Read Sukuma Bible 2015 – Bibilia Ilagano Lya Kale 2015 Wandijo 35 Bible Online

Wandijo 35 - Sukuma Bible 2015 – Bibilia Ilagano Lya Kale 2015 bible

Wandijo 35

¹Hūna ū Mulungu ūng'wīla ū Yakobo gīkī, “Jaga Beeseli lūūlū ī haha ūkazenge kwenūko, ūbeeje na ng'walīlo koi kūlwa ng'wa Mulungu, ūyo akakwilongela aho wampeelaga nkūlūyo Esau.”

²Ū Yakobo ūbawīla a ba mu kaya yakwe, na a bose abo bikalaga hamò nang'hwe, “Galekagi a mashikolo ga kwilamīlīgīja ga mahanga ayo mulī nago; ng'wiyeeje, nī myenda muzwale yīngī.

³Nguno tūlīnga a henaha tūje Beeseli, ūko nalīkazenga ng'walīlo kūlwa ng'wa Mulungu, ūyo akaniidīka aho naalīlaga ng'wikanza lya makoye gane; ūyo nīyo alī hamò nane būlī kwene ūko nakūjaga.”

⁴Na lūūlū būng'winha Yakobo pye a mashikolo ga kwilamīlīgīja gabo, a ga mahanga ayo baalī nago, pye nī heleeni ja kū matū gabo. Ū Yakobo ūgajīka ha sī, ng'witina lya līntī mu Shekemu ng'wenūmo.

⁵Hūna būbūūka bajile, ī lyogohya lya ng'wa Mulungu lyalī lyabagwīla pye a banhū ba mu mizengo ī ya bbihī bbihī, atigelile nūūlū ūmò wa kūbūūbūkīla aho balī mu lūgendo.

⁶Ū Yakobo aho washika ī Luzi (h'ī Beeseli) ū mu sī ya Kanaani,

⁷Ūzenga ng'walīlo. Hūna ī lipandī lyenīlo ūlitana El Beeseli;[63] nguno a henaho h'ī lipandī īlo Mulungu akiyoolecha ū kūlī we aho wampeelaga nkūlūye.

⁸Ī likanza lyenīlo ūzumalīka Debola, walī ntūmami wa ng'wa Lebbeka; ūjīkwa ha sīlīlī ya ntī gūmò gwaho gwa Beeseli. Ū ntī gwenūyo gwinhwa lina lya Aloni Bakuti.[64]

⁹Ū Yakobo aho washoka kūfuma Padani-alamu, ū Mulungu akang'wilongela hangī ūmfuuha.

¹⁰Ū Mulungu ūng'wīla gīkī, “Ī lina lyako ūlī Yakobo, alīyo ūtikala ūkwitanagwa Yakobo; ī lina lyako līkūbiza Isilaeli,” na lūūlū ūng'wilīka lina lya Isilaeli.

¹¹Na hangī ū Mulungu ūng'wīla gīkī, “Ū Nene nalī Mulungu wa būdūla bose; ibyalagi, mukwīle mubize bingī. Ihanga līkūfuma ū mulī bebe, na ng'anda ja mahanga ga banhū; nīyo na batemi bakūfuma ū mu mīlī gwako.

¹²Nī sī īyo nakang'winha Abulahamu na Isaka nalīkwinha bebe; nīyo ī sī yenīyī nakūshinha ī shibyalīlwe shako īsho shikūbiza ho a hanuma yako.”

¹³Hūna ū Mulungu wīnga ho,[65] ūneka henaho aho walūngalūngīlaga nang'hwe.

¹⁴Ū Yakobo ūsīmbīla ng'hīngī y'iwe a h'ipandī īlo Mulungu akayomba nang'hwe; hūna wita a higūlya yalyo shitambo sha kūng'wiwa, hamò na maguta.

¹⁵Ū Yakobo ūlitana ī lipandī īlo Mulungu akayomba nang'hwe gīkī Beeseli.

¹⁶Hūna būbūūka kūsaama ī Beeseli; aho bataalī kūshikīīla Efulata, kaasaaga kalūgendo hoi gete, ū Laheli wandya kūlung'wa būsūngū wa kūbyala; ū būsūngū būnkoya no.

¹⁷Aho wabyala, ū nkīma ū ng'witūūja ūng'wīla gīkī, “Ūtoogohage nguno wapandīka ng'wana ngosha hangī.”

¹⁸Alīyo akazumalīka; kwike aho ataalī adūgije kūyomba, ū ng'wana ūng'wilīka lina lya “Beni-oni.”[66] Kwike ū Ise wa ng'wana ūng'witana “Benjamini.”[67]

¹⁹Ū Laheli ūbiza wazumalīka, ūjīkwa; baalī mu lūgendo bajile Efulata (h'ī Betelehemu).

²⁰A h'ishigo lyakwe, ū Yakobo ūzenga shiizūkījo; īsho na haha shoolekije aho walaala ū Laheli.

²¹Ū Isilaeli ongeja kūsegeja, ūūkatūūla ng'hambī yakwe kū nkīlo gwa Migidali-edeli.[68]

²²Aho alī mu sī yenīyo ū Isilaeli, ū Lubeni akang'wingīlīīla ū nina ng'wīnga, ū Biliha, ū nke wa ng'wa ise, ūlaala nang'hwe; ū mhayo gwenūyo ūgwigwa ū Isilaeli. A bitūnja bakwe ū Yakobo a bose baalī ikūmi na babīlī.

²³A ba ng'wa Leya baalī: Lubeni, myalwa wa kwandya wa ng'wa Yakobo; hūna wiza Simioni, Lawī, Yuda, Isakaali, Zabuloni.

²⁴A ba ng'wa Laheli baalī: Yosefu na Benjamini.

²⁵A ba ng'wa Biliha ū nsese wa ng'wa Laheli baalī: Dani na Nafutali.

²⁶A ba ng'wa Zilipa ū nsese wa ng'wa Leya baalī: Gadi na Asheli. A benaba hū bitūnja ba ng'wa Yakobo abo akabyalīlwa aho alī mu sī ya Padani-alamu.

²⁷Hūna ū Yakobo ūshikīīla kaya kūlī ise Isaka, ūko wikalaga ī Mamule, bbihī na Kiliati-alaba (h'ī Hebuloni). Ū wenūbo hū walī wikalo wa ba Abulahamu nū Isaka.

²⁸Ī myaka ya būlamu bo ng'wa Isaka īkashika igana na makūmi anaane.

²⁹Hūna ūzumalīka alī namhala wa myaka mingī, ūjīkwa wisangīja na bang'wawe. A bitūnja bakwe, a ba Esau nū Yakobo būnjīka.