Read Southern Sotho 1 BaThesalonika 4 Bible Online

1 BaThesalonika 4 - Southern Sotho bible

1 BaThesalonika 4

¹Hape, bana beso, re a le rapela, mme re le kgothatsa ka Morena Jesu, hore, jwalokaha le amohile ho rona kamoo le tshwanetseng ho tsamaya le ho kgahlisa Modimo kateng, le hole le ho feta.

²Hobane le tseba ditaelo tseo re le laetseng tsona ka Morena Jesu.

³Hobane sena ke thato ya Modimo, khalaletso ya lona, hore le ile bohlola;

⁴E mong le e mong ho lona a tle a tsebe ho ruela sejana sa hae khalalelong le tlhomphong;

⁵e seng ka ditakatso, jwaloka baditjhaba ba sa tsebeng Modimo;

⁶hore ho se be motho ya fetelletsang, mme a qhekella ngwanabo tabeng efe kapa efe;

⁷Hobane Modimo ha o a re biletsa ditshila, empa o re bileditse kgalalelong.

⁸Ka baka leo, ya nyatsang ha a nyatse motho, empa o nyatsa Modimo, wona o re neileng Moya o Halalelang wa wona.

⁹Empa malebana le lerato la boena ha le hloke hore ke le ngolle, hobane le lona ka bolona le rutilwe ke Modimo ho ratana.

¹⁰Le lona le ntse le etsa hoo ho baena bohle ba Masedonia yohle;

¹¹Le ikemisetse ho iketla, le ho iketsetsa mesebetsi ya lona, le ho sebetsa ka matsoho a lona, jwalokaha re le laetse;

¹²hore le tle le tsamaye ka bokgabane pela ba kantle, le tle le se ke la hloka letho.

¹³Bana beso, ha ke rate ha le hloka tsebo malebana le ba ithobaletseng, le tle le se ke la hlomoha jwaloka ba bang ba se nang tshepo.

¹⁴Hobane ha re dumela hoba Jesu o shwele, a ba a tsoha, ka mokgwa o jwalo le ba ithobaletseng ho Jesu, Modimo o tla ba tlisa le yena.

¹⁵Hobane sena ke seo re le bolellang sona ka lentswe la Morena, hore rona ba phelang, ba saletseng ho tleng ha Morena, re ke ke ra raka ba ithobaletseng.

¹⁶Hobane Morena ka sebele o tla theoha lehodimong ka mohoo, ka lentswe la arekangeloi, le ka terompeta ya Modimo, mme ba shwetseng ho Kreste ba tla tsoha pele.

¹⁷Jwale rona ba phelang ba saletseng morao, re tla nkelwa marung hammoho le bona, ho ya kgahlanyetsa Morena sebakeng, mme kahoo re tla ba le Morena kamehla.

¹⁸Ka baka leo, tshedisanang ka mantswe ana.