Read Sukuma Bible 2015 – Bibilia Ilagano Lya Kale 2015 Wandijo 28 Bible Online

Wandijo 28 - Sukuma Bible 2015 – Bibilia Ilagano Lya Kale 2015 bible

Wandijo 28

¹Hūna ū Isaka ūng'witana ū Yakobo ūmfuuha, ūng'hūgūla alīng'wīla gīkī, “Yaya gete ū kūtoola nkīma wa mu Kanaani ūmu.

²Jaga Padani-alamu kū ng'wa gūkūyo Betueli, ūkatoolele kwenūko; ū nkīma ūkūpandīkīla ha ng'wa mamiyo Labani, ū nsīzaye wa noko.

³Ū Mulungu Ndūjū wa shose,[50] wei ng'wenekīlī akwīlūkīle mbango, na akwīte kūbiza na būbyīle būtaale, hangī akongeje no no no, kūshisha ūbize ihanga lya banhū bingī.

⁴Akwinhe ī ja ng'wa Abulahamu, ū bebe hamò nū būbyīle wako; wīdime ī sī īyo Mulungu akang'winha Abulahamu, īyo ūkwikalaga muyo gītī ūlī nobeji, ībize yako ya wikomangīle.”

⁵Na lūūlū ū Isaka ūnaga ū Yakobo, ūbūūka ajile Padani-alamu kū ng'wa Labani ng'witūnja wa ng'wa Betueli muna Alamu, ū nsīzaye wa ng'wa Lebbeka, ū nina wa ba Yakobo na Esau.

⁶Ū Esau ūbona gīkī ū Isaka wamfuuha ū Yakobo, ūntūma Padani-alamu kūjūtoolela kwenūko, ūmfuuha alīnagīla akūng'wīlaga, “Ūtizūtoola nkīma wa Kanaani.”

⁷Ūmona wabiigwa a ba ise nū nina, ūja ng'hana ī Padani-alamu.

⁸A henaho ū Esau ūdeeba hape gīkī, a bakīma ba Kanaani baalī batanyegije ū ise, ū Isaka.

⁹Nang'hwe ūja kū ng'wa Ishimaeli ng'witūnja wa ng'wa Abulahamu, ūkantoola Mahalati, nshīke wa ng'wa Ishimaeli; ūyo wal'ilūmbūye wa ng'wa Nebaiyoti. Ūbiza ongeja nkīma ūngī a bake abo walī nabo kūfuma kale.

¹⁰Ū Yakobo ūbūūka kwīnga ī Beeli-sheba, ūgumha ajile Halani.

¹¹Ūshika ipandī ilebe ūlenda henaho, nguno ī līīmi līkagwa; aho wila ū būjikū ūsola iwe lyalī bbihī henaho ūlītūūla ū kū ntwe ūliisagūja gītī nsago, ūlaala.

¹²Kwimanīla waloota shilooti alībona ngaji ītūūlilwe ha sī, alīyo īkuumije ng'wigūlū; na bamalaika ba ng'wa Mulungu bakwītūmamīlaga kūlinha na kwika.

¹³Ū kwigūlya ya ngaji yenīyo, walīko ū SEEBA īmīīlile; ūhaya gīkī, “Ū nene nalī SEEBA, Mulungu wa ng'wa Abulahamu ntaale wako, na Mulungu wa ng'wa so Isaka.[51] Ī sī yenīyī aho walaalaga nakūkwinha bebe hamò nū būbyīle wako.

¹⁴Ū būbyīle wako būkūbiza na banhū bingī gītī lūbuubu lwa ha sī, hama ūkūtana[52] ūsambaale hose hose, ng'weli, kīya, sukuma na dakama. Pye a banhū ba mu sī bakwanukūla kūbītīla mulī bebe na būbyīle wako.

¹⁵Nakūbiza hamò nang'ho, nīyo nakūkūlang'hana būlī kwene ūko ūkūja. Hanuma nakūkūshosha hangī ū mu sī yenīyī. Natīko kūkūleka, kūshisha nīshikīlīje īyo nalīkwisagīja.”

¹⁶Ū Yakobo aho wabbamhuka ū mu tūlo yakwe, wandya kwiganika gīkī, “Ī gete ū SEEBA alīho a h'ipandī lyenīlī, nūūlū īkī naalī natamanile ū nene.”

¹⁷Akogoha no; ūhaya, “Ī lipandī lyenīlī līlī na lyoogohya itaale; ī lyenīlī lītūbiza ipandī līngī lyose lyose, ūlū ītī numba ya ng'wa Mulungu, a henaha hū a ha mita gwa kwingīlīla ng'wigūlū!”

¹⁸Ī ntondo yaaho ī dilū, ū Yakobo ūbūūka ūlīsola ī liwe īlo walī walītūūla kū ntwe ūliisagūla; ūlyīmīlīja gītī ng'hīngī, hūna ūliitīīla maguta a higūlya.

¹⁹Ī lipandī lyenīlo ūlitana Beeseli[53] nūūlū īkī ū nzengo gwa kwenūko gwitanagwa Luzi.

²⁰Hūna ū Yakobo ūlahīla alīhaya gīkī, “Ū Mulungu ūlū ūbiza hamò nū nene, ūnilang'hana nū mu lūgendo ūlo nalīīja lwenūlū, ūninha na shilīwa hamò na shizwalo sha kūzwala,

²¹kūshisha nashoke kū kaya ya ng'wa baba nalī mhola, ū SEEBA akūbiza Mulungu wane.

²²A h'iwe īlo naalītūūla lyīmīīla gītī ng'hīngī lyenīlī, īkūbiza ho numba ya ng'wa Mulungu; nū mu shose īsho ūkūninha, nakūkwinha īmò ya ng'wikūmi.”