Read Sukuma Bible 2015 – Bibilia Ilagano Lya Kale 2015 Wandijo 19 Bible Online

Wandijo 19 - Sukuma Bible 2015 – Bibilia Ilagano Lya Kale 2015 bible

Wandijo 19

¹A bamalaika a babīlī būja ī Sodoma, būshika koi makanza ga līīmi lya mhīndī. Ū Lutu ūsangwa wigashaga ha mita gwa nzengo; aho wababona ūbūūka kūbasūng'wanha, ūshika winama kūshisha ha sī.

²Ūbawīla, “Tūlīho bababa, yīyī numba ya ntūmami wing'we nzūgi ng'wingīle mu kaya, ng'oje na mhambala ng'wifuule ū būjikū wa lelo. Būkweela, ntondo dilū mukūbūūka muje.” Būshosha, “Mm! Yaya tūkūlaala dūhū nūūlū hanze h'kūūwa aha.”

³Alīyo akabikūmbīlīja no, kūshisha nose būzunya ū kūja nang'hwe; bingīla nang'hwe ū mu numba yakwe. Ūbabeegeja shilīwa, ūbeeja migatī ya wangū wangū ītī na shibimbya, būlya.

⁴Aho bataalī kūlaala, kwimanīla pye a bagosha ba mu nzengo gwa Sodoma biza, bataale na bado; baalī bikobya kūfuma hose pyī ū mu nzengo gwenūyo. Būshika bīpīndya ī numba yenīyo.

⁵Būlinhya kūng'witana ū Lutu, balīng'wīla, “Bebe balī halī a banhū abo baalī biza mhīndī mhīndī ha ng'wako? Bafunyage aha twize tūbigushe!”[27]

⁶Ū Lutu ūfuma, ūja a hanze aho baalī; aho wafuma ūgūlugala ū nyango.

⁷Hūna ūbawīla, “Yaya lekagi ī gīko badūgū bane, mutizūgwīta ū mhayo gwenūyū, gwa malofu no!

⁸Ū nene nalī na bashīke bane babīlī bataalī kūsanja na ngosha ose ose, hambū hambū nang'wenhele bene, mubīītīle gīt'umo mutogelilwe. Alīyo a banhū benaba yaya mutizūbīītīla mhayo gose gose; nguno bizaga ha ng'wane kwifuula.”

⁹Nabo būnshokeja, “Bebe tūlekage a bise!” Nīyo bongeja na kūhaya gīkī, “Ū ng'wing'wana ng'wenūyū wasaamīlile haaha haaha ū ng'wenūmu, wandyaga na kūyūtūlomeleja ī ya kwīta. Lembeshaga lūūlū, ū bebe hū tūkūkwītīla yabūbi kūtinda ūmo twalūhayaga kūbīītīla a benabo!” Būnkandīkīja ū Lutu, kūnū balīkooba nzīla ya kūgūpagūla ū nyango.

¹⁰Alīyo a banhū abo baalī ū mu kaya būnduta ū Lutu, būng'wingīja mu numba, būgūlugala ū nyango.

¹¹Hanuma ya henaho būbatūla būbboku a banhū abo baalī ī hanze ya numba, a ha nyango. Pye, bado na bataale, bandya kūbbaabbaasha balīgūkooba ū nyango, alīyo batagūpandīkile.

¹²Hūna a banhū a babīlī benabo būng'wīla ū Lutu gīkī, “Ūlī na banhū bangī bose bose ū mu nzengo gwenūyū? Hamo bakwīlīma, nūūlū bitūnja na bashīke bako; nūūlū munhū ūngī ose ose, ūyo ūlī nang'hwe būdūgū! Bīnjage ū mu nzengo gwenūyū.

¹³Nguno tūlīlīkenaagūla ī lipandī lyenīlī; ī mihayo ya malofu īyo īkwītagwa ū ng'wenūmu yenhelegije kūlīla kūtaale no ūyo gwashikile mu matū ga ng'wa SEEBA. Na lūūlū watūtūmaga kwiza kūlīkenaagūla ī lipandī lyenīlī.”

¹⁴Hūna ū Lutu ūfuma ūja kūbawīla bakwīlīma bakwe[28] gīkī, “Bing'we twīngagi ū ng'wenūmu, nguno ū SEEBA alīgūkenaagūla ū nzengo gwenūyū.” Alīyo ū kū bakwīlīma bakwe akabiza gītī akūmelanaga dūhū.

¹⁵Ū būjikū aho boyūjīlīīla kwangalūka, a bamalaika būnkomeleja ū Lutu balīhaya, “Kangīlījaga ūnsole wangū ū nke wako, na a bashīke bako a babīlī abo balīho aha, ng'wīnge ū mu nzengo gwenūyū, mutizūsangwa mulīmo, gūkamupyagūla na a bing'we ū nsango ūyo gūliza!”

¹⁶Alīyo akandya kwigedya gedya, nose a bamalaika benabo būndima nkono ū wei, nū nke, na a bashīke bakwe, būbafunya hanze ya nzengo kūlwa kūbapīja; nguno ū SEEBA akabachīla shigongo.

¹⁷Bahayūbafunya ī hanze ūmò wabo ūhaya, “Peelagi ng'wipīje; yaya ū kwikībūka, nūūlū kwilendeja hose hose ū ng'witogolo lyenīlo. Peelelagi kū ngūlū; ūlū ītī chene mukūpyagūlwa.”

¹⁸Nang'hwe ū Lutu ūhaya, “Ka yaya baba,

¹⁹wanoolekejaga wiza būtaale no, a ha kūnichīla shigongo kūbūpīja ū būpanga bone. Kwike natūdūla ū kūpeelela ū kū ngūlū, ū nsango gūkūnipandīka nachīīle mu nzīla.

²⁰Kako kanzengo aho, a kene kalī bbihī nūūlū kūpeelela mo. Nalīkwikūmbīlīja ūnizunīlīje napeelele ng'wenūmo; nguno nīyo a koi kalī kadoololo dūhū gīt'umo ūlīkabonela. Ū mu gīko hū būkūpīla ū būpanga bone.”

²¹Ūng'wīla, “Ītaga gīko, naakūzunīlījaga nū mhayo ūyo ūlīgūlomba gwenūyo; natūgūkenaagūla ū nzengo ūyo ūlīgūhaya.

²²Peelaga wangū lūūlū ūje ko, nguno natīko kwīta mhayo gose gose aho ūtaalī kūshika ko.” (H'ī nguno yene ū nzengo gwenūyo gūkitanwa Zoa).

²³Ū Lutu aho alīshika ī Zoa, ī līīmi lyūsangwa hū lyafuma dūhū.

²⁴Hūna ū SEEBA wīyitīīla ī Sodoma nī Gomola moto na būgota wa shibiliti kūfuma ng'wigūlū kūlī SEEBA.

²⁵Wīkenaagūla gete ī mizengo yenīyo, na a mabbaala a gose a ga mapandī genayo; na a bikaji pye a bose a ba mu mizengo yenīyo; nī shose īsho shikazwaga ha sī.

²⁶Ū nke wakwe ū Lutu wanondeelaga a ha numa, alīyo ū ng'wene akikībūka kūlola kū numa, ūgalūka kūbiza ng'hīngī ya munhu.

²⁷Ū Abulahamu ūbūūka ī dilū, ūja ū kwipandī īlo walī wīmīīla kū būtongi bo ng'wa SEEBA.

²⁸Wahayūponya a miso kūlola ī Sodoma nī Gomola, gīkī agalole pye a mabbaala ga kū ntubīlo gwa kwenūko, ūbona lyochi itaale gītī lya būpī līlīdundumūka kūfuma ha sī, kūja ng'wigūlya.

²⁹H'ūmo īkajīla, ū Mulungu aho wahaya kwīkenaagūla ī mizengo ya mu sī ya ntubīlo gwenūyo, akang'wizūkwa ū Abulahamu, ūng'wīnja ū Lutu ū mu makoye ayo gakīkenaagūla ī mizengo ya mu sī īyo wikalaga ū Lutu.

³⁰Ū Lutu na a bashīke bakwe a babīlī bakīnga ī Zoa, būja kū ngūlū būkigasha kwenūko; nguno akogoha ū kwikala ī Zoa. Ūyikala ng'wipilinga hamò na a bashīke bakwe būbīlī wabo.

³¹Kwimanīla ū ntaale wang'wīla ū nzunaye gīkī, “Bebe a henaha atīho ngosha wa kūlaala nise ūmo shilī shīmīle sha banhū bose ū mu sī, hama ū sīswe ī haha wanamhalile.

³²Ali lūūlū, tūng'wishage walwa ū sīswe aleewe tūlaale nang'hwe, tūdūle kūlūlang'hana ū lūbīyū lwise mu nzīla ya ng'wa sīswe.”

³³Ū būjikū wenūbo būng'winha walwa ū saabo, ūng'wa kūshisha ūleewa. Ū nshīke ū ntaale ūja ūkalaala nang'hwe. Walī atimanaga nūūlū hado, kwandīja aho alīlaala ho ū nshīke wakwe, kūshisha wīnga ho.

³⁴A ha ntondo yaho ū ntaale ūng'wīla ū nzunaye gīkī, “Ū nene nakalaala nang'hwe ū baba ī igolo; nī lelo tūng'wishage, nang'ho ūlakalaale nang'hwe, tūlūlang'hane ū lūbīyū lwise mu nzīla ya ng'wa sīswe.”

³⁵Na ng'hana nū būjikū wenūbo būng'winha walwa ū saabo, ūng'wa kūshisha ūleewa. Ū nshīke ū ndo nawe ūja ūkalaala nang'hwe. Walī atimanaga nūūlū hado, kwandīja aho alīlaala ho ū nshīke wakwe, kūshisha wīnga ho.

³⁶Hūna lūūlū a bashīke ba ng'wa Lutu būbīlī wabo būbiza nda mu nzīla ya ng'wa saabo.

³⁷Ū ntaale ūbyala ng'wana ngosha, ūng'wilīka ī lina lyakwe Moabu. Ū ng'wenūyo hū nkūlūgenji wa Bamoabu ba lelo.

³⁸Ū nshīke ū ndo nang'hwe ūbyala ng'wana ngosha; ūng'wilīka ī lina lyakwe Ben-ammi, ū ng'wene hū nkūlūgenji wa Baamoni ba lelo.