Read Sukuma Bible 2015 – Bibilia Ilagano Lya Kale 2015 Wandijo 1 Bible Online

Wandijo 1 - Sukuma Bible 2015 – Bibilia Ilagano Lya Kale 2015 bible

Wandijo 1

¹A ha wandījo wa kūseema, ū Mulungu akaseema igūlū na sī.

²Ī sī yalī dalali, yalī ītī na shose shose sha kwīyīta ībeelele[1] Nīyo yalī ītingatilwe minzī, hama yalī mu giiti shitaale. Alīyo ū Moyo wa ng'wa Mulungu walī a higūlya ya minzī.

³Hūna ū Mulungu ūhaya gīkī, “Ni lībizage ho isana[2] ng'hana lyūbiza ho isana.”

⁴Ū Mulungu ūbona yabeelela ū kūbiza ho ī lisana; ī lisana ūlīlekanya nī giiti.

⁵Ū Mulungu ūliitana ī lisana “līīmi,” ī giiti ūshiitana “būjikū.” Yūbiza mhīndī, yūbiza dilū, lūshikū lwa kwandīja.

⁶Hangī ū Mulungu ūhaya gīkī, “Ni gūbizage ho ng'wanya gwa kūgalekanya a minzī.”

⁷Ū Mulungu ūbeeja ng'wanya gwa kūgalekanya a minzī. Gangī gūbiza kwigūlya, a gangī kū sīlīlī ya ng'wanya gwenūyo.

⁸Ū Mulungu ūgwitana ū ng'wanya gwenūyo “igūlū.” Yūbiza mhīndī, yūbiza dilū, lūshikū lwa kabīlī.

⁹Hūna ū Mulungu ūhaya hangī gīkī, “A minzī ayo galī ha sīlīlī y'igūlū gikuminge hamò, yilonge sī nyūmu;” ng'hana yūbiza gīko.

¹⁰Ī lipandī lya sī īyo ītī na minzī, ū Mulungu ūlitana “Sī nyūmu;” alīyo a minzī ayo gakikuminga ūgitana “Nyanza.” Ū Mulungu ūbona yabeelela.

¹¹Na lūūlū ū Mulungu ūhaya gīkī, “Ī sī ni īzwishage sha kūzwa, Ībize ho mitī, na mbika jose ja shikolo sha kūzwa, īsho shilī na matwajo ga mbīyū ja kūzwa.” Ng'hana yūbiza gīko.

¹²Ī sī yūbiza na būdūla wa kūzwisha shikolo; yūzwa mitī ya būlī mbika, na būlī shose īsho shilī na mbīyū ja kūzwa na kūtwaja matwajo. Ū Mulungu ūbona yabeelela.

¹³Yūbiza mhīndī, yūbiza dilū, lūshikū lwa kadatū.

¹⁴Ū Mulungu ūhaya hangī gīkī, “Ū mu ng'wanya gwigūlū shibize ho shikolo sha kūfunya isana, shiyūgalekanya a makanza ga līīmi na a ga būjikū; na koolekeja makanza ga chū na jidikū, hamò na kagalūkīle ka myaka na shikū.

¹⁵Nīyo shibize sha kūtūūla isana ū mu ng'wanya gwigūlū, na kwītwimīla ī sī.” Ng'hana yūbiza gīko.

¹⁶Ū Mulungu ūbeeja shikolo shitaale shibīlī sha kūfunya isana. Ī shimò shitaale, shene līīmi, shūbiza sha kūsuga makanza ga līīmi. Ī shido shūsuga makanza ga būjikū, gwene ng'weji; hūna ūbeeja na sonda.

¹⁷Ū Mulungu ūshitūūla ī shikolo shenīsho ū mu ng'wanya gw'igūlū, gīkī shiyūyītwimīl'ī sī.

¹⁸Na gīkī shigasuge a makanza ga līīmi na a ga būjikū, na kūshilekanya ī giiti nī lisana. Ū Mulungu ūbona yabeelela.

¹⁹Yūbiza mhīndī, yūbiza dilū lūshikū lwa kanè.

²⁰Hanuma ya henaho ū Mulungu ūhaya hangī gīkī, “A minzī gookale shiseeng'wa shipanga sha būlī mbika; na noni ja būlī mbika jibize ho, jiyūlala a higūlya ya sī ū mu ng'wanya gwigūlū.”

²¹Hūna ū Mulungu ūseema shiinū nhaale nhaale ja mu nyanza, nī shiseeng'wa shingī pyī ī shipanga, īsho shokalile mu minzī, īsho shikaselemaga; nī noni ja kūlala ūjiseema ja būlī mbika. Ū Mulungu ūbona yabeelela.

²²Ī shiseeng'wa shenīsho ūshifuuha alīhaya gīkī, “Ibyalanagi mukwīle, mugookaje pa a minzī ga mu nyanza; nī noni jookale hose pyī ū mu sī.”

²³Yūbiza mhīndī, yūbiza dilū, lūshikū lwa katanò.

²⁴Ū Mulungu ūhaya hangī gīkī, “Ī sī īfunye shiseeng'wa shipanga sha mbika na mbika; jibize ho ndimu ja būlī mbika. Na shiinū ja kwigweesa ha sī, na būlī mbika jose ja shiinū ja mu matogolo.” Ng'hana yūbiza gīko.

²⁵Ū Mulungu ūbeeja mbika na mbika ja shiinū ja mu matogolo; nī ndimu ja būlī mbika jose pyī ūmo jigelelile, pyī nī shiinū ījo jikigweesaga ha sī ja būlī mbika. Ū Mulungu ūbona yabeelela.

²⁶Hūna ū Mulungu ūhaya gīkī, “Tūbeeje na munhū mu suso yise, abize wa kūtwikola. Bajisuge ī ndīlo ja mu nyanza, nī noni ja higūlya, pyī nī ndimu; babize basugi bayo ī sī, nī shiinū ja kwigweesa ha sī pyī ī jose.”

²⁷Hūna ū Mulungu ūnseema munhū mu suso yakwe, mu suso yakwe ū Mulungu ūnseema, ūbaseema ngosha na nkīma.

²⁸Ū Mulungu ūbafuuha alīhaya gīkī, “Ibyalanagi mukwīle, ng'wīyookaje ī sī ng'wīsuge. Nī ndīlo ja mu nyanza mujisuge, pyī nī noni ja hape; nī shiseeng'wa shipanga ī shose īsho shilī mu sī.”

²⁹Hanuma ū Mulungu ūbawīla gīkī, “Nang'winhaga pyī ī sha mu sī īsho shikazwaaga na kūtwaja matwajo, nī mitī ya shisuumo pye ī yose. Shikūbiza shilīwa shing'we,

³⁰būlī ntī gwa madūūtū, nī shinīlīzu shose shose īsho shikazwaaga, nashītaga kūbiza shilīwa kūlwa shiinū jose ja mu sī, nī noni ja higulya, nī shiseeng'wa sha kwigweesa ha sī; kūlwa shose pyī ī sha mu sī īsho shilī na myūyī ya būpanga.” Ng'hana yūbiza gīko.

³¹Hūna ū Mulungu ūbona gīkī, pyī īsho akashibeeja shilī shawiza no. Yūbiza mhīndī, yūbiza dilū, lūshikū lwa katandatū.