Read Sukuma Bible 2015 – Bibilia Ilagano Lya Kale 2015 Wandijo 30 Bible Online

Wandijo 30 - Sukuma Bible 2015 – Bibilia Ilagano Lya Kale 2015 bible

Wandijo 30

¹Ū Laheli aho wabona gīkī atūmyalīlaga baana ū Yakobo, ūng'wītīla wilu ū nkūlūye; ūng'wīla ū Yakobo gīkī, “Ninhage baana; ūlū ītī chene nakūcha.”

²Ū Yakobo akapelana no; ūng'wīla, “Bebe ū nene nalī ha ng'wanya gwa ng'wa Mulungu ūyo wakūhangīja ūleke kūbyala baana?”

³Hūna ū Laheli ūhaya, “Ūūyū aha lūūlū ū Biliha ū nsese wane. Laalaga nang'hwe anibyalīle nane baana, napandīke kaya kūbītīla mulī we.”

⁴Na lūūlū ūng'winha ū Biliha ū nsese wakwe gīkī antoole. Ū Yakobo ūlaala nang'hwe ng'hana;

⁵Ūngita nda, ūmyalīla ng'wana ngosha.

⁶Ū Laheli ūhaya, “Ū Mulungu oolecha gīkī natī ng'hūbi; wigwa ū kūlīla kwane ūninha ng'wana ngosha.” Kūlwa nguno yenīyo ū ng'wana ūng'wilīka ī lina Dani.

⁷Ū nsese wa ng'wa Laheli ūbūūcha nda hangī, ūbyala ng'wana ngosha wa kabīlī.

⁸Ū lūkangala lwenūlo ū Laheli ūhaya, “Nalī na wilwisha būtaale no nū nkūlū wane; nose natinda.” Ū ng'wana ūng'wilīka Nafutali.

⁹Ū Leya aho wabona gīkī ooya ū kūbyala, ūnsola ū nsese wakwe ū Zilipa, ūng'winha ū Yakobo abize nke.

¹⁰Ū nsese wa ng'wa Leya ū Zilipa ūmyalīla ū Yakobo ng'wana ngosha.

¹¹Ū Leya ūhaya, “Lyūba mbande;” ūng'wilīka Gadi.

¹²Ū nsese wa ng'wa Leya ū Zilipa ūmyalīla ū Yakobo ng'wana wa kabīlī ngosha.

¹³Ū Leya ūhaya, “Nalī na būyegi no ī haha; a bakīma bakūyūnihaya nalī na mbango.” Ūng'wilīka ī lina lyakwe Asheli.

¹⁴Mu makanza g'igesa, ū Lubeni akaja kū malaale, ūkabona dūdai[57] ūng'wenhela ū nina ū Leya. Ū Laheli ūnomba ū Leya alīhaya, “Ninhage nane shi ī dūdai ja ng'wana wako!”

¹⁵Ū Leya ūng'wīla gīkī, “Ū bebe ūtaalī ūnikūūbīlīja dūhū gashi, ū ngosha wanitaaja, nī dūdai ja ng'wana wane ūtogilwe ūsole!” Ū Laheli ūnshokeja gīkī, “Ka nahene ndūhū ū mhayo shi lūūlū, nizunīlījage nasole ī dūdai, ū būjikū bo lelo akūlaala mu ng'wako.”

¹⁶Ī mhīndī ya lūshikū lwenūlo aho wiza ū Yakobo kūfuma ū kū malaale, ū Leya ūnsūmbīīla akūng'wīlaga, “Ī lelo ūlīlaala mu ng'wane naakūgoodishaga na dūdai ja ng'wanone.” Ng'hana ū lūshikū lwenūlo ūlaala mu ng'wa Leya.

¹⁷Ū Mulungu ūng'wigwa, ūbūūcha nda, ūmyalīla ū Yakobo ng'wana ngosha wa katanò.

¹⁸Ū Leya ūhaya, “Ū Mulungu waninong'ha kūlwa kūng'winha ū nsese wane kūlī ngoshi wane.” Na lūūlū ūng'wilīka ī lina Isakaali.

¹⁹Ū Leya ūbūūcha nda hangī, ūmyalīla ū Yakobo ng'witūnja wa katandatū.

²⁰Ū Leya ūhaya, “Ū Mulungu waninha inong'ho lya mpango no; nalībona lūūlū ū lūkangala ūlū ū ngoshi wane akūnikondela, nguno nashisha baana batandatū nakūmyalīlaga.” Na lūūlū ūng'witana Zabuloni.

²¹Hanuma y'ikanza ūbyala na ng'wanikī, ūng'wilīka ī lina lyakwe Dina.

²²Hūna ū Mulungu ūng'wizūkwa nū Laheli; ūng'wigwa ūnugūlīla būbyīle.

²³Ūbūūcha nda ūbyala ng'wana ngosha; ūhaya gīkī, “Ū Mulungu wanīngīja ū būdalahwa.”

²⁴Ūng'wilīka ī lina lyakwe Yosefu; ūhaya gīkī, “Ū SEEBA ni anongejage ng'wana ūngī ngosha.”

²⁵Ū Laheli aho wamyala ū Yosefu, ū Yakobo ūng'wīla ū Labani gīkī, “Nizunīlījage lūūlū nane naje kaya kū sī ya ng'wise.

²⁶Ūninhe na a bake bane, abo naabapandīka kūlwa kūkūtūmamīla; pye na a baana bane, naje kaya. Bebe wīmanile ī milīmo īyo naakūtūmamīla.”

²⁷Alīyo ū Labani ūng'wīla, “Ūlū ūlizunīlīja nū būlombi wane, igashaga hamò nane. Nguno naawīlilwe na balagūji gīkī ū SEEBA akūnīīlūkīlaga ī jenīji kūlwako.”

²⁸Ongeja kūhaya gīkī, “Hayaga ī mheela īyo ūtogilwe, nakūkwinha.”

²⁹Ū Yakobo ūng'wīla, “Bebe ng'wenekīlī ūmanile ūmo naakūtūmamīlile, nū mumo jakwīlīlile ī mitugo jako kūlwa nguno ya būlang'hani wane.

³⁰Aho naliza jalī ngehu no, alīyo ī haha jilī ningī; būlī kwene ūko nakūpīndīlaga ū SEEBA akūkwinhaga mbango. Ali lūūlū ī gīsī, ū nene nakwīlonja nanalī ī mihayo ya kaya yane?”

³¹Ū Labani ūbūja, “Ī gīsī ūlībona nakwinhe kī?” Ū Yakobo ūshosha, “Ūtizūninha kīnhū shose shose, alīyo ūlū ūnīītīla gūyū mhayo gūmò, nakongeja kūkūdīīmīla nū kūgalang'hana a madaale ga mitugo jako.

³²Nizunīlījage ī lelo nabīte ū mu madaale, naje nakūjisolanhyaga pyī ī ng'holo ja mabbado nī ja būgondo būgondo, na a baana ba ng'holo a bapi. Nī mbūlī ī ja mabbado nī ja būgondo būgondo. Ī yenīyo h'ībize mheela yane.

³³Ū būtūngīlīja wane būkūnikaanīla nūūlū kū shikū ja kū būtongi, ūlū wiza kūniloja ī mheela yane īyo ūlīninha. Ūlū yīlonga mo mbūli yose yose ītī ya mabbado nūūlū ītī ya būgondo būgondo, īkūbalwa gīkī ya kwiba, pye nūūlū ng'wana wa ng'holo dūhū ūyo atī wapi.”

³⁴Ū Labani ūshosha, “Nazunyaga n'ījage gīt'umo wahayīla.”

³⁵Alīyo ū lūshikū lwenūlo, ū Labani ūjīsolanhya pyī ī ng'hulyati nī mbūli ī ng'hīma ī ja mabbado nī ja būgondo būgondo (nī ja mabbado gaape), pyī nī ng'holo[58] ī japi. Ūjīsaamya, ūjitūūla mu makono ga bitūnja bakwe bajilang'hane.

³⁶Ūjilekanya nī ja ng'wa Yakobo, ūjitwala būūkūle bo lūgendo lwa kūshimīza shikū idatū; ī mitugo ījo jikasaaga jikala mu makono ga ng'wa Yakobo, akūndīīmīlaga ū Labani.

³⁷Hūna ū Yakobo ūbbuta matambī mado mado ga mitī ya magobeko na milozi na migude. Aho gataalī madoto būl'itambī ūlyītīla mabbado mabbado gape, akūlībbatūlaga a magūūla gwigela ū ntī ū mu gatī.

³⁸Hūna a matambī genayo ūyūgatūūla ū mu malambo ga kūng'wisīja, gaabiza kū būtongi wajo ī mitugo ūlū jilīng'wa minzī. Ījo jilī ng'wikanza lya kūpandwa,

³⁹jūyūpandwa bbihī na a matambī genayo. A baana ūlū jabyala babiza ba mikwanga mikwanga, ba mabbado na ba būgondo būgondo.

⁴⁰Ū Yakobo ūyūjikomanya ījo jilībyalwa, wajitūūla heeke. Hama pyī ī ja ng'wa Labani wajikangīīlaga ū kū ja mikwanga mikwanga nī japi, ījo jalī ū ng'widaale. Nang'hwe ūpandīka idaale lya mitugo jakwe mu gīko, ūyūjitūūla ipandī lyajo heeke, walī atajisangījaga nī ja ng'wa Labani.

⁴¹Būl'ikanza lya kūpandwa ī mitugo ī ngīlīng'hanu ūlū lyashika, ū Yakobo wagatūūlaga a matambī genayo ū mu malambo, gīkī ūlū jilipanda jibize hihī nago.

⁴²Alīyo ī mitugo ūlū jilī nyagokolo, walī atagatūūlaga mo a matambī genayo. Ū mu gīko ī mitugo ī ngokolo jūbiza ja ng'wa Labani; alīyo ī ngīlīng'hanu jūbiza ja ng'wa Yakobo.

⁴³Ū munhū ng'wenūyo ūsaba kīngī nasho, ūbiza na madaale mataale ga mitugo, na basese bagosha na bakīma; hamò na ngamīla na nzobe.