo, mosebeletsi wa rona Evangeling ya Kreste, ho le tiisa, le ho le tshedisa ka baka la tumelo ya lona.

³hore ho se be motho ya sisinngwang ke dihloreho tsena, hobane le a tseba hore ke tsona tse reretsweng tsona.

⁴Hobane kannete, mohla re sa na le lona, re kile ra le bolella pele hore re tla hloriswa; jwalokaha ho etsahetse, le lona le a tseba.

⁵Ka baka leo, ha ke sa kgone ho mamella, ke ile ka romela ho tseba tumelo ya lona, esere mohlomong Moleki a le lekile, mme mosebetsi wa rona wa fetoha lefeela.

⁶Empa jwale, ha Timothea a etswa ho lona, a tla ho rona, a re tlisetsa molaetsa o molemo wa tumelo ya lona le lerato la lona, le hore le ntse le re hopola hantle ka mehla, le hlolohetswe haholo ho re bona jwalokaha le rona re le bona.

⁷Ka baka leo, bana beso, re tshedisitswe ke lona mahlomoleng wohle le matshwenyehong a rona ka tumelo ya lona.

⁸Hobane jwale re a phela, ha le ema le tiile Moreneng.

⁹Hobane re ka busetsa teboho efe ho Modimo bakeng sa lona, ka thabo yohle eo re e thabelang ka baka la lona pela Modimo wa rona?

¹⁰Bosiu le motsheare re ntse re rapela ka matla hore re bone sefahleho sa lona, mme re tle re phethe tse haellang tumelong ya lona?

¹¹Jwale Modimo, Ntata rona, le Morena wa rona Jesu Kreste, a ke a lokise tsela ya rona ho tla ho lona.

¹²Morena a ke a le hodise, le a le atise leratong la ho ratana le ho batho bohle, jwalokaha le rona re le etsa ho lona.

¹³A tle a tiise dipelo tsa lona, le hloke sekodi kgalalelong, pela Modimo, Ntata rona, mohla Morena wa rona Jesu Kreste a tlang le bahalaleli bohle ba hae.