Read Sukuma Bible 2015 – Bibilia Ilagano Lya Kale 2015 Wandijo 15 Bible Online

Wandijo 15 - Sukuma Bible 2015 – Bibilia Ilagano Lya Kale 2015 bible

Wandijo 15

¹Hanuma ya yenīyī ū mhayo gwa ng'wa SEEBA gūng'wizīīla ū Abulamu mu koolechiwa; ūng'wīla gīkī, “Ūtogohage Abulamu. Ū nene nalī Lūmūūda lwako; nīyo nal'inong'ho itaale no ū kūlī bebe.”

²Alīyo ū Abulamu ūhaya, “Ee SEEBA wa būdūla bose, ūkūninha kī? Īkī ū nene nalīshila alīyo hū natī na ng'wana; hama ū wa kwīyingīla ī kaya yane alīho Elieza muna Damasko!”

³Ū Abulamu ongeja kūhaya, “Ūtaalī kūninha baana, na lūūlū ū ng'wingīji wane atūbiza ūngī ūlū atī nsese[24] wa kūbyalīlwa mu kaya yane!”

⁴A henaho ū mhayo gwa ng'wa SEEBA gūng'wizīīla gūlīhaya, “Ū ng'wenūyo atūbiza ng'wingīji wako yaya, ū ng'wingīji wako akūbiza ng'witūnja wako wa kūbyala bebe gete.”

⁵Hūna ū SEEBA ūmfunya hanze ū Abulamu, ūng'wīla gīkī, “Alilolaga ū kwigūlū; jibalage ī sonda ūlū ūdūgije kūjibala.” Ūng'wīla, “Ū būbyīle wako būkūbiza gīko!”

⁶Ū Abulamu ūgūzunya ū mhayo gwa ng'wa SEEBA, nang'hwe ūng'wisaabīla būtūngīlīja.

⁷Hūna ūng'wīla, “Ū nene nalī SEEBA ūyo nakakwīnja mu Ulu, sī ya Bakalidayo, nūkwenha kūūnū gīkī nakwinhe ī sī yenīyī, wīdime ībize yako ya wikomangīle.”

⁸A henaho ū Abulamu ūshosha gīkī, “Alīyo lūūlū SEEBA Mulungu, nakūmana ginehe gīkī ī sī yenīyī īkūbiza yane?”

⁹Hūna ū SEEBA ūng'wīla, “Nenhelage ndogoosa ya ng'ombe na mbūli ng'hīma, hamò na ng'ondi; ī jose jibize ja myaka idatū datū, na mhunda, na ng'hune ya ng'hūūlū.”

¹⁰Ūng'wenhela ī shose shenīsho; būlī yene wītandūla ha gatī, gūbiza mapingili abīlī. Hūna a mapingili genayo ūgiheja būlī lyene na lyichalyo. Alīyo ī noni atajitandūlile habīlī.

¹¹Ū Abulamu wikala henaho alīlang'hana, ayūjipeeja ī noni ījo jikalyaga nyama jitizūgwa hoi.

¹²Ī līīmi aho līlīsalalīja, kūjīlīīla mu ka munhū ūyo, ū Abulamu ūtindwa tūlo ndito; na giiti shitaale sha kogohya shūngwīla.

¹³Ī likanza lyenīlo, ū SEEBA ūng'wīla, “Managa hape gīkī, a banhū ba būbyīle wako bakūbiza balobeji mu sī ītī yabo, bakwītwa kūbiza basese na kūluhiwa kūshisha ikanza lya myaka magana anè.

¹⁴Alīyo ī lihanga īlo līkūbīīta kūbiza basese lyenīlo, nakūlyinha nsango; hanuma bakūfuma mo balī na sabo ningī.

¹⁵Kwike ū bebe ng'wene ūkūcha ūjīkwe, ūje kū bakūlūgenji bako mu mhola; mu būnamhala bowiza, bo shikū ningī.

¹⁶A banhū ba būbyīle wako bakūshoka hangī ū mu sī īyī mu shibyalīlwe sha kanè; nguno ū būbi wa Baamoli būtaalī ū kūshika a ha būkalīkījo wabo.”

¹⁷Aho lyalibīla ī līīmi nī giiti shūkūbanīja, kwimanīla lilonga lya kūbiza gītī lyahulīlo lya moto līkūzuukaga lyochi, na chenge shikūligimaga moto; ī shikolo shenīsho shūbīta a ha gatī ya mabudīka ga mibimba ya mitugo genayo.

¹⁸Ū mu lūshikū lwenūlo ū SEEBA ūbeeja ilagane nū Abulamu, ūhaya gīkī, “Ū būbyīle wako nalīwinha ī sī yenīyī, kwandīja kū mongo gwa Misili kūkaja kū mongo gwa Flati.

¹⁹Ī yoi ī haha īlī sī ya Bakeni, Bakenuji, Bakadimoni,

²⁰Bahītī, Bapelizi, Balefai,

²¹Baamoli, Bakanaani, Bagiligashi na Bayebusi.”