Read Sukuma Bible 2015 – Bibilia Ilagano Lya Kale 2015 Wandijo 13 Bible Online

Wandijo 13 - Sukuma Bible 2015 – Bibilia Ilagano Lya Kale 2015 bible

Wandijo 13

¹Ū Abulamu wīnga ko ī Misili alī nū nke, ūja Negevu nī shikolo shakwe pyī ī shose; walī nang'hwe nū Lutu.

²Ū Abulamu akajikwīja no ī mitugo nī hela, hamò nī zahabu.

³Nī Negevu atadīlile koi, wīnga ūja akūsaama saamaga, nose ūkashika Beeseli, ūja hangī ūko yalī ng'hambī yakwe kwandya, a ha gatī ya Beeseli na Ai;

⁴Ūko walī wabeeja ng'walīlo. Aho washika ko ūlīkumīlīja ī lina lya ng'wa SEEBA.

⁵Nū Lutu walī nsabi, nang'hwe walī na madaale mataale ga mitugo na maheema mingī. Alīyo nang'hwe wajaga akūsaama saamaga hamò nū Abulamu.

⁶Kwike nose īkabagehela ī sī; būlemeelwa ū kwikala hamò. Nguno a madaale ga mitugo jabo gakakūla no, kūshisha yūbiza shilambu ū kwikala hamò.

⁷Yūbūūka yombo a ha gatī ya badīīmi ba mitugo ja ng'wa Abulamu, na a ba mitugo ja ng'wa Lutu; būyikala bakūyogaga. Nīyo a makanza gene bikalaga Bakanaani ū mu sī yenīyo, hamò na Bapelizi.

⁸Hūna ū Abulamu ūng'wīla ū Lutu gīkī, “Bebe ītī yawiza ībūūke yombo a ha gatī yako nū nene, nūūlū a ha gatī ya badīīmi bako na a bane; nguno a bise tūlī ba lūdūgū lūmò.

⁹Ī gīsī ūlībona kinehe, tūhaya ī sī yīyī īlī kū būtongi wako īkulindīlīle? Tūlekanage; ū bebe ūlū ūsola kūja kū nkono gwa lūmoso, ū nene nakūja kū gwa būlyo. Alīyo ū bebe ūlū ūsola kūja kū nkono gwa būlyo, ū nene nakūja ū kū gwa lūmoso.”

¹⁰Ū Lutu ūbūūcha a miso gakwe kūgalola a matogolo, ūlībona ī lilago lya kū mongo gwa Yolodani ūmo lyalī ū būnīlīzu.[21] Ū SEEBA aho ataalī kūjikenaagūla sī ja Sodoma na Gomola, ī litogolo lyenīlo lyalī gītī ngūnda gwa ng'wa SEEBA, nūūlū gītī sī ya Misili, kūjīlīīla Zoa.

¹¹Hūna lūūlū ū Lutu wisolela ī mbūga ya kū mongo gwa Yolodani, wīnyama pye ī yose yūbiza yakwe. Hūna ūsaamya ī ng'hambī yakwe kūjīlīīla kīya, būbiza balekana a banhū benabo:

¹²Ū Abulamu wikala mo ū mu sī ya Kanaani. Alīyo ū Lutu ūkigasha hamò nabo a banhū ba mu mizengo ya kū mbūga ja ng'wilago, ī ng'hambī yakwe wīyiheja na nzengo gwa Sodoma.

¹³Kwike a bana Sodoma baalī na nhūngwa ja malofu no; baalī na shītīle shabūbi no ū kū būtongi bo ng'wa SEEBA.

¹⁴Aho wasaama ū Lutu, ū SEEBA ūng'wīla ū Abulamu gīkī, “Būūchaga lūūlū a miso gako wīlole ī sī ū kūfuma aho ūlī henaho; lolaga ī sukuma nī dakama, nī kīya nī ng'weli.

¹⁵Pyī ī sī īyo ūlīyībona yenīyī nalīkwinha bebe na būbyīle wako, shikū ja welelo na welelo.

¹⁶Ū būbyīle wako nakūbūkwīja no, būkwīle gītī lūbuubu lwa ha sī; ūlū ose ose ūdūla kūlūbala lūbuubu lwa ha sī, hū kūhaya akūdūla nū kūbūbala ū būbyīle wako.

¹⁷Yeela yeelaga lūūlū ū mu sī yenīyī, nguno nalīkwinha bebe; īlolage wībone ū būlīhu wayo, nū būgalī galī wayo.”

¹⁸Hūna ū Abulamu ūsaamya ī ng'hambī yakwe a henaho, ūja Hebuloni ūkazenga hihī na mitī ya Mamule.[22] Ūbeeja ho na ng'walīlo kūlwa ng'wa SEEBA.