Read Sukuma Bible 2015 – Bibilia Ilagano Lya Kale 2015 Wandijo 2 Bible Online

Wandijo 2 - Sukuma Bible 2015 – Bibilia Ilagano Lya Kale 2015 bible

Wandijo 2

¹Hūna lūūlū, ī ligūlū nī sī shūbiza shamala ū kūbeejiwa, na a mabità gose ayo galīmo.

²Ū mu lūshikū lwa mpugatī, ū Mulungu ūsangwa wamalile ū kūtūmama; hūna lūūlū wifuula ī milīmo yakwe pyī ī yose.

³Ū Mulungu ūlūfuuha ū lūshikū lwa mpungatī, ūlweeja; nguno ū mu lūshikū lwenūlo akifuula pyī ī milīmo yakwe īyo akabeeja mu kaseemele kakwe.

⁴Ū būsombooji ūbū būlī bo mihayo ya shiseeng'wa sha ng'wigūlū na mu sī gīt'umo shikabeegejiwa. Ū SEEBA Mulungu aho wamala kūseema ī sī nī ligūlū,

⁵shaalī shitīho sha kūzwa mu matogolo; ī sī yalī ītī na ntī nūūlū gūmò, nguno ū SEEBA Mulungu walī ataalī ū kwīyīta ī mbula ītūle a ha sī. Hama nīyo walī atīho munhū wa kwīlīma ī sī.

⁶Kwike jalīho nzwīlo[3] jenhaga minzī kūfuma mu gatī ya sī, bobiza ho būdoto a ha sī.

⁷Hūna lūūlū ū SEEBA Mulungu ūmeeja munhū kūfuma mu malongo ga ha sī; ūng'haahīla myūyī ya būpanga ū mu mūūlū gakwe ū munhū ng'wenūyo, ūbiza mpanga.

⁸Ū SEEBA Mulungu walī wagolanya ngūnda ipandī lya kīya, mu Edeni; ūntūūla ng'wenūmo ū munhū ūyo akamūmba.

⁹Na lūūlū, ū SEEBA Mulungu wīyinha ī sī būdūla bo kūzwisha mitī ya būlī mbika; mitī misoga kūlola, na yawiza kūlyiwa. A ha gatī ya ngūnda ūtūūla ho ntī gwa būpanga, na ntī gwa kūmana misoga na mibi.

¹⁰Mongo gwahūūmaga kūfuma ū mu Edeni gwitīīla minzī ū mu ngūnda. Nīyo ū mongo gwenūyo gwalī gūgabanīkile matambī anè, kwīngīīla haho henaho yilonga myongo īnè.

¹¹Ū go kwandya ū mu myongo yenīyo ī lina lyago gwalī Pishoni, gwalī gūbītīlile mu sī ya Havila, sī ya zahabu; gūūbīta ū mu sī yenīyo gūkūtūlaga kuluba, kūshisha gūūkafuma.

¹²Ī zahabu ja mu sī yenīyo jalī niza no, jalīmo na delamu[4] na lapisi lazuli.[5]

¹³Ū go kabīlī gwitanagwa Gihoni, nū gwene gwalī gūjile gūkūtūlaga kuluba kūbītīla mu sī ya Kushi[6]

¹⁴Ū gwa kadatū gwitanagwa Hidekeli, ū goyi gūtūlile kuluba kūja kīya ya sī ya Ashulu. Lelo ū gwa kanè gwalī Flati.

¹⁵Ū SEEBA Mulungu ūnsola ū munhū, ūntūūla ū mu ngūnda gwa Edeni gīkī ayūgūlīma na kūgūlang'hana.

¹⁶Hūna ū SEEBA Mulungu ūnagīla ū munhū alīhaya gīkī, “Ūdūgije kūlya matwajo ga ntī gose gose ū mu ngūnda.

¹⁷Alīyo yaya ū kūgalya a matwajo ga ntī gwa kūmana misoga na mibi; nguno ūlū ūūgalya ūkūcha gete!”

¹⁸Hūna ū SEEBA Mulungu ūhaya gīkī, “Ītī yawiza ū ngosha ikale iyene, nakūmeegeja ng'wiye wa kūngunanha.”

¹⁹Ū SEEBA Mulungu walī wamala kūbeeja kūfuma mu malongo ga ha sī, pyī ī shiinū ja mu matogolo, nī noni ja higūlya. Hūna lūūlū wandya kūjenha ū kūlī Adamu gīkī abone a mina ayo akūjinha; ū Adamu ūmo akashitanīla būlī shiseeng'wa, ī lyenīlo hū līkabiza lina lyasho.

²⁰Na ng'hana ū Adamu ūjinha mina pyī ī mitugo, nī noni ja hape, hamò nī ndimu, nī shiinū ja mu matogolo. Alīyo ū Adamu atapandīkile ng'wiye wa kwigeleelwa kūngunanha.

²¹Hūna ū SEEBA Mulungu ūnaalīkīja ū Adamu tūlo nhaale. Aho alaalile ūng'wīngīja iguha līmò lya mu lūbazu, ūtūūla maanda a ha ng'wanya ūyo gūkalekwa.

²²Ū SEEBA Mulungu ūlībeeja nkīma ī liguha lya lūbazu īlo akang'wīngīja ū Adamu, hūna ūng'wenha ū nkīma a halī Adamu.

²³Ū Adamu ūhaya gīkī, “Ūyū ng'wene iguha lya mu maguha gane, na mīlī gwane nene ng'wenīkīlī gete; akwitanwa ‘nkīma;’ nguno afumile mulī ngosha.”

²⁴Kūlwa nguno yenīyī, ū ngosha akūbaleka a ba ise na nina adimane na nke wakwe; ū mu būbīlī wabo bakūbiza mīlī gūmò.

²⁵Ū Adamu nū nke baalī dūūhū, alīyo baalī batī na minala.