Read Sukuma Bible 2015 – Bibilia Ilagano Lya Kale 2015 Wandijo 18 Bible Online

Wandijo 18 - Sukuma Bible 2015 – Bibilia Ilagano Lya Kale 2015 bible

Wandijo 18

¹Lūshikū lūmò makanza ga līīmi lyasebaga, ū Abulahamu walī igashije ha nyango gw'ihema lyakwe, bbihī na mitī ya ng'wa Mamule; kwimanīla ū SEEBA wang'wilongela.

²Ū Abulahamu wahayūbūūcha a miso gakwe, ūbona bagosha badatū bīmīīlaga bbihī nang'hwe. Aho wababona ūbūūka a ha nyango gw'iheema lyakwe, ūpeela ajile kūbasūng'wanha; ūshika winama kūshisha ha sī.

³Ūhaya gīkī, “Baba ūlū nīlūkīlagwa kū būtongi wako, nalīng'wikūmbīlīja mutizūmītīīla ū nsese wako.

⁴Genhwe minzī magehu ng'oje mhambala jing'we, ng'wifuule a ha ntī gwenūyū.

⁵Nīyo īkī ng'wizaga ha kaya ya nsese wako baba, namubeegeje na shakūlya mupandīke nguzu, hū muje ūko mujile.” Nabo būng'wīla, “Magatū gwītage dūhū ūyo ūlīgūhaya!”

⁶Hūna ū Abulahamu wingīla wangū ū ng'wiheema ūmo walī ū Saala. Ūshika ūng'wīla gīkī, “Bebe gelekaga wangū ngele idatū ja būsu bo ngano ūkangīlīje kūbeeja migatī!”

⁷Wīnga a henaho, ūpeela kūja kwidaale lya mitugo, ūkasola mūūga ya ng'ombe ūng'winha ntūmami wakwe ībeeja wangū wangū, hūna yūzugwa.

⁸Hanuma ya henaho ūbatengela a bageni bakwe ī shilīwa; wenha na mashishanga hamò na mabeele gasegeesile, nī nyama yenīyo. Aho bandya kūlya ū wei wīmīīla bbihī nabo ū mu mbeho ya ntī gwenūyo.

⁹Kwimanīla bamūja gīkī, “Bebe alī halī ū Saala ū nke wako?” Nang'hwe ūshosha, “Ūūyo alī ng'wiheema ūmo.”

¹⁰Ū SEEBA ūhaya gīkī, “Nakwiza nakūyeleele hangī a ha ng'waka makanza gītī genaya, ū nke wako ū Saala akūbyala ng'wana ngosha.” Ī likanza lyenīlo nang'hwe ū Saala akasangwa alīdegeleka, ishīkīgije ha numa ya nyango gw'iheema.

¹¹Ū Abulahamu nū Saala baalī bakwīja ī myaka ya būlamu wabo; nīyo ū Saala walī wabīta nū ng'wikanza lya kūdūla kūbyala.

¹²Na lūūlū ū Saala wandya kūkumya wei iyene kūnū akūsekaga būnugu nugu, akwiwīlaga, “Ū būgikūlū ūmo bonikobagūlīlile ūmu, nū ngoshi one nang'hwe namhala kuu kuu ku gīkī, nakūdūla gete ū kūyega?”

¹³Hūna ū SEEBA ūng'wīla ū Abulahamu gīkī, “Nibūlī alīseka ū Saala kūnū wiwīla gīkī, ‘Ng'hana nadūgije kūbyala ng'wana nū būgikūlū bose ūbū?’

¹⁴Gūlīho mhayo kī gose gose nambu gwa kūnemeela na SEEBA? Nakūkūyeleela hangī ū ng'wikanza īlo līhelilwe, hūna ū Saala akūbyala ng'wana ngosha.”

¹⁵Alīyo ū Saala akogoha, ūlomaloma akūlemaga alīhaya, “Natasekile.” Nang'hwe ū SEEBA ūhaya, “Bebe wasekaga.”

¹⁶A banhū benabo aho baabūūka kūja, būtūngīīla Sodoma; nang'hwe ū Abulahamu ūja nabo, alībashindīkīla.

¹⁷Hūna ū SEEBA ūhaya gīkī, “Namise gete ū Abulahamu ū mhayo ūyo nalīhaya kūgwīta,

¹⁸alīyo ū būbyīle bo ng'wa Abulahamu būkūbiza ihanga itaale lya nguzu, na a mahanga pye ayo galī mu sī gakwīlūkīlwa mulī we?

¹⁹Nguno ū ng'wenūyū nansolile kūbiza[26] wa kūbatonga a baana bakwe nī kaya yakwe ū mu shibyalīlwe īsho shikwiza ha numa yakwe. Badūle kwīlang'hana ī nzīla ya ng'wa SEEBA, mu kwīta īyo yigeleelilwe na ya būtūngīlīja. Ū mu gīko ū SEEBA anshikīlīgīje ū Abulahamu pyī īyo wang'wisagīja.”

²⁰Hūna lūūlū ū SEEBA ūhaya gīkī, “Ū kūlīla kwa bana Sodoma na a bana Gomola kūlī kūtaale no, nī shibi shabo shilī sha malofu no.

²¹Ali lūūlū, nalīja ko nakīlole īyo bakwīyītaga, nabone ūlū īlenganīlile nī ng'hūngū īyo yanichibije matū. Ūlū ītī chene, nakūbona.”

²²Hūna a banhū benabo būgalūka, bandya kūshimīza batūngile ī Sodoma. Alīyo ū Abulahamu wikala henaho īmīīlile kū būtongi wa ng'wa SEEBA.

²³Nose ū Abulahamu wegeela; ūhaya gīkī, “Na a batūngīlīja ūkūbakūbanīja ū mu babūbi ūbamalanīje hamò?

²⁴Nguno hamo badūgije kwigela mo banhū makūmi atanò a batūngīlīja; ūkūgūpyagūla pye ū nzengo; ndūhū ū kūgūlekeja kūlwa nguno ya banhū makūmi atanò abo balīmo?

²⁵Yaya gete, ū gwenūyo gūtizilonga kūfuma kūlī bebe, a batūngīlīja batizūyagala hamò na bakenaagūji, gīkī ūbabale a batūngīlīja kūbiza batikīlile na bakenaagūji. Ū bebe ūtīko kwīta mhayo gūlī gīko! Ū namuji wa sī yose, aleke kwīta īyo yigeleelilwe?”

²⁶Ū SEEBA ūhaya, “Ūlū nūbona ū mu nzengo gwa Sodoma banhū makūmi atanò batūngīlīja, nakūgūlekeja kūlwa nguno yabo.”

²⁷Ū Abulahamu ūhaya hangī gīkī, “Ali lūūlū naagima ū kūyomba nū SEEBA, hene natī shikolo shose shose, nalī lūbuubu na mabu dūhū!

²⁸Al'ī lisaabu lya batūngīlīja ūlū lyūleba ho banhū batanò, gūkūja kinehe? Ūkūgūkenaagūla ū nzengo kūlwa kūgaya banhū batanò?” Nang'hwe ūshosha, “Ūlū nūbona mo banhū makūmi anè na batanò natūgūkenaagūla.”

²⁹Ūhaya hangī, “Al'ūlū bigela mo makūmi anè, īkūja ginehe?” Nang'hwe ūhaya, “Natūgūkenaagūla kūlwa nguno yabo a banhū makūmi anè benabo.”

³⁰Hūna ūhaya, “Ū Seeba ni atizagūsaaya, leka nayombe hangī. Al'ūlū bigela mo makūmi adatū dūhū?” Nang'hwe ūhaya, “Ūlū nūbona mo makūmi adatū, natūgwītīla mhayo gose gose.”

³¹Ū Abulahamu ūhaya, “Ī haha lūūlū naagimaga ū kūyomba nū SEEBA; hīmba īkūja ginehe ūlū bigela mo makūmi abīlī dūhū?” Nang'hwe ūshosha, “Natūgūkenaagūla ūlū būbiza balīmo makūmi abīlī.”

³²Hūna ūyomba hangī gīkī, “Ū SEEBA ni atizagūpelana; leka nayombe lūkangala lūmò hangī. Al'ūlū bilonga mo banhū ikūmi dūhū?” Ūshosha, “Natūgūkenaagūla ūlū balīmo banhū ikūmi.”

³³Ū SEEBA aho wamala kūyomba nū Abulahamu ūja, Abulahamu nang'hwe ūshoka kū kaya yakwe.