Read Sukuma Bible 2015 – Bibilia Ilagano Lya Kale 2015 Wandijo 33 Bible Online

Wandijo 33 - Sukuma Bible 2015 – Bibilia Ilagano Lya Kale 2015 bible

Wandijo 33

¹Ū Yakobo aho wabūūcha a miso, ūmona ū Esau aliza na a banhū bakwe abo magana anè. Ūbagaba a baana bakwe kūlenganīla nū mumo baalī a bake bakwe, a ba Leya, nū Laheli, na a bakīma a basese.

²A bake a basese na a baana babo ūbatonja kū būtongi, hanuma wiza ū Leya na a baana bakwe; ū kū numa ūbiza ū Laheli nū Yosefu.

³Hūna ū wei ūtongela ū kū būtongi wa bose; wandya kūshimīza ajile kūmanhya nū nkūlūye, kūnū akwinamaga ha sī kūshisha ng'hangala mpungatī, alīng'wegeela.

⁴Alīyo ū Esau ūpeela nhambo alīnsūng'wanha ū Yakobo, ūshikīla kūng'witūla mu shikuba, ūnkumbatīla kūnū alīmbipa. A bose būbīlī wabo būlīla.

⁵Ū Esau wahayūbūūcha a miso ūbabona a bakīma na a baana; ūbūja, “Aba ūlīnabo benaba banani?” Ū Yakobo ūshosha, “A benaba baana bane nene nsese wako, abo Mulungu waninha kūlwa kūnichīla shigongo.”

⁶Hūna a bakīma na a baana babo begeela kūngīsha, būtonga a basese na a baana babo, būshika binama kūshisha ha sī.

⁷Ūkūūbīja Leya na baana bakwe, nang'hwe winama; hūna wiza nū Yosefu nū Laheli, nabo binama.

⁸Hanuma ya yenīyo ū Esau ūbūja gīkī, “Ūlī na makūlū kī ū mu madaale gose ayo namanhyaga nago mu nzīla?” Nang'hwe ūhaya, “Nalīkwinha kūlwa kūnichīla shigongo; na kūnanukūla baba ntaale wane.”

⁹Ū Esau ūhaya, “Bebe nzuna wane, ū nene nalī nasho shingī no sha kūnigela. Ī shikolo shako ikalaga nasho bebe shikūkūgunanha.”

¹⁰Ū Yakobo ūhaya, “Yaya gete, nalīkūlomba ūshisole ūlū ūlīnanukūla mu būyegi. Ī lyenīlo inong'ho lyane lyanukūlage; nguno ū kūbūbona ū būshū wako īlī gītī kūbona būshū bo ng'wa Mulungu, īkī wananukūlaga mu būyegi.

¹¹Nalīkūlomba wanukūle ī shakwinha īsho wenhelagwa; nguno ū Mulungu wanīītīla yawiza no ū nene, kūshisha nalī na shiigunaanīlo sha kūniigela.” Ū Yakobo ūng'wikūmbīlīja no ū Esau, kūshisha ūshanukūla.

¹²Hanuma ya henaho ū Esau ūhaya, “Tūjagi lūūlū, naje nūkūtonga nī nzīla.”

¹³Ū Yakobo ūng'wīla, “Baba nkūjiwa, ūlībabona a banīgīnī benaba gīkī bataalī bado, hama ūmanile nī gīkī īlī chiza najiswage bo kūjilang'hana ī ng'holo nī ng'ombe ījo jilī na baana. Nguno ū kūjikiling'himya lūshikū lūmò jikūcha ī ndīlanha, na a baana ba ng'holo.

¹⁴Na lūūlū nalīkūlomba baba nkūjiwa ūtonge dūhū, ūnileke ū nene nsese wako nakūjaga hado hado nago a madaale, na a banīgīnī abo nalī nabo; kūshisha nane nakūshika dūhū ī Seili, ū kūlī ntaale wane ū baba.”

¹⁵Ū Esau ūhaya hangī gīkī, “Nakūlekele lūūlū nahene nūūlū bamò ba banhū abo balī hamò nane aba.” Ū Yakobo ūnshokeja, “Nibūlī kwīta gīko; ū ntaale wane ū baba, ka ni wananukūla dūhū ūmo nalī chenīkī!”

¹⁶Na lūūlū ū Esau ūnyamuka lūshikū lwenūlo, wandya lūgendo lwa kūshoka Seili.

¹⁷Ū Yakobo ū ng'wene ūbūūcha lūgendo lwa kūja Sukoti; aho washika ko ūtūūla ng'hambī, ūbeeja maheema kūlwakwe, na ngūtū ja kūlaala mitugo. H'ī nguno yene ī lipandī lyenīlo līkitanagwa Sukoti.

¹⁸Ū Yakobo aho washoka kūfuma ī Padani-alamu, akashika ū mu sī ya Kanaani alī mhola no; ūja kū nzengo gwa Shekemu, ūkatūūla ng'hambī yakwe bbihī nū nzengo gwenūyo.

¹⁹Ūgūla itogolo lya sī kūfuma kū bitūnja ba ng'wa Hamoli, ise wa ng'wa Shekemu. Ī litogolo lyenīlo ūlīfunīja shipande igana sha feza, ūkoma ho iheema lyakwe.

²⁰Ūbeeja ho na ng'walīlo ūgwitana “Mulungu Mulungu wa Isilaeli.”[61]